ទាំង YouTube និង Netflix ទម្លាក់កម្រិតគុណភាពវីដេអូ ព្រោះកូវីដ១៩

2020-03-23 01:42:49
ព័ត៌មាន

2020-03-23 01:42:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនផ្ដល់សេវាកម្មទស្សនាវីដេអូលើអនឡាញជាច្រើនដូចជា Netflix YouTube Apple និង Amazon បានទម្លាក់កម្រិតគុណភាពនៃវីដេអូ ដើម្បីជៀសវាងនូវការកកស្ទះល្បឿនអ៊ីនធឺណិត ខណៈពេលដែលមនុស្សកាន់តែច្រើនចាប់ផ្ដើមធ្វើការពីផ្ទះ។

Netflix ជាក្រុមហ៊ុនដំបូងគេដែលបានប្រកាសពីការទម្លាក់គុណភាពវីដេអូនៅអឺរ៉ុបរយៈពេល ៣០ ថ្ងៃ។ ការទម្លាក់គុណភាពវីដេអូអាចជួយសន្សំសំចៃអ៊ីនធឺណិតបាន ២៥% ហើយវាអាចជួយឲ្យអ៊ីនធឺណិតនៅផ្ទះដំណើរការកាន់តែរលូន អំឡុងពេលដែលកូវីដ១៩ផ្ទុះនៅអឺរ៉ុប។

បន្ទាប់ពី Netflix បណ្ដាញ YouTube ក៏បានប្រកាសពីការទម្លាក់គុណភាពវីដេអូដែរ។ ការសម្រេចចិត្តនេះគឺបន្ទាប់ពីលោក Thierry Breton ថ្នាក់ដឹកនាំនៃឧស្សាហកម្មអឺរ៉ុប បានជួបនិយាយនាយកប្រតិបត្តិ Google និង Alphabet លោក Sundar Pichai និង Susan Wojcicki នាយកប្រតិបត្តិ YouTube រួចមក។

ចំណែក Apple វិញបានប្រាប់ The Verge ថាខ្លួនក៏បានទម្លាក់គុណភាពវីដេអូសម្រាប់សេវាកម្ម Apple TV+ របស់ខ្លួនដែរ។ សេវាកម្ម Apple ត្រូវបានគេដាក់ពិន្ទុឲ្យថាមានល្បឿនលឿន រូបភាពដិតច្បាស់ ប៉ុន្តែថ្មីៗនេះគុណភាពវីដេអូលើសេវាកម្មនេះមិនដូចមុនឡើយ។

Amazon ឯណោះវិញក៏បាននិយាយថាបានកាត់បន្ថយល្បឿននៃការបញ្ជូនទិន្នន័យវីដេអូនៅអឺរ៉ុប ហើយនឹងបន្តត្រួតពិនិត្យនៅក្នុងប្រទេសដទៃទៀត។ Amazon សន្យាថានឹងសម្របខ្លួនតាមប្រសិនបើមានការស្នើសុំ។ សេវាកម្ម Amazon Prime បច្ចុប្បន្ននេះមានចំនួនអ្នកចុះឈ្មោះប្រើប្រាស់ជាង ១៥០ លាននាក់នៅទូទាំងពិភពលោក ហើយសេវាកម្ម Prime Video មាននៅប្រទេសជាង ២០០៕

ប្រភព៖ vnexpress ប្រែសម្រួល៖ សុខហេង