លុយជំនួយកូវីដ១៩ បែរជាយកទិញឡាន Lamborghini Urus ជិះ

2020-08-11 06:15:49
ព័ត៌មាន

2020-08-11 06:15:49
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសរស់នៅរដ្ឋ Texas សហរដ្ឋអាមេរិកម្នាក់ បានរងការចោទប្រកាន់ថាបានខ្ចីលុយចំនួន ១,៦លានដុល្លារ ពីជំនួយកូវីដ១៩របស់រដ្ឋាភិបាល ដើម្បីទិញសម្ភារៈប្រណីតប្រើប្រាស់ ដែលក្នុងនោះមានរថយន្ត Lamborghini Urus មួយគ្រឿងផងដែរ។

មិនត្រឹមតែទិញ Lamborghini Urus នោះទេ ប៉ុន្តែបុរសខាងលើក៏បានទិញរថយន្ត Ford F-350 ថ្មីសន្លាងមួយគ្រឿង ថែមទាំងនាឡិកាដៃ Rolex ដែលមានតម្លៃថ្លៃទៀតផង។ បុរសរូបនេះបានទិញ Lamborghini Urus ស៊េរីឆ្នាំ ២០២១ ដែលមានតម្លៃលើទីផ្សារ ២២២ ០០០ដុល្លារ ជារថយន្តកំពុងពេញនិយមមួយលើទីផ្សារ។

គួរដឹងថារដ្ឋាភិបាលសហរដ្ឋអាមេរិកបានបង្កើតនូវកម្មវិធីប្រាក់កម្ចីឈ្មោះថា Paycheck Protection ដើម្បីផ្ដល់ប្រាក់កម្ចីដល់អាជីវកម្មតូចៗ ឲ្យពួកគេអាចមានលទ្ធផលបើកប្រាក់ខែដល់បុគ្គលិករបស់ខ្លួន អំឡុងពេលដែលជួបបញ្ហាព្រោះជំងឺកូវីដ១៩។ យ៉ាងណាក្ដីបែរជាមានម្ចាស់អាជីវកម្មខ្លះគេងប្រវ័ញ្ចលើកម្មវិធីជំនួយនេះ ដោយយកលុយដែលទទួលបានទៅទិញសម្ភារៈប្រើប្រាស់ផ្ទាល់ខ្លួនទៅវិញ។

ពេលនេះបុរសរស់នៅ Texas ខាងលើ ត្រូវប្រឈមមុខនឹងបទល្មើសជាច្រើន ក្នុងនោះរួមមានការក្លែងបន្លំចំពោះស្ថាប័នហិរញ្ញវត្ថុ, បោកប្រាស់ធនាគារ និងជាប់ពាក់ព័ន្ធនឹងការធ្វើប្រតិបត្តិការលុយខុសច្បាប់ជាដើម៕

ប្រភព៖ Motor1 ប្រែសម្រួល៖ សុខហេង