- 2021-02-03 01:00:00
- ព័ត៌មាន
Elon Musk មិនឲ្យកូនរៀនច្រើនភាសា ព្រោះហេតុផលនេះ!
- 2021-02-03 01:00:00
- ចំនួនមតិ 0 | ចំនួនចែករំលែក 0
Elon Musk មិនឲ្យកូនរៀនច្រើនភាសា ព្រោះហេតុផលនេះ!
ចន្លោះមិនឃើញ
Elon Musk ត្រូវបានគេស្គាល់ថា ជាបុគ្គលនាំមុខមួយក្នុងពិភពឧស្សាហកម្មបច្ចេកវិទ្យា និងវិទ្យាសាស្ត្រ ដូចនេះសូម្បីតែកូនៗរបស់គាត់ ក៏ត្រូវបានបណ្ដុះបណ្ដាលផ្នែកទាំងនេះយ៉ាងម៉ត់ចត់ ខុសពីក្មេងៗដទៃផងដែរ។ មហាសេដ្ឋីកំពុងឈរលេខរៀងទី២រូបនេះ (ផ្អែកតាមទិន្នន័យ Forbes) មានកូន៦នាក់ ដោយពីរនាក់ជាកូនភ្លោះអាយុ១៧ឆ្នាំ និង៣នាក់ទៀតកូនភ្លោះអាយុ១៥ឆ្នាំ សុទ្ធតែស្ថិតក្នុងវ័យសិក្សា និងម្នាក់ទៀតអាយុត្រឹម៩ខែប៉ុណ្ណោះ។
ក្នុងបទសម្ភាសន៍ផ្ទាល់ជាសំឡេងលើកម្មវិធី Clubhouse លោក Elon Musk និយាយថា ការអប់រំរបស់កូនៗគាត់ ភាគច្រើនគឺសិក្សាតាមអ៊ីនធឺណិត ពិសេសគឺតាម YouTube និង Reddit (បណ្ដាញទំនាក់ទំនងមានប្រធានបទជាច្រើនសម្រាប់សិក្សាស្វែងយល់)។ មហាសេដ្ឋីរូបនេះក៏បន្ថែមថា ការសិក្សាគួរតែមានភាពទាក់ទាញឱ្យដូចជាការលេងវីដេអូហ្គេម គឺថា បើក្មេងលេងហ្គេមពូកែ នោះពួកគេក៏មានវិធីដើម្បីរៀនឱ្យពូកែផងដែរ។
កូនៗទាំង៥នាក់របស់ Elon Musk មិនត្រូវបានរៀនសូត្រតាមទម្លាប់ដូចក្មេងៗដទៃនោះទេ ពួករៀននៅសាលា Ad Astra ក្នុងរដ្ឋ Los Angeles ដែលបង្កើតដោយឪពុករបស់ពួកគេក្នុងឆ្នាំ២០១៤ ចំណាយទឹកប្រាក់អស់ ៧លានដុល្លារ និងមានសិស្សចំនួន ៤០នាក់ តែប៉ុណ្ណោះ កាលពី ឆ្នាំ២០១៨ កន្លងទៅ។
មុខវិជ្ជារៀនរបស់ពួកគេគឺផ្ដោតសំខាន់លើបច្ចេកវិទ្យាប្រាជ្ញាសិប្បនិមិត្ត (AI) រៀនសរសេរកូដ និងផ្នែកវិទ្យាសាស្ត្រ ដោយឡែកមុខវិជ្ជាកីឡា និងតន្ត្រី មិនមានបង្រៀននោះទេ។ ចំណែកឯមុខវិជ្ជាភាសាបរទេសវិញក៏មិនមានដែរ ព្រោះ Elon Musk មានការយល់ឃើញថា កម្មវិធីបកប្រែក្នុងពេលវេលាផ្ទាល់ៗ (real-time translation software) នឹងអាចជំនួសឱ្យការចេះច្រើនភាសាបាន ក្នុងពេលឆាប់ៗ។
Ad Astra មិនត្រឹមតែជាសាលាពិសេសនោះទេ សូម្បីតែគ្រូបង្រៀនក៏មិនធម្មតាផងដែរ ដោយគ្រូបង្រៀនសុទ្ធតែមនុស្សពូកែៗ អ្នកវិទ្យាសាស្ត្រ ដែលជាបុគ្គលិកនៅ ក្រុមហ៊ុន SpaceX ផ្ទាល់តែម្ដង។
ក្រៅពីការខិតខំរៀបចំកន្លែងឱ្យកូនៗរៀនសូត្រយ៉ាងយកចិត្តទុកដាក់ មហាសេដ្ឋីដែលកំពុងមានទឹកប្រាក់ចំនួន ១៨១,៩ពាន់ លានដុល្លារ (ផ្អែកតាមទិន្នន័យ Forbes គិតត្រឹមថ្ងៃទី២ ខែកុម្ភៈ) រូបនេះមានការយល់ឃើញចំពោះការអប់រំថា ទម្លាប់បង្រៀនដោយផ្ដល់កិច្ចការផ្ទះឱ្យធ្វើ ជារឿងគួរឱ្យរំខាន។ លោកក៏បានបន្ថែមថា ការសិក្សានៅមហាវិទ្យាល័យគ្រាន់តែជាមូលដ្ឋានដំបូងនៃភាពរីករាយរបស់មនុស្ស និងឱ្យយើងដឹងថាអ្វីដែលយើងនឹងត្រៀមធ្វើនៅពេលខាងមុខប៉ុណ្ណោះ ប៉ុន្ដែមនុស្សបែរជាមិនចាប់អារម្មណ៍ស្វែងយល់ពីរឿងទាំងនេះទៅវិញ។
មិនតែប៉ុណ្ណោះ Elon Musk ក៏ប្រឆាំងនឹងការទាមទារសញ្ញាបត្រចំពោះបុគ្គលិកបម្រើការងារផងដែរ ត្បិតអីនាយកប្រតិបត្តិរូបនេះ បាននិយាយកាលពី ខែមីនា កន្លងទៅថា ការជ្រើសរើសបុគ្គលិកបម្រើការងារនៅ ក្រុមហ៊ុន Tesla គឺមិនតម្រូវឱ្យមានសញ្ញាបត្រអ្វីនោះឡើយ គាត់ថែមទាំងថា វាជារឿងមិនសមហេតុផលថែមទៀតផង៕