កាមេរ៉ា Olympus មួយគ្រឿងនេះ តូចស្អាត ទាន់សម័យ ហើយបត់អេក្រង់ចុះក្រោមបានទៀត

2018-02-17 02:01:05
ផលិតផលថ្មី

2018-02-17 02:01:05
ចំនួនមតិ 0 | ចំនួនចែករំលែក 0

ចន្លោះមិនឃើញ

OLympus PEN E-PL9 ជាកាមេរ៉ា Mirrorless ជំនាន់ចុងក្រោយរបស់ក្រុមហ៊ុន បន្ទាប់ពី ម៉ូដែល Olympus PEN E-PL7 និង Olympus PEN E-PL8។ វារចនាឡើង ក្នុងការផ្ដល់ជម្រើសដល់អ្នកថតរូប ចូលចិត្តកាន់កាមេរ៉ាស្អាតៗ ដោយមានទំហំតូច ស្រាល និងអាចផ្លាស់ប្ដូរ Lens បាន។

កាមេរ៉ានេះអាចប្រើជាមួយ Lens ប្រភេទ Micro Four Thirds ទំហំធំបាន។ ម្យ៉ាងទៀត អាចនឹងធ្វើឲ្យអ្នកប្រើប្រាស់និយមថតរូបនឹងទូរសព្ទ ប្ដូរចិត្តបាន ដោយផលិតរូបភាពច្បាស់ល្អ និងអាចលេងបានច្រើនលើ Manual Controls។

ចំពោះកាមេរ៉ានេះ ក្រុមហ៊ុន Olympus តម្រង់ឃើញទីផ្សារពី Blogger និង Storyteller ដែលត្រូវការកាមេរ៉ាតូច និងមានសមត្ថភាពផលិតរូបភាពបានល្អ ដោយចំណាយពេលវេលាតិចក្នុងការកំណត់ Settings ។

កាមេរ៉ា Olympus PEN E-PL9 អាចទម្លាក់អេក្រង់ចុះក្រោមមើលសកម្មភាពបាន និងមានជម្រើស Settings ស្វ័យប្រវត្តិមួយចំនួន។ នៅផ្នែកខាងលើ កាមេរ៉ាមាន Advanced Photo (AP) និង Scene (SCN) mode ដែលងាយស្រួលប្រើ និងរហ័ស ជាងកាមេរ៉ា PEN ពីមុន។

ចំណុចខុសគ្នាមួយទៀត កាមេរ៉ានេះប្រើបន្សំរវាង Bluetooth និង Wi-Fi ដែលផ្ដល់ល្បឿនលឿន និងងាយស្រួលបញ្ជូនរូបភាពទៅកាន់ទូរសព្ទ។ វាអាចថតវីដេអូបានកម្រិត 4K 30P ហើយមានជម្រើសកាត់រូបភាពចេញពីវីដេអូមានទំហំដល់ទៅ 8 Megapixel។

អ្នកអាចទទួលបានទំហំ CMOS sensor 16 Megapixel លើកាមេរ៉ានេះ។ ការថតរូបដោយរង្គើ និងព្រាលនៅស្ថានភាពមានពន្លឺទាប កាមេរ៉ានេះអាចជួយបាន ដោយមានមុខងារទប់លំនឹងលើតួកាមេរ៉ាដ៏ល្អមួយ។ នេះនឹងធ្វើឲ្យការថតវីដេអូ កាន់នឹងដៃ អាចរក្សាគុណភាពរូបបាន។

កាមេរ៉ានេះមានប្រព័ន្ធ Autofocus ចំនួន ១២០ ចំណុច ដោយគ្របដណ្ដប់លើ Frame ទាំងស្រុង។

ការរចនា

ការរចនារបស់ PEN E-PL9 មិនមានការផ្លាស់ប្ដូរច្រើននោះទេ ដោយប្រើប្លាស្ទិកលើតួកាមេរ៉ា រៀបចំបានល្អ និងមានលក្ខណៈរលោង។ កាមេរ៉ានេះ មានគន្លាក់កាន់កាមេរ៉ាថត ធំជាងមុន ងាយស្រួលក្នុងការកាន់។

ការតម្រៀបប៊ូតុងដូចគ្នាច្រើននឹង Olympus PEN E-PL8 ខណៈ Model Dial នៅផ្នែកខាងលើ ធំជាង។ កាមេរ៉ានេះមានប៊ូតុងថ្មីមួយពីលើអេក្រង់ សម្រាប់បើកប្រើ Flash ដែលមិនមានលើ PEN E-PL7 និង PEN E-PL8 នោះឡើយ។ តែកាមេរ៉ានេះពុំមាន Viewfinder នោះទេ។

កាមេរ៉ា PEN E-PL9 មិនមានកន្លែងភ្ជាប់នឹងឧបករណ៍ប្រើប្រាស់ផ្សេងនោះទេ ដូចជាមិនអាចបំពាក់ Viewfinder ក្រៅបន្ថែមបាន។ ហើយកាមេរ៉ានេះក៏មិនមានរន្ធដោតភ្ជាប់ Stereo Microphone ឬ Head Phone ផងដែរ។

សរុបមក កាមេរ៉ា PEN E-PL9 តូចស្រាល ទាន់សម័យ និងផលិតគុណភាពរូបភាពបានល្អ។ កាមេរ៉ានេះ អាចនឹងមានលើទីផ្សារនៅពាក់កណ្ដាលខែ មីនា៕