លោក Jack Ma ស្ថាបនិក​ក្រុមហ៊ុន​លក់​ទំនិញ​អនឡាញ Alibaba បាន​ចូល​រួម​ប្រើ​ប្រាស់​បណ្ដាញ​ទំនាក់ទំនង​សង្គម Twitter។

Tweet ដំបូង​​បំផុត​គឺ​លោក Jack Ma បាន​បង្ហោះ​រូបភាព​នៃ​យន្តហោះ China Eastern Airlines ដែល​មាន​ដឹក​ប្រអប់​នៃ​ម៉ាស់​ និង​ឧបករណ៍​តេស្ត​វីរុស​កូរ៉ូណា​ ទៅ​កាន់​សហរដ្ឋអាមេរិក​ ពី​ទីក្រុង​សៀងហៃ។ លោក Jack Ma បាន​សរសេរ​ថា ៖ "ការ​ដឹក​ជញ្ជូន​លើក​ដំបូង​នៃ​ម៉ាស់​ និង​ឧបករណ៍​តេស្ត​វីរុស​កូរ៉ូណា​​ទៅ​កាន់​សហរដ្ឋអាមេរិក គឺ​កំពុង​ហោះ​ចេញ​ពី​សៀងហៃ។ ជូនពរ​សំណាង​ល្អ​មិត្តៗ​នៅ​អាមេរិក។”

គួរ​ដឹង​ថា​​មូលនិធិ Jack Ma Foundation និង​ Alibaba Foundation បាន​ប្រកាស​កាល​ពី​ថ្ងៃ​សុក្រ​សប្ដាហ៍​កន្លង​ទៅ​ថា​ ពួក​គេ​បាន​ត្រៀម​ឧបករណ៍​តេស្ត​វីរុស​កូរ៉ូណា​ចំនួន ៥០ ម៉ឺន​គ្រឿង និង​ម៉ាស់​មុខ​ចំនួន ១លាន​ម៉ាស់ សម្រាប់​ផ្ញើ​ទៅ​កាន់​សហរដ្ឋអាមេរិក ដែល​មូលនិធិ​ទាំង​ពីរ​​ក៏​ធ្លាប់​បាន​ផ្ដល់​ជំនួយ​ដល់​ជប៉ុន កូរ៉េ​ខាង​ត្បូង អ៊ីតាលី អ៊ីរ៉ង់ និង​អេស្ប៉ាញ​ផង​ដែរ៕​