ឡាន Mitsubishi Pajero នឹងត្រូវអស់ជីវិតនៅឆ្នាំ ២០២១

2020-07-28 02:32:13
ព័ត៌មាន

2020-07-28 02:32:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីបានបញ្ចេញនូវប្រភេទ Final Edition រួច ក្រុមហ៊ុន Mitsubishi បានសម្រេចចិត្តឈប់លក់រថយន្ត Pajero ក្នុងទឹកដីកំណើតរបស់ខ្លួនកាលពីខែមេសា ឆ្នាំមុន។ យ៉ាងណាក្ដីរថយន្ត Off-Road នេះនៅតែមានលក់នៅតំបន់មួយចំនួនលើពិភពលោក ប៉ុន្តែវានឹងត្រូវបញ្ឈប់ការផលិតជាផ្លូវការនៅទូទាំងពិភពលោកនាឆ្នាំ ២០២១ ខាងមុខ បើផ្អែកតាមការចុះផ្សាយរបស់ Nikkei។

សារព័ត៌មាន Nikkei បានដឹងថា Mitsubishi គ្រោងនឹងបិទនូវរោងចក្រផលិតរថយន្ត Pajero ដែលមានទីតាំងនៅតំបន់ Gifu ប្រទេសជប៉ុន ដែលរោងចក្រនេះមានទិន្នផលផលិតទាបខ្លាំងក្នុងពេលប៉ុន្មានឆ្នាំចុងក្រោយ ធ្វើឲ្យខាតបង់ប្រាក់ពេលបន្តប្រតិបត្តិការ។

ការបិទរោងចក្រនេះមានន័យថារថយន្ត Pajero នឹងត្រូវអស់សង្ខារ ដែលវាអាចនឹងកើតមានឡើងនៅអំឡុងឆ្នាំក្រោយ។ បើតាមការចុះផ្សាយរបស់ Nikkei បានឲ្យដឹងថា Mitsubishi អាចនឹងចេញសេចក្ដីបញ្ជាក់អំពីអនាគតរថយន្ត Pajero លឿនបំផុតនៅចុងសប្ដាហ៍នេះតែម្ដង។

រថយន្ត Mitsubishi បានបង្ហាញមុខជាលើកដំបូងនាឆ្នាំ ១៩៨២ ដែលគិតមកទល់បច្ចុប្បន្នវាចេញបាន ៤ ជំនាន់មកហើយ។ ជំនាន់ទី៤ ដែលជាជំនាន់ចុងក្រោយបង្អស់ ប្រកាសចេញតាំងពីឆ្នាំ ២០០៦ មក ហើយកន្លងមកវាឆ្លងកាត់ការកែប្រែមុខមាត់ចំនួនបួនលើកគឺនៅឆ្នាំ ២០០៩ ២០១០ ២០១២ និង ២០១៥៕

ប្រភព៖ Motor1 ប្រែសម្រួល៖ សុខហេង