IT មិនមែនជាជំនាញផ្តាច់មុខ សម្រាប់តែបុរសទេ?

2018-09-19 06:29:46
ព័ត៌មាន

2018-09-19 06:29:46
ចំនួនមតិ 0 | ចំនួនចែករំលែក 0

ចន្លោះមិនឃើញ

បើទោះបីជា IT មានទីផ្សារ ប៉ុន្តែមុខវិជ្ជាមួយនេះ មិនអាចអន្ទងចិត្តនិស្សិតស្រី ឱ្យមករៀនបានឡើយ ដោយពួកគេភាគច្រើន ងាកទៅសិក្សា ជំនាញគណនេយ្យ ធនាគារ គ្រប់គ្រង ច្បាប់ និងជំនួញជាដើម។ ហេតុអ្វីបានជាខ្សត់នារីបែបនេះ?

កញ្ញា សុវណ្ណមុនីនុត កំពុងផ្ដល់បទសម្ភាសន៍

កញ្ញា សុវណ្ណមុនីនុត និស្សិតផ្នែកវិទ្យាសាស្ត្រកុំព្យូទ័រ (Computer Sience) នៃសាកលវិទ្យាល័យន័រតុន បានប្រាប់ថា ក្នុងមួយថ្នាក់ដែលកញ្ញារៀនរ មាននិស្សិតស្រីតែ ៦នាក់ប៉ុណ្ណោះ ក្នុងចំណោម ២០នាក់។

ឆ្លើយនឹងសំណួរថាតើ ហេតុអ្វីបានជាខ្សត់នារីបែបនេះ? និស្សិតដែលនឹងឈានចូលឆ្នាំទី៣ឆាប់ៗខាងមុខ និយាយថា ប្រហែលជាពួកគេគិតមុខវិជ្ជានេះលំបាកខ្លាំង និងសម្រាប់តែបុរសតែប៉ុណ្ណោះ។

សុវណ្ណមុនីនុត ទទួលស្គាល់ IT ពិតជាលំបាកខ្លាំង ប៉ុន្តែកញ្ញាថា គ្មានមុខវិជ្ជាណា ដែលងាយស្រួលឡើយ បើខ្លួនឯងមិនខំប្រឹង។

“ផ្នែក IT មិនមែនសម្រាប់ប្រុសៗទេ វាក៏ជាមុខវិជ្ជាសម្រាប់ស្រីៗដែរ។ ប្រុសៗអាចធ្វើបាន យើងក៏អាចធ្វើបាន"។

សុវណ្ណមុនីនុត មើលឃើញថា IT ជាជំនាញមានទីផ្សារ ហើយស្រីៗមានអាទិភាពជាងបុរស បើសិនមានចំណេះប្រហាក់ប្រហែលគ្នា។ អនាគតកញ្ញា ចង់ក្លាយជា Web Developer។

យុវតី ស្រេន ណាស៊ីម៉ះ រៀនផ្នែក Computer Sience

មិនខុសគ្នាប៉ុន្មានឡើយ យុវតីផ្នែក Computer Sience ស្រេន ណាស៊ីម៉ះ លើកឡើងថា កញ្ញាបានពុះពារសុំឪពុកម្ដាយ រៀន IT ខណៈលោកទាំងពីរ មិនយល់ស្រប ប៉ុន្តែក្រោយមានការពន្យល់ ពីចំណង់ចំណូលចិត្ត និងទីផ្សារការងារ ទើបពួកគាត់អនុញ្ញាត។

ណាស៊ីម៉ះ ប្រាប់ថា វាជាជំនាញពិបាក ដោយត្រូវការអនុវត្ត និងស្រាវជ្រាវច្រើន។ យុវតី ចង់ក្លាយជាអ្នកបង្កើតកម្មវិធី នាថ្ងៃអនាគត។

ចំណែកយុវតីសម្បុរសជាកូនចៅចិន ហួយលីង ដែលចូលចិត្តហ្គេមតាំងពីថ្នាក់ទី៦ ចង់ក្លាយជាអ្នកបង្កើតហ្គេម បង្កើត App និង Software។

កញ្ញាថា៖ "ក្រុមហ៊ុនណាក៏ត្រូវការអ្នកចេះ IT បើចេះ ស្រីៗច្បាស់មានអាទិភាពជាងបុរសជាមិនខាន"។

ទោះបីជាយ៉ាងណា យុវតីរូបនេះ ហាក់ខុសប្លែកពីនិស្សិតស្រីផ្សេងបន្តិច ព្រោះកញ្ញា មានការជ្រោមជ្រែង និងលើកទឹកចិត្តឱ្យរៀន IT ជំនាញ Computer Sience ដោយពួកគេយល់ឃើញថា បើស្ត្រីមានចំណេះផ្នែកនេះ អាចនឹងមានឧកាសការងារ បើធៀបនឹងជំនាញផ្សេងៗ។ បច្ចុប្បន្នកញ្ញាជានិស្សិតឆ្នាំទី៤។

សាស្ត្រាចារ្យ ឈឿង រចនា ប្រធានផ្នែកកុំព្យូទ័រវិទ្យា

និស្សិតស្រីភាគច្រើន មានផ្នត់គំនិតថា ផ្នែកវិទ្យាសាស្ត្រទាំងអស់ ជាជំនាញ និងការងារ សម្រាប់តែនិស្សិតប្រុសៗដូចជា សំណង់ ស្ថាបត្យកម្ម អគ្គិសនី ជាពិសេសផ្នែកកុំព្យូទ័រ ដែលហាត់កាត់ថា “IT ឬ ICT” ។ នេះបើតាមការលើកឡើងរបស់ សាស្ត្រាចារ្យ ឈឿង រចនា ប្រធានផ្នែកកុំព្យូទ័រវិទ្យា នៃសាកលវិទ្យាល័យន័រតុន។

លោកសាស្ត្រាចារ្យថា ៖"និស្សិតស្រីខ្លះអត់ចូលចិត្តរៀនផ្នែកវិទ្យាសាស្ត្រ សំណង់ ស្ថាបត្យកម្ម អគ្គិសនី និងផ្នែកកុំព្យូទ័រទេ គឺរៀនតាមគេប្រាប់ដូចជាជំនាញ គណនេយ្យ ទីផ្សារ ហិរញ្ញវត្ថុ គ្រប់គ្រង ភាសាបរទេស ដែលជំនាញទាំងនោះមិនមែនជាមុខវិជ្ជា ឬជំនាញពិតប្រាកដ ដែលចេញពីឆន្ទៈ និងបេះដូង។ និយាយឱ្យចំរៀនតាមគ្នា ឃើញគេរៀនអីចឹងបានការងារធ្វើ រៀនតាមគេ"។

លោកសាស្ត្រាចារ្យ បន្ថែមទៀតថា បើមាននិស្សិតស្រីច្រើន ចូលចិត្តរៀនផ្នែកព័ត៌មានវិទ្យា នេះគឺជាការផ្លាស់ប្ដូរផ្នត់គំនិតថ្មី។ មិនតែប៉ុណ្ណោះ និស្សិតស្រីចុះឈ្មោះរៀន IT គឺមានការលើកទឹកចិត្ត ផ្ដល់ជាអាហារូបករណ៍ អាទិភាពខ្ពស់ក្នុងតម្លៃសិក្សាសមរម្យ មានទីផ្សារការងារ ទាំងវិស័យរដ្ឋ និងឯកជន។

បើចេះខ្លាំងក្នុងផ្នែកព័ត៌មានវិទ្យា សាស្ត្រាចារ្យ ឈឿង រចនា អះអាងថា បើពួកគេ (ទាំងបុរសនិងស្ត្រី) ក៏អាចមានឱកាសធ្វើការនៅក្រៅប្រទេសដែរ។

ងាកពីព័ត៌មានក្នុងស្រុក ចូលទៅឆាកអន្តរជាតិវិញម្ដង។ បើតាមការចុះផ្សាយរបស់គេហទំព័រ Cnbc កាលពីឆ្នាំ២០១៥ លោក Jack Ma បានអះអាងថា ស្ត្រីជាកម្លាំងការងារដ៏អស្ចារ្យធ្វើឱ្យ Alibabaជោគជ័យ។ លោកថា ៣៤% ជាអ្នកគ្រប់គ្រងជាន់ខ្ពស់ (១ភាគ៣ជាដៃគូ) និងច្រើនជាង ៤០% ជាស្ត្រី។

បើក្រឡេកមកមើលភរិយារបស់មហាសេដ្ឋី Bill Gates លោកស្រី Melinda Ann Gates ឯណេះវិញ។ កាលពីឆ្នាំ២០១៦ លោកស្រីថា ចង់ឱ្យមានស្ត្រីធ្វើការខាងបច្ចេកវិទ្យាឱ្យបានច្រើន។

លោកស្រី Melinda និយាយថា ៖" មានស្ត្រីបញ្ចប់ការសិក្សាតិចតួចណាស់ក្នុងវិស័យបច្ចេកវិទ្យា។ នោះគឺមិនល្អទេសម្រាប់សង្គម។ យើងត្រូវតែផ្លាស់ប្ដូរវា"៕

អត្ថបទ៖ អ៊ុំ សុភក្តិ