នៅក្នុងសេចក្ដីថ្លែងសន្ទរកថានៃ សន្និសីទ​ការពារ​ទិន្នន័យ​សហភាពអឺរ៉ុប នៅ​ថ្ងៃនេះ នាយកប្រតិបត្តិ Tim Cook បានបង្ហាញពីក្ដីបារម្ភជាច្រើនអំពីឯកជនភាព និងសុវត្ថិភាពទិន្នន័យផ្សេងៗរបស់អ្នកប្រើប្រាស់លើឧបករណ៍ឌីជីថល ខណៈបច្ចុប្បន្នមានកម្មវិធីជាច្រើនព្យាយាមតាមដានទិន្នន័យរបស់អ្នកប្រើប្រាស់។

Tim Cook បាននិយាយថា បើទិន្នន័យរបស់អ្នកប្រើប្រាស់នៅតែមានការតាមដាន និងយកទៅប្រើប្រាស់ នោះអ្នកប្រើប្រាស់គឺលែងជាអតិថិជនទៀតហើយ ប៉ុន្តែពួកគេបានក្លាយជាផលិតផល ដែលត្រូវបានលក់ទៅឲ្យអ្នកផ្សព្វផ្សាយពាណិជ្ជកម្ម។

នាយកប្រតិបត្តិរូបនេះក៏បានធ្វើការថ្កោលទោសបន្ថែមថា អាជីវកម្មណាដែលមានការ​បំភ័ន្ត​ដល់អ្នកប្រើប្រាស់ កេង​ប្រវ័ញ្ច​ទិន្នន័យរបស់អតិថិជន ពួកគេមិនគាំទ្រនោះឡើយ ហើយត្រូវធ្វើការកែទម្រង់ចេញ។

បើទោះបី Tim Cook មិនបង្ហើបឈ្មោះអាជីវកម្មនោះចំៗ តែគេអាចសន្និដ្ឋានដឹងថា ក្រុមហ៊ុនដែលព្យាយាមតាមដានទិន្នន័យអ្នកប្រើប្រាស់ ដើម្បីឱ្យការផ្សាយពាណិជ្ជកម្មរបស់ខ្លួនចំគោលដៅល្អនោះ គ្មានក្រុមហ៊ុនណាក្រៅពី Facebook ឡើយ។

ត្បិតអីក្រុមហ៊ុនទាំងពីរ Apple និង Facebook គឺកំពុងមានរឿងក្ដៅនៅឡើយអំពីបញ្ហាទាំងនេះ ខណៈនៅក្នុងពិធីប្រកាសចំណូលប្រចាំត្រីមាសរបស់ Facbook កាលពីថ្មីៗនេះ នាយកប្រតិបត្តិ Mark Zuckerberg បានចោទ Apple ថាកំពុងជ្រៀតជ្រែក ដោយវាយប្រហារលើអាជីវកម្មរបស់ខ្លួន ព្រោះ Apple បានធ្វើការរឹតត្បិតចំពោះការដានទិន្នន័យលើប្រព័ន្ធប្រតិបត្តិការ iOS របស់ខ្លួន៕