- 2021-01-21 02:08:06
- ព័ត៌មាន
ទីបំផុត LG ពិចារណាដកខ្លួនចេញអាជីវកម្មស្មាតហ្វូន
- 2021-01-21 02:08:06
- ចំនួនមតិ 0 | ចំនួនចែករំលែក 0
ទីបំផុត LG ពិចារណាដកខ្លួនចេញអាជីវកម្មស្មាតហ្វូន
ចន្លោះមិនឃើញ
ការចុះផ្សាយរបស់សារព័ត៌មានកូរ៉េខាងត្បូង The Korea Herald បានឲ្យដឹងថា LG កំពុងពិចារណាដកខ្លួនចេញពីអាជីវកម្មស្មាតហ្វូនទាំងស្រុង ស្របពេលដែលចំនួនលក់ធ្លាក់ចុះ និងមានការខាតបង់រហូតដល់ ៤,៥ពាន់លានដុល្លារ ក្នុងរយៈពេល៥ឆ្នាំចុងក្រោយ។
លោក Kwon Bong-Seok នាយកប្រតិបត្តិ LG បានឲ្យតម្រុយដល់បុគ្គលិកថាក្រុមហ៊ុនកំពុងធ្វើការវាយតម្លៃឡើងវិញលើវត្តមានរបស់ខ្លួនក្នុងឧស្សាហកម្មស្មាតហ្វូន។ ក្នុងលិខិតផ្ទៃក្នុងដែលផ្ញើជូនបុគ្គលិក លោកបាននិយាយថា ៖ "ដោយសារតែការប្រកួតប្រជែងក្នុងទីផ្សារសកលសម្រាប់អាជីវកម្មស្មាតហ្វូនកាន់តែខ្លាំងក្លាឡើង វាដល់ពេលដែល LG ត្រូវចិត្តដាច់ និងជ្រើសរើសយកការសម្រេចចិត្តដ៏ល្អបំផុតមួយ។ ក្រុមហ៊ុនកំពុងពិចារណាលើវិធានការដែលអាចទៅរួចទាំងអស់ រួមមានការលក់ ការដកខ្លួន និងការបង្រួមអាជីវកម្មស្មាតហ្វូន។”
លោក Kwon បានបន្ថែមថា មិនថាមានការផ្លាស់ប្ដូរបែបណានោះទេ ក្រុមហ៊ុននឹងបន្តរក្សាទុកបុគ្គលិកបច្ចុប្បន្នពីអាជីវកម្មស្មាតហ្វូន និងអាចផ្លាស់ពួកគេទៅកាន់ផ្នែកផ្សេង។
ក្នុងរយៈពេលប៉ុន្មានឆ្នាំចុងក្រោយនេះ ចំនួនលក់របស់ LG បន្តធ្លាក់ចុះឥតឈប់ ហើយក្រុមហ៊ុនជឿជាក់ថាមានកាន់កាប់ចំណែកទីផ្សារស្មាតហ្វូនត្រឹម ២% ប៉ុណ្ណោះ។ LG បានជួបប្រទះនឹងការខាតបង់រយៈពេល ២៣ត្រីមាសជាប់គ្នា ដែលការខាតបង់សរុបគឺមានដល់ទៅ ៤,៥ពាន់លានដុល្លារ៕