ផលិតផល iPhone ជាប្រភពចំណូលធំជាងគេរបស់ Apple ប៉ុន្ដែបើតាមតាមការប្រកាសរបស់លោក Tim Cook នាយកប្រតិបត្តិ Apple គាត់ហាក់មានទំនោរទៅរកការអភិវឌ្ឍន៍នាឡិកាវៃឆ្លាត Apple Watch ដែលជាមហិច្ឆតាធំរបស់ Apple ក្នុងការគាំពារសុខភាព និងសុខមាលភាពរបស់អ្នកប្រើប្រាស់ ហើយនឹងធ្វើឱ្យ Apple Watch ក្លាយជាអ្វីដែលមនុស្សចាប់អារម្មណ៍ជាច្រើនជាង iPhone ទៅទៀត។

• ចុច Subscribe ឆានែល Telegram របស់ Sabay ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសន៍ជាមួយទស្សនាវដ្តី Outside Magazine លោក Tim Cook បានព្យាយាមបង្ហាញបំណងអនាគតរបស់ Apple ថា ពួកគេនឹងរួមចំណែកធំបំផុតក្នុងផ្នែកសុខភាពរបស់អ្នកប្រើប្រាស់ ពិសេសគឺការអភិវឌ្ឍទៅលើនាឡិកាវៃឆ្លាត Apple Watch តែម្ដង ដោយលោកមិនព្យាយាមផ្ដោតលើ iPhone ដែលជាផលិតផលពេញនិយមជាងគេរបស់ Apple ឡើយ។ បន្ថែមពីនេះ លោកក៏បានបង្ហើបថា ក្រុមហ៊ុននៅតែទទួលបានលិខិតជាច្រើន ដែលបញ្ជាក់ថា Apple Watch បានជួយសង្គ្រោះជីវិតរបស់ពួកគេ ដែលនេះជាកម្លាំងជម្រុញបន្ថែមទៀត ដើម្បីឱ្យ Apple កាន់តែខិតខំអភិវឌ្ឍមុខងារថែទាំងសុខភាពជាច្រើនទៀតសម្រាប់ Apple Watch។

មួយវិញទៀត ក្នុងសាររបស់ CEO ខាងលើ កាលពីចុងខែមករាកន្លងទៅលើ Twitter លោកបាន បង្ហើបត្រួសៗថា Apple នឹងបន្តបោះជំហានបន្ទាប់ ដោយផ្ដោតលើសុខភាពរបស់អ្នកប្រើប្រាស់នាឡិការ Apple Watch ដូចទៅនឹង Apple ធ្លាប់បានផ្ដល់កម្មវិធី Apple Fitness + កន្លងមក ដើម្បីលើកទឹកចិត្តដល់ប្រជាជនអោយពង្រឹងសុខភាព ក្នុងគោលបំណងផ្លាស់ប្តូររបៀបរស់នៅរបស់ពួកគេដូចច្នោះដែរ៕