- 2020-10-23 02:22:48
- ផលិតផលថ្មី
ស្មាតហ្វូន Huawei ចុងក្រោយប្រើឈីប Kirin បង្ហាញមុខជាផ្លូវការហើយ
- 2020-10-23 02:22:48
- ចំនួនមតិ 0 | ចំនួនចែករំលែក 0
ស្មាតហ្វូន Huawei ចុងក្រោយប្រើឈីប Kirin បង្ហាញមុខជាផ្លូវការហើយ
ចន្លោះមិនឃើញ
Huawei បានប្រកាសចេញជាផ្លូវការនូវស្មាតហ្វូន Mate 40 Series ដែលមានចំនួនបួនប្រភេទគឺមាន Mate 40, Mate 40 Pro, Mate 40 Pro+ និង Mate 40 RS Porsche Design។
Huawei បានចាត់ទុក Mate 40 Pro ជាម៉ូដែលដ៏សំខាន់មួយក្នុងចំណោមបួនម៉ូដែលខាងលើ ដែលដំណើរការដោយបន្ទះឈីប 5nm Kirin 9000។ ដោយសារការហាមឃាត់លើការធ្វើពាណិជ្ជកម្មពីសំណាក់រដ្ឋាភិបាលអាមេរិក មានន័យថា Mate 40 Series នឹងជាស្មាតហ្វូនចុងក្រោយរបស់ Huawei ដែលអាចប្រើប្រាស់នូវឈីប Kirin នេះ។
ឈីប Kirin 9000 មាននូវ CPU ចំនួន៨គ្រាប់ ដែលមាន Cortex-A77 ចំនួនបួន និង Coretex-A55 ចំនួនបួន។ ចំណែកផ្នែកក្រាហ្វិកគឺរ៉ាប់រងដោយ GPU ម៉ូដែល Mali-G78 ដែលមានរហូតដល់ ២៤គ្រាប់។ Huawei អះអាងថា CPU មានល្បឿនលឿនជាង១០% និង GPU មានល្បឿនលឿនជាង ៥២% បើប្រៀបធៀបនឹងឈីប Snapdragon 865+។
Huawei បានភ្ជាប់ឈីប Kirin 9000 ជាមួយនឹង RAM ទំហំ ៨GB និងអង្គផ្ទុកទំហំ ២៥៦GB ហើយអ្នកក៏អាចបន្ថែមទំហំអង្គផ្ទុកតាមរយៈមេមូរីកាតបានផងដែរ។
កាមេរ៉ាជាចំណុចលេចធ្លោមួយរបស់ Huawei ហើយសម្រាប់ Huawei Mate 40 Pro គឺមានបំពាក់នូវកាមេរ៉ាមេទំហំ 50MP ជា Sensor RYYB, កាមេរ៉ា Periscope ទំហំ 12MP ដែលអាច Zoom Optical បាន៥ដង និងកាមេរ៉ា Ultrawide ទំហំ 20MP អាចថតរូបទំហំ ១២០ដឺក្រេ។ ចំពោះកាមេរ៉ាខាងមុខមានចោះរន្ធលើអេក្រង់ ដែលមានទំហំ 13MP ហើយមានអមមកជាមួយនូវ Sensor 3D ToF សម្រាប់មុខងារដោះសោដោយផ្ទៃមុខ និងបញ្ជាដោយកាយវិការផ្សេងៗ។
សម្រាប់ផ្នែកអេក្រង់វិញ Mate 40 Pro គឺមានបំពាក់នូវអេក្រង់ទំហំ ៦,៧៦អ៊ីញ ជាប្រភេទអេក្រង់ OLED មានកម្រិតបង្ហាញ 2772 x 1344 ភីកសែល មាន Refresh Rate 90Hz ដែលមានរាងកោងនៅផ្នែកទាំងសងខាង។ ត្បិតថាមានរាងកោងខ្លាំងមែន ប៉ុន្តែ Huawei នៅអាចបំពាក់ប៊ូតុង Power និងប៊ូតុងថែមថយសំឡេងនៅផ្នែកចំហៀង ខុសពី Mate 30 Pro។
Mate 40 Pro មានបំពាក់ថ្មទំហំ ៤៤០០mAh ដែលអាចរ៉ាប់រងសម្រាប់ការប្រើប្រាស់ពេញមួយថ្ងៃបានដោយងាយ។ ថ្មនេះដែរអាចបញ្ចូលឆាប់ពេញតាមរយៈបច្ចេកវិទ្យាសាកកម្លាំង 66W និងមានទ្រាំទ្របច្ចេកវិទ្យាសាកថ្មឥតប្រើខ្សែកម្លាំងដល់ 50W ទៀតផង។
ងាកមកមើល Mate 40 Pro+ វិញគឺមានចំណុចជាច្រើនដែលដូចគ្នានឹង Mate 40 Pro ដូចជានៅលើអេក្រង់, ល្បឿនសាកថ្មប្រើខ្សែនិងឥតប្រើខ្សែ និងទំហំថ្មជាដើម។ ប៉ុន្តែ 40 Pro+ មានបំពាក់កាមេរ៉ា Telephoto ទំហំ 12MP ដែលអាច Zoom Optical បាន៣ដង និងកាមេរ៉ា Periscope បន្ថែមពីលើមួយទៀតមានទំហំ 8MP អាច Zoom Optical បាន១០ដង រួមជាមួយ Sensor ToF ផងដែរ។ ចំណុចខុសប្លែកមួយទៀតគឺវាមានបំពាក់ RAM ទំហំ 12GB។
ចំណែក Mate 40 មានខុសពី Mate 40 Pro ត្រង់ការបំពាក់ថ្មទំហំ ៤២០០mAh និងសាកថ្មកម្លាំង 40W។ Mate 40 ក៏មានបំពាក់នូវឈីប Kirin 9000E ដែលមាន GPU តិចជាង Kirin 9000 ចំនួនពីរគ្រាប់ និងមាន NPU ដែលខ្សោយជាងផងដែរ។ Mate 40 មានបំពាក់ RAM ទំហំ 8GB និងអង្គផ្ទុកដែលមានជម្រើសពីរគឺទំហំ 128GB និង 256GB។
Mate 40 មិនមានគាំទ្រការសាកថ្មឥតប្រើខ្សែនោះទេ ប៉ុន្តែវាជាម៉ូដែលតែមួយគត់ដែលមានរន្ធកាស 3.5mm។ Mate 40 នៅរក្សាកាមេរ៉ាមេ 50MP ជា Sensor RYYB ដដែល ប៉ុន្តែប្រើប្រាស់កាមេរ៉ា Ultrawide ទំហំ 16MP និងកាមេរ៉ា Telephoto ទំហំ 8MP អាច Zoom Optical បានបីដង។
ចុងក្រោយគេ Mate 40 RS Porsche Design មានលក្ខណៈសម្បត្តិស្រដៀងនឹង Mate 40 Pro+ ដែរ ប៉ុន្តែមានបំពាក់នូវទម្រង់កាមេរ៉ាខុសប្លែកពីគេ, មានបំពាក់នូវ Sensor សម្រាប់វាស់កម្ដៅ និងមានអង្គផ្ទុកទំហំ 512GB ខុសពីម៉ូដែលផ្សេងដែលមានត្រឹម 256GB។
គួរដឹងថា Huawei Mate 40 នឹងមានតម្លៃចាប់ពីប្រមាណ ១០៦៣ដុល្លារ, Mate 40 Pro នឹងមានតម្លៃប្រមាណ ១៤១៨ដុល្លារ, Mate 40 Pro+ នឹងមានតម្លៃប្រមាណ ១៦៥៤ដុល្លារ ហើយ Mate 40 RS Porsche Design នឹងមានតម្លៃប្រមាណ ២៧១៤ដុល្លារ ជាតម្លៃសម្រាប់ទីផ្សារអឺរ៉ុប៕