- 2018-01-30 23:15:00
- ព័ត៌មាន
កុំឲ្យឆ្ងល់! រឿងអ្នកភ្ជាប់ភ្លើងប្រើអំពែធំស៊ីភ្លើងតិច និងភ្ជាប់អំពែតូចស៊ីភ្លើងច្រើន
- 2018-01-30 23:15:00
- ចំនួនមតិ 0 | ចំនួនចែករំលែក 0
កុំឲ្យឆ្ងល់! រឿងអ្នកភ្ជាប់ភ្លើងប្រើអំពែធំស៊ីភ្លើងតិច និងភ្ជាប់អំពែតូចស៊ីភ្លើងច្រើន
ចន្លោះមិនឃើញ
ពលរដ្ឋជាច្រើនមានចម្ងល់ និងចោទសួរតៗគ្នាពីបញ្ហាភ្លើងបំពាក់អំពែធំស៊ីភ្លើងតិច និងបំពាក់អំពែតូចស៊ីភ្លើងច្រើន តើការពិតយ៉ាងណាវិញ? មន្រ្តីអគ្គិសនីពីររូបបកស្រាយពីរឿងនេះ៖
លោក សុខ មាន ជាមន្ត្រី EDC ម្នាក់បានប្រាប់មកកាន់ Sabay ថា ភ្លើងបំពាក់អំពែធំស៊ីភ្លើងតិច និងបំពាក់អំពែតូចស៊ីភ្លើងច្រើន អាស្រ័យទៅលើការប្រើប្រាស់។
លោកថា " ការប្រើប្រាស់អស់ភ្លើងច្រើនឬតិចអាស្រ័យទៅលើការប្រើប្រាស់ប្រចាំថ្ងៃ ឬឧបករណ៍អគ្គិសនីច្រើន ប្រសិនតម្រូវការប្រើក្នុងផ្ទះលើសពី ១០ អំពែ អ្នកប្រើគួរតែតភ្ជាប់ ២០ អំពែ។ ចៀសវាងនៅពេលប្រើប្រាស់ច្រើន ថាមពលភ្លើងផ្ដល់មិនគ្រប់គ្រាន់ធ្វើឲ្យកុងទ័រភ្លើង ឆាប់ឡើងកម្ដៅអាចលោតបិតចរន្តអគ្គិសនី។
សម្រាប់អ្នករស់នៅផ្ទះលក្ខណៈគ្រួសារដែលប្រើប្រាស់ទូទឹកកក ម៉ាស៊ីនបោក ឬម៉ាស៊ីនត្រជាក់ក្នុងពេលតែមួយលោកបានណែនាំឲ្យភ្ជាប់អំពែធំលើសពី ១០អំពែ ចំពោះអ្នករស់នៅផ្ទះជួលធម្មតាប្រើប្រាស់ត្រឹម១០អំពែមិនជាបញ្ហាឡើយ។
ងាកមក លោក វិសាល មន្ត្រី EDC មួយរូបដែលបម្រើការនៅវត្តភ្នំដែរនេះ ក៏បានប្រាប់ដែរថាការប្រើប្រាស់ភ្លើងអស់ច្រើនឬតិចអាស្រ័យទៅលើការប្រើប្រាស់ក្នុងផ្ទះ។
លោកបន្តថា អ្នកប្រើគួរតែភ្ជាប់អំពែកាន់តែធំកាន់តែល្អ ព្រោះថាតម្រូវការប្រើប្រាស់ប្រចាំថ្ងៃតែងតែទិញរបស់របរអគ្គិសនីមកបន្ថែមនៅពេលយើងប្រើប្រាស់ច្រើនហើយអំពែតូចធ្វើឲ្យឧបករណ៍(អំពែ) ឡើងកម្ដៅ និងអាចធ្វើឲ្យកុងទ័រដើរលឿនជាហេតុធ្វើឲ្យគីឡូភ្លើងកើនឡើងតិចតួចដែរ ដូចនេះអ្នកគួរតែភ្ជាប់អំពែឲ្យធំជាងការប្រើប្រាស់ទើបជាការល្អ។
លោកក៏បានប្រាប់ថាអ្នកប្រើប្រាស់គួរតែជ្រើសរើស ឧបករណ៍ណាដែលមានស្តង់ដារល្អ ដូចជា អំពែភ្លើង ខ្សែភ្លើង របស់ប្រើប្រាស់ក្នុងផ្ទះ ទូទឹកកក ម៉ាស៊ីនត្រជាក់ ម៉ាស៊ីនទឹកក្ដៅ .... ចៀសវាងប្រើប្រាស់របស់ មួយទឹក ឬរបស់ដែលផលិតមិនត្រូវតាមស្តង់ដាដែលធ្វើឲ្យស៊ីភ្លើងខ្លាំង នឹងអាចមានហានិភ័យកើតឡើង។
រាល់ចម្ងល់ទាំងអស់នេះត្រូវបានមន្ត្រី EDC មួយរូបសុំមិនបញ្ចេញឈ្មោះបានឲ្យដឹងថា ការបំពាក់អំពែរតូច ឬ ធំតាមគេហដ្ឋានរបស់ពលរដ្ឋមិនមែនចេះតែដាក់តាមការចង់បាននោះទេ ត្រូវមានពិនិត្យមើលស្ថានភាពប្រើប្រាស់និងតម្រូវការជាក់ស្តែង។
លោកថា មុនមន្រ្តីអគ្គិសនីរៀបចំប្រព័ន្ធអគ្គិសនីដល់ផ្ទះប្រជាជនគឺបានគិតគូរយ៉ាងល្អិតល្អន់។ ដូចផ្ទះគ្រួសារមួួយតូចតម្រូវការតិច បើដាក់អំពែរធំគឺមិនត្រូវតាមស្តង់ដាឡើយ។ ចំណែកឯផ្ទះធំតម្រូវការប្រើប្រាស់ច្រើន ហើយបើដាក់អំពែរតូចក៏មិនសមស្របដែរ។
ទាក់ទងការលើកឡើងការបំពាក់អំពែរធំស៊ីភ្លើងតិច រីឯបំពាក់អំពែរតូចស៊ីភ្លើងច្រើននោះលោកបកស្រាយថា កាលណាតម្រូវការប្រើប្រាស់ច្រើន ការផ្តល់ថាមពលមិនគ្រប់គ្រាន់ កុងទ័រភ្លើងឡើងខុសពីធម្មតាដោយសារភ្លើងអូសមិនរួច កុងទ័រឆាប់ឡើងកម្តៅធ្វើឲ្យស៊ីភ្លើងអស់ច្រើន។ ដូចនេះម្ចាស់ផ្ទះប្រញាប់ទាក់ទងមកមន្រ្តីអគ្គិសនីមកជួយត្រួតពិនិត្យ ដើម្បីសុំដំឡើងអំពែរឲ្យសមាមាត្រនិងការប្រើប្រាស់។
លោកបន្តថា បញ្ហាមួយទៀតដែលត្រូវយកចិត្តទុកដាក់គឺការជ្រើសរើសឧបករណ៍ប្រើប្រាស់ដែលខ្វះស្តង់ដាជជុះៗដូចជា ទូទឹកកក ម៉ាស៊ីនត្រជាក់ ម៉ាស៊ីនទឹកក្តៅជាដើម ដែលផលិតឡើងមិនស្របតាមបច្ចេកវិទ្យានាំឲ្យស៊ីភ្លើងខ្លាំង។ ការរៀបចំបណ្ដាញភ្លើងអគ្គិសនីក្នុងផ្ទះមិនបានត្រឹមត្រូវក៏អាចនាំឲ្យស៊ីភ្លើងឬ អាចនឹងជួបហានិភ័យផ្សេងៗជាយថាហេតុផងដែរ។
ចុច Like និង See First ដើម្បីទទួលព័ត៌មានបច្ចេកវិទ្យាមុនគេ......
អត្ថបទបន្ទាប់៖
