Huawei បាន​ជាប់​ឈ្មោះ​នៅ​ក្នុង​បញ្ជី​ខ្មៅ​របស់​រដ្ឋបាល​លោក​ដូណាល់ ត្រាំ កាល​ពី​ដើម​ឆ្នាំ​នេះ ដែល​ឃាត់​មិន​ឲ្យ​ក្រុមហ៊ុន​អាមេរិក​នានា​​ធ្វើ​​ការ​រក​ស៊ី​ជា​មួយ Huawei។ Google បាន​បង្ហាញ​កាល​ពី​ខែ​មុន​ថា​ ការ​​មាន​ឈ្មោះ​ក្នុង​បញ្ជី មាន​ន័យ​ថា​​ក្រុមហ៊ុន​មិន​អាច​អនុញ្ញាត​ឲ្យ Huawei ចេញ​លក់ Mate 30 ជា​មួយ​កម្មវិធី និង​សេវាកម្ម​ Google ដំឡើង​ស្រាប់​បាន​នោះ​ទេ។

ពេល​នេះ Huawei បាន​បញ្ជាក់​អំពី​ករណី​នេះ​ជា​ផ្លូវ​ការ។ លោក Richard Yu នាយក​ប្រតិបត្តិ​ផ្នែក​ផលិតផល​នៅ​ Huawei បាន​បង្ហាញ​នៅ​លើ​ឆាក​ក្នុង​កម្មវិធី​នៅ​​អាល្លឺម៉ង់​កាល​ពី​យប់​មិញ​​ថា​ ​ក្រុមហ៊ុន​ត្រូវ​បាន​បង្ខំ​ឲ្យ​បោះ​បង់​អាជ្ញាប័ណ្ណ​​ Google's Mobile Services (GMS) នៅ​លើ​ត្រកូល​ Mate 30។

លោក​បាន​បញ្ជាក់​ដូច​នេះ​ថា ៖ "យើង​មិន​អាច​ប្រើ​ប្រាស់​ Google Mobile Services, យើង​អាច​ប្រើ​ Huawei Mobile Services។ ថ្ងៃ​នេះ​ព្រោះ​តែ​ការ​ហាម​ឃាត់​របស់​​អាមេរិក ធ្វើ​ឲ្យ​ស្មាតហ្វូន​ទាំង​នេះ​មិន​អាច​ដំឡើង​​មក​ស្រាប់​នូវ GMS ហើយ​វា​បាន​បង្ខំ​ពួក​គេ​ឲ្យ​ប្រើ HMS ​សម្រាប់​ដំណើរ​ការ​ Huawei App Gallery នៅ​លើ​ត្រកូល Mate 30។”

​​គួរ​ដឹង​ថា​ Play Store របស់​ Google គឺ​ជា​ផ្នែក​សំខាន់​មួយ​នៃ​​អាជ្ញាប័ណ្ណ​ Google Mobile Service ហើយ​វា​​វិធី​​មួយ​ដែល​ស្មាតហ្វូន Android នៅ​ក្រៅ​ប្រទេស​ចិន អាច​ចូល​ដំឡើង​កម្ម​វិធី​បាន។ Huawei មិន​អាច​ដោះ​ស្រាយ​លើ​បញ្ហា​នេះ​ដោយ​ងាយ​ស្រួល​នោះ​ទេ ហេតុ​នេះ​ក្រុមហ៊ុន​បាន​​បង្កើត​នូវ​​សេវាកម្ម​ដែល​អាច​ជំនួស​ Play Store។ Huawei បាន​ប្រើ​ប្រាស់​ការ​បណ្ដាក់​ទុន ១ ពាន់​លាន​ដុល្លារ សម្រាប់​ផ្គត់ផ្គង់​ដល់​ការ​អភិវឌ្ឍ, បង្កើន​ចំនួន​អ្នក​ប្រើ និង​ផ្សព្វផ្សាយ​នូវ​ Huawei Mobile Services របស់​ខ្លួន។

មាន​កម្មវិធី​ប្រមាណ ៤៥ ០០០ កម្មវិធី​​បាន​បញ្ចូល​ក្នុង​ Huawei Mobile Services រួច​ទៅ​ហើយ ប៉ុន្តែ​នឹង​មាន​រាប់​ពាន់​កម្មវិធី​ទៀត​នឹង​ត្រូវ​ធ្វើ​ការ​កែ​សម្រួល​ ដើម្បី​អាច​ដាក់​បញ្ចូល​ទៅ​ក្នុង​ App Gallery ​របស់​ Huawei បាន។ វា​ជា​កិច្ច​ការ​ធំ​មួយ​​ដើម្បី​ធ្វើ​ឲ្យ​អ្នក​អភិវឌ្ឍ​កម្មវិធី​ជួយ​ទ្រាំទ្រ​ដល់ Store កម្មវិធី​របស់​ខ្លួន​ប៉ុន្តែ​ក្រុមហ៊ុន​មិន​មាន​វិធី​ផ្សេង​នោះ​ទេ។

យ៉ាងណាក្ដី​មាន​ក្ដី​រំពឹង​ថា​ការ​ហាម​ឃាត់​របស់​អាមេរិក អាច​ត្រូវ​ដក​ចេញ ឬ Huawei អាច​រក​វិធី​ផ្សេង​ដោះ​ស្រាយ​លើ​ការ​រឹត​បន្តឹង​នេះ។ Reuters បាន​ចុះ​ផ្សាយ​ថា​ ៖ "Huawei នឹង​ផ្ដល់​នូវ​ Interface ផ្ទាល់​ខ្លួន​មួយ ដែល​អនុញ្ញាត​ឲ្យ​អ្នក​ប្រើ​ប្រាស់​ប្រើ​កម្មវិធី Google មួយ​ចំនួន​បាន។​”

គួរ​ដឹង​ថា​​ក្រុមហ៊ុន​ Meizu ធ្លាប់​បាន​បញ្ចេញ​​លក់​ផលិតផល​នៅ​អឺរ៉ុប ជា​មួយ​នឹង​ App Store ផ្ទាល់​ខ្លួន​របស់​ក្រុមហ៊ុន​ ដែល​ក្នុង​នោះ​មាន​កម្មវិធី​​មួយ​ឈ្មោះ​ថា "Google Installer” ដែល​អាច​ដំឡើង​សេវាកម្ម​ Google និង Play Store ដាក់​លើ​ទូរសព្ទ​បាន។ ប៉ុន្តែ Google បាន​​បញ្ចេញ​នូវ​​ការ​ទាមទារ​ថ្មី ដើម្បី​​ដោះ​ស្រាយ​លើ​ចំណុច​នេះ ហើយ​ក្រុមហ៊ុន​បាន​សាក​ល្បង​ធ្វើ​ការ​ Block ឧបករណ៍​ដែល​មិន​មាន​សិទ្ធ​​​​ពី​ការ​ប្រើ​កម្មវិធី និង​សេវាកម្ម​របស់​ខ្លួន៕​

ចុចអាន ៖ Huawei Mate 30 Pro ចេញជាផ្លូវការ មានកាមេរ៉ា 40MP ដល់ពីរគ្រាប់