Mavic Air 2 ចេញជាផ្លូវការ កាមេរ៉ាទំហំ ៤៨MP ថតវីដេអូ 4K/60fps

2020-04-28 02:31:54
ផលិតផលថ្មី

2020-04-28 02:31:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនផលិត Drone ឈ្មោះ DJI បានបង្ហាញចេញជាផ្លូវការនូវ Mavic Air 2 ជា Drone មួយដែលពួកគេហៅថាជា Drone ឆ្លាតជាងគេ, សុវត្ថិភាពជាងគេ និងងាយស្រួលបង្ហោះជាងគេលើទីផ្សារ។

Mavic Air 2 គឺមានបំពាក់នូវ Sensor រូបភាពប្រភេទ QuadBayer ទំហំ ៤៨MP ដែលអាចផលិតបានរូបភាពទំហំ ១២MP ដោយប្រើបច្ចេកវិទ្យា pixel binning ហើយក៏អាចថតរូបទំហំ ៤៨MP ផងដែរពេលជ្រើសរើស Mode “High-Res”។ កាមេរ៉ារបស់វាអាចចាប់យកវីដេអូកម្រិត 4K/60ps, 1080p/120fps ឬ 240fps និងវីដេអូ Timelapse កម្រិត 8K ផងដែរ។

Drone ថ្មីនេះត្រូវបានកែសម្រួលការឌីហ្សាញដោយបំពាក់នូវម៉ូទ័រថ្មី មានសមត្ថភាពជ្រែកខ្យល់ប្រសើរជាងមុន និងបច្ចេកវិទ្យាថ្មដ៏ទំនើបដែលអាចហោះហើរបានរយៈពេល ៣៤ នាទី។ ដោយប្រើប្រាស់នូវ OcuSync 2.0 អ្នកអាចបញ្ជា Drone នេះបានចម្ងាយ ១០ គីឡូម៉ែត្រ។

ក្រៅពីកែសម្រួលលើ Hardware ហើយនោះ DJI ក៏បានបញ្ចូលមុខងារឆ្លាតវៃមួយចំនួនទៅក្នុងកាមេរ៉ា និង Drone ផ្ទាល់ផងដែរ។ កាមេរ៉ារបស់ Drone នឹងប្រើប្រាស់ Machine Learning និងមុខងារចំណាំប្លង់រូបភាព ដើម្បីជ្រើសរើសដោយស្វ័យប្រវត្តិនូវជម្រើស ៣ ខាងក្រោម ៖

HDR Photo ដែលថតរូប ៧ សន្លឹកមាន Exposure ខុសៗគ្នា ចម្រាញ់ចេញជារូបភាពមួយសន្លឹកដែលមាន Dynamic Range ស្អាត
Hyperlight អាចថតរូបភាពច្រើនសន្លឹក និងបញ្ចូលរូបទាំងនោះចូលគ្នាឲ្យក្លាយជារូបតែមួយ ដែលមាន Exposure ល្អប្រសើរជាងធម្មតា និងមានគ្រាប់ Noise តិច
Scence Recognition អាចដឹងអំពីប្លង់ចំនួនប្រាំប្រភេទ មានប្លង់ថ្ងៃលិច ផ្ទៃមេឃខៀវ ស្មៅ ព្រិល និងដើមឈើ ដែលវានឹងកែសម្រួលពណ៌ និង Tone នៃរូបភាពឲ្យកាន់តែលេចធ្លោតាមប្លង់នីមួយៗ

សម្រាប់ផ្នែកសុវត្ថិភាពវិញក៏ក្រុមហ៊ុនបានកែសម្រួលឲ្យកាន់តែប្រសើរជាងមុនដែរ។ លើ Mavic Air 2 គឺមាន Sensor ដែលអាចដឹងអំពីឧបសគ្គមានបំពាក់ទាំងមុខទាំងក្រោយ ហើយមាន Sensor ជាច្រើនទៀតនៅផ្នែកខាងក្រោមដើម្បីជួយដល់ការចុះចតស្វ័យប្រវត្តិប្រព្រឹត្តទៅដោយរលូន។ វាក៏មាននូវ APAS 3.0 ដែលប្រើប្រាស់ការវាស់ផែនទីប្រភេទ 3D ដើម្បីពិនិត្យមើលឧបសគ្គជុំវិញ និងបច្ចេកវិទ្យា AirSense ដែលអាចប្រាប់ដំណឹងដល់អ្នកបញ្ជា Drone អំពីយន្តហោះដទៃដែលនៅក្បែរៗនោះ ដោយមានបង្ហាញទីតាំងយន្តហោះនៅលើអេក្រង់ឧបករណ៍បញ្ជា។

ស្តង់ដារ

Fly More

Mavic Air 2 នេះមានលក់ជាពីរឈុត ឈុតស្តង់ដារគឺមាន Drone, ថ្ម, តេឡេបញ្ជា និងខ្សែតភ្ជាប់ដែលចាំបាច់ជាមួយតម្លៃ ៧៩៩ដុល្លារ ឬឈុត Fly More ដែលមានបន្ថែមនូវកាតាបស្ពាយ, Filter ND មួយឈុត, ស្លាបមួយឈុត, ដុំសាកថ្ម និងថ្មសរុប ៣ គ្រាប់ជាមួយតម្លៃ ៩៨៨ដុល្លារ៕

ប្រភព៖ petapixel ប្រែសម្រួល៖ សុខហេង