​Apple បាន​ចាប់​ផ្ដើម​​កម្មវិធី​ជួសជុល​ឥត​គិត​ថ្លៃ​​មួយ​សម្រាប់​ iPhone 7 ដែល​មាន​បញ្ហា​​​​មួយ​ធ្វើ​ឲ្យ​ទូរសព្ទ​មិន​មាន​សេវា​ ទោះ​ស្ថិត​ក្នុង​តំបន់​ដែល​មាន​សេវា​ក្ដី។ ក្រុមហ៊ុន​និយាយ​ថា​​បញ្ហា​នេះ​បណ្ដាល​មក​ពី​​​គ្រឿង​បន្លាស់​​លើ​ Main Logic Board ដែល​មាន​កំហុស​បច្ចេកទេស។

បញ្ហា​នេះ​ប៉ះពាល់​លើ​ម៉ូដែល​ iPhone 7 តិច​តួច​ប៉ុណ្ណោះ​ ហើយ​ចំពោះ​ទូរសព្ទ​​ដែល​មាន​បញ្ហា​នេះ​ ​ផលិត​ឡើង​នៅ​​ចន្លោះ​ខែ​កញ្ញា​ ឆ្នាំ​ ២០១៦ ដល់​ខែ​កុម្ភៈ​ ឆ្នាំ ២០១៨ និង​មាន​លក់​នៅ​ប្រទេស​​ចិន, ហុងកុង, ជប៉ុន, ម៉ាកាវ​ និង​ សហរដ្ឋអាមេរិក។ ​លេខ​ម៉ូដែល​ដែល​មាន​បញ្ហា​នេះ​​រួម​មាន​ A1660, A1780 និង A1779 ដោយ​អតិថិជន​អាច​ឆែក​មើល​​លេខ​ម៉ូដែល​បាន​នៅ​ផ្នែក​ខាង​ក្រោយ​ទូរសព្ទ។

ដំណឹង​ដំបូង​អំពី​បញ្ហា​នេះ​បាន​លិច​ចេញ​ឡើង​តាំង​ពី​ខែ​កញ្ញា​ ឆ្នាំ​ ២០១៦ នៅ​ពេល​ Apple ចាប់​ផ្ដើម​ធ្វើ​ការ​ស៊ើបអង្កេត​​លើ​ iPhone 7 ដែល​បង្ហាញ​សារ​ "No Service”។ គួរ​បញ្ជាក់​ថា​អតិថិជន​ដែល​មាន​​បញ្ហា​នេះ​អាច​ ទៅ​កាន់​ហាង​ Apple ផ្លូវ​ការ​ដើម្បី​ធ្វើ​ការ​ជួសជុល​ដោយ​ឥត​គិត​ថ្លៃ៕​

​​​​​​​

​

​​​​​​​ ​​ ​​​​