ត្រៀមប្រកួតរ៉ូបូតថ្នាក់ជាតិ ស្វែងរកជើងខ្លាំងទៅប្រទេសម៉ុងហ្គោលី

2019-01-03 02:30:51
ព័ត៌មាន

2019-01-03 02:30:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតប្រជែងរ៉ូបូតថ្នាក់ជាតិឬហៅថា Robocon Cambodia លើកទី៦ ឆ្នាំ ២០១៩ នឹងត្រូវប្រព្រឹត្តិទៅនៅថ្ងៃសៅរ៍ ទី ២៧ ខែមេសា ឆ្នាំ ២០១៩ នាសាលដំបូលទូកសាកលវិទ្យាល័យភូមិន្ទភ្នំពេញ។

សកម្មភាពពេលកំពុងប្រកួតកាលឆ្នាំ ២០១៨ រូបភាព៖ Robocon Cambodia

ជាមួយគោលការណ៍នៃការប្រកួតកាន់តែពិសេសជាងឆ្នាំមុនៗ មានការប្រកួតប្រជែងរវាងក្រុមនិងក្រុម ស្ថិតក្រោមប្រធានបទ «ការជិះសេះកាន់ផ្លាកបញ្ជា» ជាការដកស្រង់ចេញពីប្រពៃណីរបស់ប្រទេសម៉ុងហ្គោលី។

លក្ខខណ្ឌនៃការប្រកួតមានក្រុមនឹងក្រុម (ក្រុមពណ៌ខៀវ ប្រកួតនឹងក្រុមពណ៌ក្រហមលើទីលានតែមួយ ដែលបែងចែកទីតាំងគ្នា)។ ក្រុមនិមួយៗត្រូវផលិតរ៉ូបូតចំនួន ២ មួយដើរដោយការបញ្ជា មួយដើរដោយស្វ័យប្រវត្តិ (រ៉ូបូតផលិតចំណាយពេលប្រហែល៤ខែ) ។

រ៉ូបូតទាំង២ ត្រូវសហការគ្នា ឆ្លងកាត់ឧបសគ្គជាច្រើនដូចជាការឆ្លងកាត់ព្រៃ ស្ពាន ដំបូកខ្សែពួរ ការបោះ Shagai និងឡើងលើភ្នំ ដើម្បីយកផ្លាកបញ្ជាទៅដល់គោលដៅបានបញ្ចប់មុនគេ ដើម្បីក្លាយជាអ្នកឈ្នះ។ បញ្ជាក់ដែរថា កាលពីឆ្នាំ ២០១៨ ការប្រកួតគឺជាលក្ខណៈគប់បាល់ចូលក្នុងកង។

សកម្មភាពពេលកំពុងប្រកួតកាលឆ្នាំ ២០១៨ រូបភាព៖ Robocon Cambodia

ក្រុមដែលឈ្នះក្នុងការប្រកួតប្រជែងឆ្នាំនេះ នឹងត្រូវតំណាងកម្ពុជាទៅចូលរួមក្នុងព្រឹត្តិការណ៍រ៉ូបូតប្រចាំតំបន់អាស៊ីប៉ាស៊ីភិក គឺ ABU Robocon ដែលរៀបចំនៅចុងខែសីហា នៅប្រទេសម៉ុងហ្គោលី។

ការប្រកួតប្រជែងរ៉ូបូត Robocon Cambodia នឹងមានការចូលរួមពីក្រុមចំនួន ១០ មកពីសាកលវិទ្យាល័យ និងវិទ្យាស្ថានចំនួន ៥ ដូចជា សាកលវិទ្យាល័យភូមិន្ទភ្នំពេញ សាកលវិទ្យាល័យជាតិគ្រប់គ្រង វិទ្យាស្ថានបច្ចេកវិទ្យាកម្ពុជា វិទ្យាស្ថានជាតិពហុបច្ចេកទេសកម្ពុជា និងវិទ្យាស្ថានពហុបច្ចេកទេសព្រះកុសុមៈ៕