លោក Elon Musk នាយក​​​ប្រតិបត្តិ​ក្រុមហ៊ុន​រថយន្ត​អគ្គិសនី Tesla បាន​នាំ​មុខ​លោក Jeff Bezos នាយក​ប្រតិបត្តិ​ Amazon ក្លាយ​ជា​បុគ្គល​ដែល​មាន​ទ្រព្យ​ច្រើន​ជាង​គេ​ក្នុង​​ពិភពលោក។

តម្លៃ​ភាគហ៊ុន​របស់ Tesla បន្ត​មាន​ការ​ហក់​ឡើង​ខ្លាំង បាន​ធ្វើ​ឲ្យ​ទ្រព្យ​សម្បត្តិ​របស់​លោក Elon Musk កើន​ឡើង​ដល់​ប្រមាណ​ ១៩៥ពាន់​លាន​ដុល្លារ គិត​ត្រឹម​ថ្ងៃ​សុក្រ​នេះ។ ​​លោក Elon Musk ទទួល​យក​បៀវត្ស​ប្រចាំ​ឆ្នាំ​តិច​បំផុត​ពី​ក្រុមហ៊ុន​របស់​ខ្លួន ដូច​នេះ​ប្រភព​នៃ​ទ្រព្យ​សម្បត្តិ​ភាគ​ច្រើន​គឺ​បាន​មក​ពី​ការ​កាន់​កាប់​ចំណែក​ភាគហ៊ុន​ដ៏​ច្រើន​មហាសាល​នៅ​ Tesla។

នៅ​ក្នុង​ឆ្នាំ​ ២០២០ ភាគហ៊ុន​របស់​ក្រុមហ៊ុន Tesla មាន​ការ​កើន​ឡើង​លើស​ពី ៧០០% ឯណោះ ដែល​បាន​ធ្វើ​ឲ្យ Tesla ក្លាយ​ជា​ក្រុមហ៊ុន​ផលិត​រថយន្ត​ដែល​មាន​តម្លៃ​ថ្លៃ​ជាង​គេ​លើ​ទីផ្សារ​នា​ពេល​បច្ចុប្បន្ន។

​គួរ​ដឹង​ដែរ​ថា​លោក Jeff Bezos ឯណោះ​វិញ មាន​ទ្រព្យ​សម្បត្តិ​​សរុប​ ១៨៥​ពាន់​លាន​ដុល្លារ គិត​ត្រឹម​ព្រឹក​ថ្ងៃ​សុក្រ​នេះ។ នេះ​បើ​តាម​តួលេខរបស់ Bloomberg៕