- 2021-01-12 07:26:18
- ព័ត៌មាន
ទាំង Apple Amazon និង Google នាំគ្នាដកកម្មវិធីមួយនេះចោលដូចស្ពៃ
- 2021-01-12 07:26:18
- ចំនួនមតិ 0 | ចំនួនចែករំលែក 0
ទាំង Apple Amazon និង Google នាំគ្នាដកកម្មវិធីមួយនេះចោលដូចស្ពៃ
ចន្លោះមិនឃើញ
Apple Amazon និង Google បាននាំគ្នាផ្អាកដំណើរការរបស់កម្មវិធីបណ្ដាញទំនាក់ទំនងសង្គមឈ្មោះថា Parler ដោយបានលើកហេតុផលថាកម្មវិធីនេះមិនបានចាត់វិធានការត្រឹមត្រូវក្នុងការត្រួតពិនិត្យមាតិកាដែលញុះញង់ឲ្យកើតមានអំពើហិង្សា។
Parler គឺជាបណ្ដាញទំនាក់ទំនងសង្គមមួយដែលត្រូវបានចាត់ទុកថាជាអ្នកជំនួសឲ្យ Twitter ហើយវាទទួលបានការពេញនិយមដោយសារសេរីភាពពេញទីក្នុងការបង្ហោះមាតិកា។ Parler បានរៀបរាប់ថាខ្លួនគឺជា វេទិកាសម្រាប់បញ្ចេញមតិដោយសេរី ដ៏ពិសេសមួយលើពិភពលោក។
វិធានការមានលើ Parler ពីសំណាក់ក្រុមហ៊ុនបច្ចេកវិទ្យាធំៗគឺកើតមានបន្ទាប់ពីហេតុការណ៍ថ្ងៃទី៦មករានៅសហរដ្ឋអាមេរិក ពេលដែលអ្នកគាំទ្ររបស់លោកដូណាល់ ត្រាំ ដែលមានប្រដាប់ដោយអាវុធក្នុងដៃ បានសម្រុកចូលវិមានកាពីតូល ពេលដែលរដ្ឋសភាកោះប្រជុំដើម្បីបញ្ជាក់អំពីជ័យជម្នះរបស់លោក Joe Biden។
បណ្ដាញ Parler នេះបានក្លាយជាទីពេញនិយមរបស់ក្រុមអ្នកគាំទ្រលោកដូណាល់ ត្រាំ ក្នុងនោះមានទាំងអ្នកដែលបានចូលរួមក្នុងហេតុការណ៍សម្រុកចូលវិមានកាពីតូលផងដែរ។
ក្នុងលិខិតដែល Apple ផ្ញើជូនក្រុមអ្នក Delevoper នៃកម្មវិធី Parler ដែលចេញផ្សាយដោយ The New York Times មាននិយាយថាវិធានការដែលដាក់ចេញដោយ Parler គឺនៅមិនទាន់គ្រប់គ្រាន់ ដើម្បីដោះស្រាយការរីកសាយភាយនៃមាតិកាដែលបង្កគ្រោះថ្នាក់លើកម្មវិធី។
ការផ្អាកដំណើរការពីសំណាក់ក្រុមហ៊ុនធំៗទាំងបីមានន័យថា អ្នកប្រើប្រាស់មិនអាចទាញយកកម្មវិធីពី App Store របស់ Apple ឬ Play Store របស់ Google បានទៀតនោះទេ។ ចំណែក Amazon បានផ្អាក Parler ពីសេវាកម្ម Hosting វិបសាយឈ្មោះថា Amazon Web Services របស់ខ្លួនផងដែរ៕