- 2020-11-25 03:12:59
- ផលិតផលថ្មី
ទូរសព្ទស៊េរី ២០២១ ដំបូងគេរបស់ Samsung តម្លៃចាប់ពី ១៧៨ដុល្លារ
- 2020-11-25 03:12:59
- ចំនួនមតិ 0 | ចំនួនចែករំលែក 0
ទូរសព្ទស៊េរី ២០២១ ដំបូងគេរបស់ Samsung តម្លៃចាប់ពី ១៧៨ដុល្លារ
ចន្លោះមិនឃើញ
Samsung បានប្រកាសចេញនូវ Galaxy A12 និង Galaxy A02s ជាផ្លូវការ ដែលពួកវាគឺជាសមាជិកដំបូងគេនៃត្រកូល Galaxy A ស៊េរីឆ្នាំ ២០២១ ហើយក៏ជាស្មាតហ្វូនស៊េរីឆ្នាំ ២០២១ ដំបូងគេរបស់ Samsung ផងដែរ។
Galaxy A02s ជាអ្នកស្នងតំណែង Galaxy A01 ដែលបានចេញកាលពីខែធ្នូ ឆ្នាំកន្លងទៅ។ ស្មាតហ្វូននេះមានអេក្រង់ទំហំ ៦,៥អ៊ីញ អាចបង្ហាញរូបភាពក្នុងកម្រិត HD+ និងមានប្រើរចនាបថ Infinity-V ដែលមានកាមេរ៉ា Selfie ទំហំ ៥MP។
កាមេរ៉ាខាងក្រោយមានចំនួនបីគ្រាប់ ដែលមាននូវកាមេរ៉ាមេទំហំ ១៣MP ហើយកាមេរ៉ាពីរគ្រាប់ទៀតមានទំហំ ២MP ជាប្រភេទកាមេរ៉ា Macro និងកាមេរ៉ាវាស់ជម្រៅ។ ស្មាតហ្វូននេះមានប្រើប្រាស់បន្ទះឈីប Snapdragon 450 ដែលមាន RAM ទំហំ ៣GB និងអង្គផ្ទុកទំហំ ៣២GB និងមានរន្ធសម្រាប់ដោតមេមូរីកាតបានទំហំដល់ ១TB។
ចំណុចលេចធ្លោមួយទៀតរបស់ Galaxy A02s គឺវាមានបំពាក់នូវថ្មទំហំ ៥០០០mAh ធំជាងមុន ២០០០mAh ដែលអាចសាកបានក្នុងល្បឿន ១៥វ៉ាត់។ ជាមួយលក្ខណៈសម្បត្តិទាំងអស់នេះ Galaxy A02s នឹងដាក់លក់នៅអឺរ៉ុបចាប់ពីខែកុម្ភៈ ឆ្នាំ ២០២១ ជាមួយតម្លៃប្រមាណ ១៧៨ដុល្លារ។
Galaxy A12 គឺជាអ្នកស្នងតំណែង Galaxy A11 ដែល Samsung បានប្រកាសចេញកាលពីខែមីនាកន្លងទៅ។ ស៊េរីថ្មីនេះមានបំពាក់ថ្មធំជាងមុន ១០០០mAh ដែលពេលនេះវាមានទំហំដល់ ៥០០០mAh ជាមួយល្បឿនសាក ១៥វ៉ាត់ដដែល។
Galaxy A12 មានបំពាក់អេក្រង់ Infinity-V ទំហំ ៦,៥អ៊ីញ អាចបង្ហាញរូបភាពក្នុងកម្រិត HD+ និងមានកាមេរ៉ា Selfie ទំហំ ៨MP។
នៅផ្នែកខាងក្នុងមានដំណើរការដោយបន្ទះឈីបដែលមានល្បឿនរត់ ២,៣GHz និង ១,៨GHz។ Samsung មិនបានបញ្ជាក់អំពីម៉ូដែលនៃបន្ទះឈីបនេះទេ ប៉ុន្តែមើលលើសមត្ថភាពវាទំនងជា Helip P35។ ស្មាតហ្វូននេះមានជម្រើស RAM ទំហំ ៣GB, ៤GB និង ៦GB ជាមួយអង្គផ្ទុកទំហំ ៣២GB, ៦៤GB និង ១២៨GB ហើយក៏មានរន្ធដោតមេមូរីកាតផងដែរ។
កាមេរ៉ាក្រោយមានចំនួនបួនគ្រាប់ ដែលមានកាមេរ៉ាមេទំហំ ៤៨MP, កាមេរ៉ា Ultrawide ទំហំ ៥MP, កាមេរ៉ាវាស់ជម្រៅទំហំ ២MP និងមានបន្ថែមកាមេរ៉ា Macro ទំហំ ២MP មួយទៀត ដែលមិនមានលើ Galaxy A11។
Galaxy A12 មានទ្រនាប់ស្កេនម្រាមដៃនៅផ្នែកចំហៀង និងមានជម្រើសពណ៌ចំនួនបី។ Samsung នឹងដាក់លក់ស្មាតហ្វូននេះចាប់ពីខែមករា ឆ្នាំ ២០២១ ជាមួយតម្លៃចាប់ពីប្រមាណ ២១៣ដុល្លារនៅទីផ្សារអឺរ៉ុប៕