មកមើល Range Rover Sport HST ថ្មីប្រភេទ Hybrid កម្លាំងខ្លាំងមិនធម្មតា

2019-02-13 08:41:08
ព័ត៌មាន

2019-02-13 08:41:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនផលិតរថយន្តអង់គ្លេស Jaguar Land Rover គ្រោងនឹងបញ្ចេញរថយន្តថ្មីរបស់ខ្លួន Range Rover Sport HST ដែលនឹងដំណើរការដោយម៉ាស៊ីនប្រភេទ Mile-Hybrid ដំបូងបង្អស់របស់ខ្លួន លើសង្វាក់ផលិតកម្មយានយន្ត។ ម៉ាស៊ីនដែលនឹងបំពាក់មកជាមួយនឹង Range Rover Sport HST នេះ ជាប្រភេទ I មានស៊ីឡាំង ៦ (I6) ប្រភេទសាំង ដែលអាចផលិតកម្លាំងបាន ៣៩៥ សេះ និងកម្លាំងរមួលបាន ៥៥០ ញ៉ូតុនម៉ែត្រ។ ម៉ាស៊ីនប្រភេទ I6 ថ្មីនេះ បានចូលមកជំនួសម៉ាស៊ីន V6 ចាស់របស់ខ្លួន ដោយសារតែការបំពាក់នូវ Supercharger ប្រភេទអគ្គិសនីពិសេស និង Twin-Scroll Turbocharger។

តាមការលើកឡើងរបស់ក្រុមហ៊ុន មុខងារ Electric Supercharger នេះ ដើរដោយម៉ូទ័រអគ្គិសនី ដែលអាចបង្កើតរង្វិលបានដល់ ១២០ ០០០ ជុំក្នុងមួយនាទី (RPM) ក្នុងរយៈពេលត្រឹមតែ កន្លះវិនាទីតែប៉ុណ្ណោះ។ ម៉្យាងវិញទៀត Electric Supercharger នេះ នឹងបំបាត់នូវភាពយឺតយ៉ាវក្នុងការជួយម៉ាស៊ីន របស់ turbocharger ផងដែរ ដោយជាលទ្ធផលវានឹងកាត់បន្ថយ ការបញ្ចេញឧស្ម័នកាបូនិក ពីម៉ាស៊ីនប្រភេទ V6 ចាស់បានដល់ទៅ ១២ ភាគរយ ហើយកាត់បន្ថយការបញ្ចេញឧស្ម័នភាគល្អិតនានា បានដល់ទៅ ៧៥ ភាគរយឯណោះ។ Ranger Rover Sport HST ថ្មីនេះ មានអត្រាស៊ីសាំងទាប ត្រឹម ៩,៣ លីត្រ/១០០ គ.ម ប៉ុណ្ណោះ។

ក្រៅពីម៉ាស៊ីន Electric Supercharger នេះ Range Rover Sport HST ក៏នៅមានប្រព័ន្ធអាគុយ ៤៨ វ៉ុលថែមទៀត ដែលបនប្រើសម្រាប់សាកភ្លើងពេលកំពុងធ្វើដំណើរ អាចផ្ដល់កម្លាំងរមួលបន្ថែមដល់ការបើកបរ និង ជាប្រភពសម្រាប់ធ្វើការ បញ្ឆេះរថយន្តផងដែរ។ លោក Nick Rogers នាយកប្រតិបត្តិ ផ្នែកវិស្វកម្មផលិតផលរបស់ Jaguar Land Rover បានលើកឡើងថា ៖ “ម៉ាស៊ីនប្រភេទ I ជាម៉ាស៊ីនដែលមានលំនឹងល្អ បើប្រៀបទៅនឹងម៉ាស៊ីនប្រភេទ V ហើយតួខ្លួនថ្មីប្រភេទ Ingenium ក៏មាននាទីសំខាន់ក្នុងការរក្សាលំនឹងរថយន្តផងដែរ។ មុខងារសំខាន់ៗ ដូចជា Electric Supercharger នឹងធ្វើឲ្យដំណើរការរបស់រថយន្តខ្លាំងក្លា ដូចឈ្មោះ Range Rover Sport ដែលគេធ្លាប់ស្គាល់ ហើយប្រព័ន្ធវៃឆ្លាត MHEV នឹងជួយប្រមូលថាមពលបន្ថែម ដើម្បីកាត់បន្ថយការស៊ីសាំង និងធ្វើឲ្យការបញ្ចេញជាតិពុលថយចុះផងដែរ ” ។