ក្រុមហ៊ុន Audi បានបង្ហាញអំពីលក្ខណៈពិសេសទាំងអស់របស់រថយន្ត RS7 Sportback ស៊េរីឆ្នាំ២០២១ ជាផ្លូវការ។

រថយន្ត Audi RS7 Sportback ឆ្នាំ២០២១ មានតម្លៃចាប់ពី ១១៤ ០០០ដុល្លារ ដោយមានបំពាក់យ៉ាន់ទំហំ ២១អ៊ីញមកស្តង់ដារ ជាមួយកៅអីស្ព័រស្បែក, ដៃចង្កូតមានមុខងារកម្តៅ, ប្រព័ន្ធបូម Adaptiv Air Suspension, ប្រព័ន្ធចង្កូត Dynamic All-wheel Steering និងប្រព័ន្ធប៉ុងពីរ quattro All-wheel Drive។

រថយន្តស្ព័រនេះបំពាក់ម៉ាស៊ីនចំណុះ ៤,០លីត្រ twin-turbo V8 មានកម្លាំង ៥៩២សេះ អាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៣,៥វិនាទី ហើយមានល្បឿនអតិបរមា ២៨០គីឡូម៉ែត្រក្នុងមួយម៉ោង។

វាមាន Option ពណ៌ជាច្រើន ដូចជា Florett Silver, Glacier White, Mythos Black, Navarra Blue, Tango Red និង Daytona Pearl Metallic ដែលមានតម្លៃ ៥៩៥ដុល្លារ, ពណ៌ Sebring Black Crystal មានតម្លៃ ១ ០៧៥ដុល្លារ និង ពណ៌ Audi Exclusive មានតម្លៃ ៣ ៩០០ដុល្លារ។

ជាមួយគ្នានេះ វាមាន Option យ៉ាន់ទំហំ ២២អ៊ីញ តម្លៃ ១ ៥០០ដុល្លារ, កញ្ចប់ Option “Black Optic” តម្លៃ ២ ៧៥០ដុល្លារ និង Carbon Optic តម្លៃ ៦ ៦៥០ដុល្លារ។ ចំណាយលុយ ១ ៥០០ដុល្លារទៀត អ្នកនឹងទទួលបានកញ្ចប់ Option កៅអី Individual Contour Seating និង Carbon Twill Structure Inlays តម្លៃ ៥០០ដុល្លារ។

សរុបមក ប្រសិនបើអ្នកញាត់ Option ទាំងអស់ចូលទៅក្នុងរថយន្ត Audi RS7 Sportback ស៊េរីឆ្នាំ២០២១ វានឹងមានតម្លៃរហូតដល់ទៅ ១៥២ ៤៤៥ដុល្លារ ក្នុងនោះគ្រាន់តែ Option មានតម្លៃ ៣៧ ៤៥០ដុល្លារបាត់ទៅហើយ៕