Mara X/Z ស្មាតហ្វូនដំបូងផលិតនៅទ្វីបអាហ្វ្រិក ដាក់គោលដៅចង់ប្រជែង Samsung

2019-10-09 01:36:18
ព័ត៌មាន

2019-10-09 01:36:18
ចំនួនមតិ 0 | ចំនួនចែករំលែក 0

ចន្លោះមិនឃើញ

Mara Group បានចេញផ្សាយនូវស្មាតហ្វូនចំនួនពីរម៉ូឌែលនៅថ្ងៃចន្ទកន្លងទៅនេះ ដែលតាំងនាមថាជាស្មាតហ្វូនដំបូងដែលផលិតនៅទ្វីបអាហ្វ្រិក។ ក្រុមហ៊ុនមានមូលដ្ឋានក្នុងប្រទេសរវ៉ាន់ដាមានមហិច្ឆតាចង់បង្កើនសក្ដានុពលបច្ចេកវិទ្យាក្នុងស្រុក ក៏ដូចជាប្រជែងនឹងក្រុមហ៊ុនក្រៅស្រុកដូចជា Samsung ជាដើម។

ម៉ូឌែល Mara X មានតម្លៃ ១៩០ ដុល្លារ ខណៈ Mara Z មានតម្លៃ ១៣០ ដុល្លារ សុទ្ធសឹងដំណើរការលើប្រព័ន្ធ Android ដោយនឹងប្រកួតប្រជែងជាមួយប្រភេទស្មាតហ្វូនតម្លៃធូរចាប់ពី ៥៤ ដុល្លាររបស់ Samsung និងខ្ទង់ ៣៧ ដុល្លាររបស់ស្មាតហ្វូនគ្មានយីហោច្បាស់លាស់។

នាយកប្រតិបត្តិនៃក្រុមហ៊ុន Mara Group លោក Ashish Thakkar បានប្រាប់ Reuter ថា៖ "នេះជាស្មាតហ្វូនដំបូងដែលផលិតនៅទ្វីបអាហ្រ្វិក ហើយក្នុងដំណើរការផលិតកម្មយើងក៏ជាអ្នកបង្កើតនូវបន្ទះ Motherboard និង Sub-board ផងដែរ"។ ដំណើរការផលិតបានបោះទុនប្រមាណ ២៤ លានដុល្លារអាមេរិក ដោយក្នុងមួយថ្ងៃអាចផលិតស្មាតហ្វូនបាន ១ ២០០ គ្រឿង។

Mara Group ក៏សង្ឃឹមលើការទាញផលចំណេញត្រលប់មកវិញ តាមរយៈកិច្ចព្រមព្រៀងនៃការធ្វើពាណិជ្ជកម្មសេរីនៅឧបទ្វីបអាហ្វ្រិក ដែលមានការចូលរួមពី ៥៥ ប្រទេស ដោយការធ្វើពាណិជ្ជកម្មនេះនឹងបើកដំណើរការចាប់ពីខែកក្កដា ឆ្នាំ ២០២០ តទៅ បន្ថែមនឹងឆន្ទៈបង្រួបបង្រួមមនុស្សប្រមាណ ១,៣ ពាន់លាននាក់ និងការបង្កើតប្លុកសេដ្ឋកិច្ចនូវទំហំទឹកប្រាក់ខ្ទង់ ៣,៤ ទ្រីលានដុល្លារ៕

អានអត្ថបទ:

ប្រភព៖ gadgets.ndtv ប្រែសម្រួល៖ កៅ រក្សា