ចន្លោះ​ប្រហោង​ធំ​មួយ​ទាក់ទង​នឹង​មុខងារ Sign in with Apple អាច​ឲ្យ​ជន​ខិល​ខូច ​ចូល​ទៅ​កាន់​គណនី​អ្នក​ប្រើ​ប្រាស់​​របស់​សេវាកម្ម​ដែល​​ជា​ដៃ​គូ​របស់​ Apple។ ចន្លោះ​ប្រហោង​នេះ​ត្រូវ​បាន​រក​ឃើញ​ដោយ​អ្នក​ស្រាវជ្រាវ​ជនជាតិ​ឥណ្ឌា​ឈ្មោះ Bhavuk Jain ដែល​រូប​គេ​បាន​រាយការណ៍​បញ្ហា​នេះ​តាម​រយៈ​កម្មវិធី​ស្វែង​រក​ចន្លោះ​ប្រហោង​របស់ Apple។

ក្រោយ​ពី​ Jain រាយការណ៍​អំពី​ចន្លោះ​ប្រហោង​នេះ Apple បាន​ដោះ​ស្រាយ​វា​រួច​រាល់ ហើយ​បាន​ផ្ដល់​ប្រាក់​រង្វាន់​ ១០​ម៉ឺន​ដុល្លារ ដល់​ Jain ​ផង​ដែរ។ Apple និយាយ​ថា​ខ្លួន​បាន​ធ្វើ​ការ​ស៊ើបអង្កេត​រួច ដោយ​ឃើញ​ថា​ចន្លោះ​ប្រហោង​នេះ​មិន​បាន​ធ្វើ​ឲ្យ​លេច​ធ្លាយ​ទិន្នន័យ​អ្នក​ប្រើ​ប្រាស់​នោះ​ទេ។

Apple បាន​បង្ហាញ​ចេញ​មុខងារ Sign in with Apple ក្នុង​កម្មវិធី WWDC កាល​ពី​ឆ្នាំ​ ២០១៩។ មុខងារ​នេះ​អាច​ឲ្យ​អ្នក​ប្រើ​ប្រាស់ Apple ធ្វើ​ការ​ Sign in ចូល​ក្នុង​សេវា​កម្ម​ផ្សេង​ដោយ​ប្រើ​ប្រាស់​នូវ​ AppleID និង​អាច​ Login ដោយ​ប្រើ​ប្រាស់​ Face ID និង Touch ID ផង​ដែរ។ ចំណុច​លេច​ធ្លោ​មួយ​របស់​មុខងារ​នេះ​គឺ​វា​អាច​ឲ្យ​អ្នក​ប្រើ​ប្រាស់​លាក់​​​អាសយដ្ឋាន​អ៊ីមែល​ពី​សេវាកម្ម​នានា​បាន៕​​​​

​​