- 2020-03-23 07:00:13
- ព័ត៌មាន
៥ ឆ្នាំមុន មហាសេដ្ឋី ២ រូបនេះ សុទ្ធតែបានព្រមានអំពីជំងឺរាតត្បាត
- 2020-03-23 07:00:13
- ចំនួនមតិ 0 | ចំនួនចែករំលែក 0
៥ ឆ្នាំមុន មហាសេដ្ឋី ២ រូបនេះ សុទ្ធតែបានព្រមានអំពីជំងឺរាតត្បាត
ចន្លោះមិនឃើញ
ការរាតត្បាតនៃកូវីដ១៩ពាសពេញពិភពលោក ធ្វើឲ្យគេនឹកដល់កាលពីពេល ៥ ឆ្នាំមុន ពេលដែលមហាសេដ្ឋីបច្ចេកវិទ្យា ២ រូប បានព្រមានអំពីជំងឺរាតត្បាត។
លោក Bill Gates
មហាសេដ្ឋីបច្ចេវិទ្យា ជាសហស្ថាបនិកក្រុមហ៊ុន Microsoft លោក Bill Gates ធ្លាប់បានព្រមានអំពីឥទ្ធិពលនៃជំងឺឆ្លងដ៏កាចសាហាវជាយូរមកហើយ។ អំឡុងសន្និសីទ TEDxVancouver កាលពីខែមីនាឆ្នាំ ២០១៥ ដែលប្រព្រឹត្តឡើងអំឡុងពេលដែលជំងឺអេបូឡានៅអាហ្រ្វិកខាងលិច លោកបានលើកឡើងថា ៖
“ប្រសិនបើមានអ្វីអាចសម្លាប់មនុស្សជាង ១០ លាននាក់ ក្នុងរយៈពេលប៉ុន្មានទសវត្សខាងមុខទៀត វាទំនងជាបណ្ដាលមកពីវីរុសឆ្លង ជាជាងសង្គ្រាម...មិនមែនគ្រាប់មីស៊ីលនោះទេ ប៉ុន្តែជាពួកមីក្រុប។ ហេតុផលនោះគឺ យើងបានចំណាយលុយច្រើនលើការបង្កើតអាវុធនុយក្លេអ៊ែរ ប៉ុន្តែពួកយើងចំណាយតិចតួចមែនទែនលើប្រព័ន្ធដើម្បីបញ្ឈប់ជំងឺរាតត្បាត។ យើងមិនទាន់ត្រៀមខ្លួនរួចរាល់សម្រាប់ជំងឺរាតត្បាតបន្ទាប់នោះទេ”។
ទន្ទឹមនឹងនោះលោក Bill Gates បានលើកឡើងថាយើងអាចត្រៀមខ្លួនសម្រាប់ជំងឺរាតត្បាតនាពេលខាងមុខដោយអនុវត្តន៍តាមវិធីសាស្ត្រខាងក្រោម ៖
“យើងអាចបង្កើតប្រព័ន្ធឆ្លើយតបដ៏ល្អមួយបាន ដោយប្រើប្រាស់បច្ចេកវិទ្យាដូចជាទូរសព្ទដើម្បីផ្ដល់ព័ត៌មានដល់មនុស្សបានលឿន និងផែនទីផ្កាយរណបបង្ហាញអំពីការផ្លាស់ទី រួមមានបច្ចេកវិទ្យាបែបជីវទំនើបដែលអាចជួយបង្កើតវ៉ាក់សាំង និងព្យាបាលរោគបានរហ័ស។”
ជាការបិទបញ្ចប់លោក Bill Gates បានថ្លែងថា ៖ "ប្រសិនបើមានរឿងល្អមួយដែលអាចកើតចេញពីការរាតត្បាតនៃជំងឺអេបូឡា នោះគឺវាអាចជាការព្រមានមួយ ជាការដាស់តឿនឲ្យគ្រប់គ្នាត្រៀមខ្លួន។”
លោក Jack Ma
ពេលនិយាយក្នុងអំឡុងកិច្ចពិភាក្សារៀបចំដោយអង្គារ Economic Club of New York កាលពីខែមិថុនាឆ្នាំ ២០១៥ លោក Jack Ma អ្នកបង្កើតក្រុមហ៊ុនលក់ទំនិញអនឡាញ Alibaba បានលើកឡើងថាសង្គ្រាមលោកលើកទី៣ ដែលមនុស្សគ្រប់គ្នាខ្លាចរអានោះនឹងកើតមាន ប៉ុន្តែសង្គ្រាមនេះមិនមែនរវាងមនុស្សនិងមនុស្សទេ។
"សង្គ្រាមលោកលើកទីបីគឺនឹងកើតមាន ហើយសង្គ្រាមនេះមិនមែនរវាងប្រទេសមួយនិងប្រទេសមួយនោះទេ។ ក្នុងសង្គ្រាមនេះ យើងនឹងចាប់ដៃគ្នាប្រយុទ្ធប្រឆាំងនឹងជំងឺ ភាពក្រីក្រ និងបម្រែបម្រួលធាតុអាកាស ហើយខ្ញុំជឿជាក់ថានេះគឺជាអនាគតរបស់ពួកយើង។" នេះជាការបញ្ជាក់របស់លោក Jack Ma នាពេលនោះ៕
