មកស្គាល់កម្មវិធីទូរសព្ទ ២ របស់កូរ៉េ អាចឲ្យគេជៀសផុតពីតំបន់ផ្ទុះវីរុសកូរ៉ូណា

2020-03-03 03:26:16
ព័ត៌មាន

2020-03-03 03:26:16
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃអាទិត្យប្រទេសកូរ៉េខាងត្បូងបានរាយការណ៍អំពីករណីថ្មី ៨១៣ ករណី ជាកំណត់ត្រាខ្ពស់បំផុតមួយសម្រាប់ប្រទេសនេះ។ ឆ្លើយតបនឹងវីរុសនេះដែរ អ្នកបង្កើតកម្មវិធីមួយចំនួនបានបង្កើតកម្មវិធី ដែលអាចឲ្យគេដឹងព័ត៌មានអំពីវីរុសកូរ៉ូណា និងទីតាំងដែលកើតមានវីរុសនេះ។

កម្មវិធី Corona 100m បានដាក់ដំណើរការនៅថ្ងៃទី ១១ ខែកុម្ភៈ ហើយមកទល់ពេលនេះមានចំនួនទាញយកដល់ជាង ១ លានដង។ នេះបើតាមការចុះផ្សាយរបស់ CNN Business។

កម្មវិធីនេះប្រមូលទិន្នន័យពីរដ្ឋបាលសាធារណៈ រួមមានមជ្ឈមណ្ឌលគ្រប់គ្រងជម្ងឺឆ្លងរបស់កូរ៉េ ដើម្បីបង្ហាញអំពីកាលបរិច្ឆេទដែលអ្នកជំងឺម្នាក់ឆ្លងវីរុសកូរ៉ូណា រួមជាមួយសញ្ជាតិ អាយុ ភេទ និងទីកន្លែងដែលគេបានទៅដល់ផងដែរ។

ប្រសិនបើអ្នកប្រើប្រាស់កម្មវិធីនេះស្ថិតនៅចម្ងាយ ១០០ ម៉ែត្រ ពីទីកន្លែងដែលមានមនុស្សឆ្លងវីរុសកូរ៉ូណាបានទៅដល់នោះ គេនឹងទទួលបានការឲ្យដំណឹង (Notification) ព្រមានតែម្ដង ដែលដូចជាឈ្មោះរបស់កម្មវិធីនេះអ៊ីចឹង។

អ្នកបង្កើតកម្មវិធីនេះដែលមានឈ្មោះ Bae Won-Seok និយាយថាកម្មវិធីនេះបន្តរីកធំ ដោយរៀងរាល់មួយម៉ោងមានការទាញយក ២ ម៉ឺនដង ហើយពេលខ្លះគាំងដោយសារមានចំនួនទាញយកច្រើនពេក។

មានមួយទៀតគឺកម្មវិធី Corona Map ដែលវាក៏ចាប់ទីតាំងរបស់អ្នកដែលឆ្លងវីរុសកូរ៉ូណាផងដែរ ហើយបានក្លាយជាកម្មវិធីដែលមានគេទាញយកច្រើនជាងគេនៅកូរ៉េខាងត្បូង កាលពីថ្ងៃពុធ។