សេរ៊ី​ក្រោយ Galaxy S10+ របស់ Samsung មាន​ផ្ទុក​ថាមពល​ថ្ម​ធំ​ទំហំ ៤ ១០០ mAh ធៀប​នឹង iPhone XS Max ទំហំ ៣ ១៧៤mAh។ តើ​ទំហំ​ខុស​គ្នា​ជិត ១ ០០០ mAh នេះ អាច​ធ្វើ​ឲ្យ​ស្មាតហ្វូន​ទាំង​ពីរ​មាន​ថាមពល​ថ្ម​ប្រើប្រាស់​បាន​យូរ​ជាង​គ្នា​កម្រិត​ណា?

មិន​ទុក​យូរ ចម្លើយ​ក៏​ត្រូវ​បាន​ក្រុម​ការងារ PhoneBuff លាត​ត្រដាង​ឡើង តាម​រយៈ​ការ​ប្រើប្រាស់​ឧបករណ៍​ដៃ​សិប្បនិមិត្ត​តេស្ត​ពី​ខាង​ក្រៅដោយ​ផ្ទាល់ លើ​ដំណើរការ​កម្មវិធី-ហ្គេម​ផ្សេង​ពី​គ្នា​ម្តង ១ ម៉ោង។

បញ្ជាក់​ថា S10+ បំពាក់​អេក្រង់ sAMOLED ទំហំ ៦,៤ អ៊ីញ កម្រិត ៣ ០៤០ x ១ ៤៤០ ភីកសែល ​អម​បន្ទះ​ឈីប Snapdragon 855 និង​រត់​លើ Android 9 Pie ស្រប​ពេល​គូ​ប្រជែង XS Max ​បំពាក់​អេក្រង់ ៦,៥ អ៊ីញ OLED កម្រិត​បង្ហាញ ២ ៦៨៨ x ១ ២៤២ ភីកសែល ដោយ​មាន​ឈីប A12 Bionic ​និង​រត់​លើ iOS 12។

ទស្សនា​វីដេអូ​ខាង​ក្រោម៖

ជា​លទ្ធផល​បង្ហាញ​យ៉ាង​ជាក់​ច្បាស់​ថា​ Galaxy S10+ អាច​ធ្វើ​បាន​ល្អ​ជាង ដោយ​តេស្ត​ដល់​ដំណាក់​កាល​ចុង​ក្រោយ​នៃ​កម្មវិធី Spotify ធុន​ក្រោយ​របស់ Apple ក៏​រលត់​ម៉ាស៊ីន​ឈឹង តែ S10+ នៅ​តែ​អាច​បើក​ដំណើរការ​បាន​រយៈ​ពេល ១ ម៉ោង​ពេញ។ សរុប​រួម S10+ ចុច​ប្រើ​សុទ្ធ​បាន​រយៈ​ពេល ៨ ម៉ោង និង ៥៩ នាទី ជាមួយ​ថេរវេលា Standby ១៦ ម៉ោង ស្រប​ពេល XS Max ​កាន់​បាន​ត្រឹម ៨ ម៉ោង និង ០០ នាទី ត្បិត​អី​អាច Standby រយៈ​ពេល ១៦ ម៉ោង​ដូច​គ្នា។