- 2020-05-29 07:43:04
- ព័ត៌មាន
ដូណាល់ ត្រាំ អាចនឹងដកចោលនូវខែលការពាររបស់ក្រុមហ៊ុនបច្ចេកវិទ្យា
- 2020-05-29 07:43:04
- ចំនួនមតិ 0 | ចំនួនចែករំលែក 0
ដូណាល់ ត្រាំ អាចនឹងដកចោលនូវខែលការពាររបស់ក្រុមហ៊ុនបច្ចេកវិទ្យា
ចន្លោះមិនឃើញ
លោកប្រធានាធិបតីអាមេរិក ដូណាល់ ត្រាំ បានចុះហត្ថលេខាលើបទបញ្ជាមួយដែលអាចឲ្យរដ្ឋាភិបាលទទួលបាននូវអំណាចថ្មីដ៏ធំជុំវិញអ៊ីនធឺណិត។ តាមការចុះផ្សាយរបស់ The Washington Post បានឲ្យដឹងថា លោកត្រាំ នឹងចេញបទបញ្ជាឲ្យមានការកែសម្រួល ឬដកចេញនូវអភ័យឯកសិទ្ធិដែលក្រុមហ៊ុនបច្ចេកវិទ្យាទទួលបាន ក្រោមមាត្រា ២៣០ នៃច្បាប់ប្រាស្រ័យទាក់ទង។
មាត្រា ២៣០ ដែលពេលខ្លះគេចាត់ទុកវាថាជាច្បាប់សំខាន់ជាងគេលើអ៊ីនធឺណិត គឺអាចឲ្យក្រុមហ៊ុនបច្ចេកវិទ្យារួចផុតពីការទទួលខុសត្រូវតាមផ្លូវច្បាប់សម្រាប់មាតិកាដែលអ្នកប្រើប្រាស់របស់ពួកគេបានបង្ហោះ។
លោក ដូណាល់ ត្រាំ ចាត់ទុកថាការធ្វើបែបនេះគឺដើម្បីការពារសេរីភាពក្នុងការបញ្ចេញមតិរបស់ពលរដ្ឋអាមេរិក។ គួរដឹងថាលោក ត្រាំ បានប្រកាសអំពីគម្រោងការចុះហត្ថលេខាលើបទបញ្ជាថ្មីនេះ ក្រោយពីបណ្ដាញ Twitter បានដាក់សម្គាល់លើសារចំនួនពីរដែលលោកត្រាំ បានបង្ហោះកាលពីដើមសប្ដាហ៍ ថាជាព័ត៌មានមិនពិត។ Twitter និយាយថាការបង្ហោះទាំងពីរគឺមានការអះអាងខុសពីការពិតអំពីការបោះឆ្នោតពីចម្ងាយតាមរយៈការផ្ញើសំបុត្រ ហើយ Twitter បានបន្ថែមតំណភ្ជាប់ជាមួយការបង្ហោះទាំងពីរ ទៅកាន់ប្រភពព័ត៌មានច្បាស់ការណ៍ ដើម្បីឲ្យអ្នកប្រើប្រាស់ផ្ទៀងផ្ទាត់ទៀតផង។
ដោយឡែកអ្នកនាំពាក្យរបស់ Facebook និយាយថាពួកគេមានទិសដៅផ្សេងខុសពី Twitter។ Facebook នៅតែដាក់សម្គាល់លើការបង្ហោះណាដែលជាដំណឹងមិនពិត ប៉ុន្តែលើកលែងចំពោះការបង្ហោះចេញពីអ្នកនយោបាយ ព្រោះ Facebook និយាយថាខ្លួនមិនគួរដើរតួធ្វើជាអ្នកបែងចែកព័ត៌មានណាពិត ព័ត៌មានណាមិនពិត ទាក់ទងនឹងនយោបាយនោះទេ។
ក្រឹត្យច្បាប់ថ្មីរបស់លោក ដូណាល់ ត្រាំ ប្រសិនបើវាចូលជាធរមានមែន នឹងធ្វើឲ្យក្រុមហ៊ុនបច្ចេកវិទ្យាជាច្រើនទំនងជាត្រូវរងការដាក់ពាក្យបណ្ដឹង ដោយសារពួកគេត្រូវទទួលខុសត្រូវលើការបង្ហោះរបស់អ្នកប្រើប្រាស់រាប់ពាន់លាននាក់ជុំវិញពិភពលោក៕
