- 2020-08-12 01:35:23
- ផលិតផលថ្មី
អេក្រង់ 120Hz សាកថ្មកម្លាំង 120W ថត Zoom 120X ទូរសព្ទនេះមានទាំងអស់
- 2020-08-12 01:35:23
- ចំនួនមតិ 0 | ចំនួនចែករំលែក 0
អេក្រង់ 120Hz សាកថ្មកម្លាំង 120W ថត Zoom 120X ទូរសព្ទនេះមានទាំងអស់
ចន្លោះមិនឃើញ
ក្រុមហ៊ុន Xiaomi បានប្រកាសចេញស្មាតហ្វូន Mi 10 Ultra កាលពីយប់មិញនេះ ដែលជាស្មាតហ្វូនសម្រាប់អបអរខួបទី ១០ឆ្នាំនៃការបង្កើតក្រុមហ៊ុន។
ស្មាតហ្វូនខួប ១០ឆ្នាំនេះ មានលក្ខណៈសម្បត្តិខ្លាំងៗមួយចំនួនដែលលើសពីស្មាតហ្វូនដទៃ ដែលជាពិសេសនោះគឺមានបំពាក់នូវបច្ចេកវិទ្យាសាកថ្មកម្លាំង 120W។ ដូចនេះថ្មទំហំ ៤៥០០ mAh របស់ Mi 10 Ultra ចំណាយពេល ២៣នាទីប៉ុណ្ណោះ ដើម្បីសាកបាន ១០០% ឬអាចបាន ៤១% ពេលសាកត្រឹម ៥នាទី។ កាន់តែពិសេសនោះគឺអតិថិជនមិនបាច់ទិញឆ្នាំងសាកបន្ថែមនោះទេ ដោយមានដាក់មកក្នុងប្រអប់ស្រាប់។
និយាយពីរឿងសាកថ្មលឿននៅមិនទាន់ចប់ទេ ព្រោះថាវាមានបំពាក់បច្ចេកវិទ្យាសាកថ្មឥតប្រើខ្សែកម្លាំង 50W ទៀតផង ដែលចំណាយពេល ៤០នាទីប៉ុណ្ណោះដើម្បីសាកថ្ម។ លើសពីនេះក៏មានមុខងារសម្រាប់សាកថ្មឲ្យឧបករណ៍ដទៃទៀតក្នុងកម្លាំង 10W ផងដែរ។ Xiaomi បានអះអាងថាថាមពលថ្មរបស់ Mi 10 Ultra នឹងមានសមត្ថភាពផ្ទុកនៅសល់ ៩០% បន្ទាប់ពីឆ្លងកាត់វដ្ដសាកបាន ៨០០ជុំ។
ចូលដល់ផ្នែកកាមេរ៉ាវិញគឺវាមានបំពាក់ដោយកាមេរ៉ាមេទំហំ ៤៨MP ដែលមានមុខងាររក្សាលំនឹង OIS ហើយវាអាចផលិតរូបភាពបានទំហំ ១២MP ដែលមានសមត្ថភាពខ្លាំងក្នុងការថតរូបនៅទីងងឹត។ កាមេរ៉ាផ្សេងទៀតមានជាប្រភេទ Telephoto ទំហំ ៤៨MP (ថត Digital Zoom បាន 120X, មានមុខងារ OIS), កាមេរ៉ា Ultrawide ទំហំ ២០MP ថតរូបបានកម្រិត ១២៨ដឺក្រេ និងកាមេរ៉ា Portrait ទំហំ ១២MP។ ចំណែកឯកាមេរ៉ា Selfie មានទំហំ ២០MP ដែលចោះរន្ធតូចមួយលើអេក្រង់។
Xiaomi Mi 10 Ultra ដំណើរការដោយបន្ទះឈីប Snapdragon 865 ដែលមានគាំទ្រនូវសេវា 5G ហើយក៏មានបំពាក់ដោយ RAM ប្រភេទ LPDDR5 និងអង្គផ្ទុក UFS 3.1 ផងដែរ។
អេក្រង់របស់វាមានទំហំ ៦,៦៧អ៊ីញ ដែលជាប្រភេទ OLED អាចបង្ហាញរូបភាពបានក្នុងកម្រិត FHD+ និងមាន Refresh Rate 120Hz។
មុខងារគួរកត់សម្គាល់ផ្សេងទៀតមានដូចជាការប្រើប្រាស់នូវមុខងារស្កេនមុខដើម្បីដោះសោ, ទ្រនាប់ស្កេនម្រាមដៃបង្កប់លើអេក្រង់, មុខងារ IR, មុខងារ NFC, ប្រព័ន្ធសំឡេង Stereo, កញ្ចក់ Gorilla Glass 6 នៅផ្នែកខាងក្រោយ និងកញ្ចក់ខាងមុខជាប្រភេទ Gorilla Glass 5។
Mi 10 Ultra មានតម្លៃចាប់ពីប្រមាណ ៧៦៣ដុល្លារ សម្រាប់ RAM 8GB/ROM 128GB ហើយប្រភេទ RAM 8GB/ROM 256GB មានតម្លៃប្រមាណ ៨០៥ដុល្លារ។ វាក៏មានប្រភេទ RAM 12GB/ROM 256GB តម្លៃប្រមាណ ៨៦៥ដុល្លារ និងប្រភេទកប់បំផុត RAM 16GB/ROM 512GB តម្លៃប្រមាណ ១ ០០៥ដុល្លារ ដែលនឹងដាក់លក់នៅចិនចាប់ពីថ្ងៃទី ១៦ ខែសីហា៕
