- 2020-05-25 06:04:06
- ព័ត៌មាន
ម៉ាកឡានប្រណីតកូរ៉េ កំពុងសម្ងំផលិតអាវុធសម្ងាត់ ប្រកួតនឹង Audi និង Porsche
- 2020-05-25 06:04:06
- ចំនួនមតិ 0 | ចំនួនចែករំលែក 0
ម៉ាកឡានប្រណីតកូរ៉េ កំពុងសម្ងំផលិតអាវុធសម្ងាត់ ប្រកួតនឹង Audi និង Porsche
ចន្លោះមិនឃើញ
រថយន្ត Genesis G80 ស៊េរីឆ្នាំ ២០២១ បានបង្ហាញមុខកាលពីដើមឆ្នាំជាមួយរចនាបថទាន់សម័យ កាន់តែទាក់ទាញ និងមានជម្រើសម៉ាស៊ីនចំនួនពីរ។ យ៉ាងណាក្ដីរថយន្ត Sedan ប្រណីតនេះនឹងមិនមានជម្រើសម៉ាស៊ីនតែប៉ុណ្ណេះទេ ដោយ Genesis គ្រោងបន្ថែមប្រភេទ Plug-in Hybrid និងប្រភេទប្រើថាមពលអគ្គិសនីសុទ្ធបន្ថែមពីលើនេះ។
រថយន្ត Genesis G80 ដែលប្រើថាមពលអគ្គិសនីសុទ្ធរំពឹងថាបង្ហាញវត្តមាននាឆ្នាំ ២០២១ ដោយមានឈ្មោះថា eG80 ជាគូប្រកួតប្រជែងខ្លាំងក្លាមួយរបស់ Audi e-tron GT និង Porsche Taycan។ ពេលនេះដែរវិបសាយ Korean Car Blog បានបង្ហាញដំណឹងដំបូងអំពីរថយន្ត Sedan អគ្គិសនីប្រណីតរបស់កូរ៉េខាងត្បូងនេះ។
ប្រភពខាងលើអះអាងថា Genesis eG80 នឹងមានបំពាក់អាគុយដែលអាចឲ្យវាជិះបានចម្ងាយ ៥០០គីឡូម៉ែត្រ ពេលសាកពេញ។ វាក៏នឹងមានបំពាក់បច្ចេកវិទ្យាបើកបរស្វ័យប្រវត្តិកម្រិត ៣ ដែលជាបច្ចេកវិទ្យារួមគ្នាផលិតរវាង Hyundai និង Samsung។
ខណៈដែលក្រុមហ៊ុនដូចជា BMW, Mercedes-Benz, Audi, Volkswagen និង Volvo សុទ្ធតែអាចផលិតរថយន្តអគ្គិសនីដែលជិះបានចម្ងាយឆ្ងាយ ប៉ុន្តែនៅមិនទាន់មានបច្ចេកវិទ្យាបើកបរស្វ័យប្រវត្តិកម្រិតទី ៣នោះទេ។ បច្ចេកវិទ្យានេះអាចឲ្យអ្នកបើកបរដោះដៃចេញពីចង្កូត ឲ្យរថយន្តបើកបរដោយស្វ័យប្រវត្តិបាន។
នៅពេលចេញលក់ រំពឹងថា Genesis eG80 នឹងមានតម្លៃថ្លៃលើសប្រភេទប្រើម៉ាស៊ីនសាំងធម្មតា។ eG80 នេះដែរនឹងជារថយន្តអគ្គិសនីថ្មីមួយ ក្នុងចំណោមរថយន្តអគ្គិសនីថ្មី ១៤ ម៉ូដែល ដែល Hyundai គ្រោងប្រកាសចេញត្រឹមឆ្នាំ ២០២៥៕