តាម​ការ​អះអាង​របស់​វិបសាយ SamMobile បាន​ឲ្យ​ដឹង​ថា​ Samsung កំពុង​អភិវឌ្ឍន៍​នូវ​ស្មាតហ្វូន​ពីរ​ប្រភេទ​ដែល​​មាន​ឈ្មោះ​​​ផ្ទៃ​ក្នុង​ថា​ "Galaxy S20 Fan Edition”។ ត្បិត​ថា​​នេះ​មិន​មែន​ជា​ឈ្មោះ​ផ្លូវ​ការ​​មែន ប៉ុន្តែ​វា​ទំនង​ជា​ Galaxy S20 ដែល​មាន​តម្លៃ​ធូរ ដូច​កាល​ Samsung ចេញ Galaxy S10 Lite អ៊ីចឹង​ដែរ។

ប្រភព​បាន​ប្រាប់​ដល់ SamMobile ថា Galaxy S20 Fan Edition ដែល​កំពុង​អភិវឌ្ឍន៍​បច្ចុប្បន្ន​នេះ​មាន​លេខ​ម៉ូដែល​ SM-G780 (សម្រាប់​ទីផ្សារ​សកល) និង SM-G781 (សម្រាប់​ទីផ្សារ​អាមេរិក)។ គួរ​ចាប់​អារម្មណ៍​ថា​ SM-770 គឺ​ជា​លេខ​​ម៉ូដែល​របស់ Galaxy S10 Lite ដូច​នេះ​វា​ជា​ការ​បញ្ជាក់​កាន់​តែ​ច្បាស់​ថា​នឹង​ជា​ត្រកូល S តម្លៃ​ធូរ។

S20 Fan Edition រំពឹង​ថា​មាន​ចែក​ចេញ​ជា​បី​ប្រភេទ​ខុស​គ្នា ដោយ SM-G780 នឹង​ចេញ​លក់​លើ​ទីផ្សារ​សកល​ដោយ​មាន​ជម្រើស 4G និង 5G។ ចំណែក SM-G781 សម្រាប់​ទីផ្សារ​អាមេរិក​នឹង​មាន​តែ​ប្រភេទ 5G ប៉ុណ្ណោះ។ ម៉ូដែល​ទាំង​បី​រំពឹង​ថា​នឹង​មាន​​ប្រើ​ប្រាស់​ស្បែក One UI 2.5 ថ្មី ដែល​ដើរ​ដោយ​ Android 10។

គួរ​ដឹង​ថា​ Galaxy S10 Lite គឺ​​មាន​បំពាក់​ដោយ​ឈីប Snapdragon 855 តែ​មួយ​ប្រភេទ​គត់​ពេល​ដែល​ចេញ​លក់​លើ​ទីផ្សារ។ ដូច​នេះ​គេ​រំពឹង​ថា​ S20 Fan Edition អាច​នឹង​ប្រើ​ប្រាស់​តែ​ឈីប Snapdragon 865 មួយ​គត់ មិន​មាន​លាយ​ឡំ​ជា​មួយ​ឈីប Exynos របស់ Samsung ឡើយ។ វា​អាច​ជា​ដំណឹង​ល្អ​សម្រាប់​អ្នក​គាំទ្រ​ដែល​ចូល​ចិត្ត​​ឈីប Snapdragon ​ជា​ជាង Exynos៕​