ស្អាត ពូកែ ហើយថែមទាំងរៀនចប់អនុបណ្ឌិតពីអង់គ្លេសទៀត

2018-01-17 03:01:31
ព័ត៌មាន

2018-01-17 03:01:31
ចំនួនមតិ 0 | ចំនួនចែករំលែក 0

ចន្លោះមិនឃើញ

មានឪពុកជាវេជ្ជបណ្ឌិត ម្ដាយជាស្រ្តីមេផ្ទះ ណារីបានជម្នះមនុស្សគ្រប់គ្នារួមទាំងផ្នត់គំនិតអ្នកជុំវិញខ្លួន ក្នុងការស្វែងរកការសិក្សាជំនាញបច្ចេកវិទ្យា។

ធ្លាប់រៀនសាលាល្បីផុតលេខនៅក្នុងស្រុក យុវតីវ័យជាង ២០ ឆ្នាំនេះ បានចាប់ឱកាសទៅបន្តការសិក្សារហូតបញ្ចប់ថ្នាក់អនុបណ្ឌិតនៅប្រទេសអង់គ្លេស ដោយដាក់គោលដៅយ៉ាងច្បាស់។ បច្ចុប្បន្នយុវតីវ័យក្មេងនេះ ក៏កំពុងធ្វើគម្រោងមួយដើម្បីជួយដល់សហគ្រាសខ្នាតតូចនិងមធ្យម លើការគ្រប់គ្រងអាជីវកម្ម។

កញ្ញាតូច ច័ន្ទណារី ឲ្យដឹងថា កញ្ញាបានចាប់ផ្ដើមចេះប្រើប្រាស់កុំព្យូទ័រនៅអាយុជាង ១០ ឆ្នាំដោយសារមានការណែនាំពីឪពុក។ កាលនៅរៀនវិទ្យាល័យ កញ្ញាចូលចិត្តផ្នែកគីមី និងកុំព្យូទ័រជាងគេ ហើយក៏ចេះបង្កើតវេបសាយតាំងពីមិនទាន់ចូលរៀនមហាវិទ្យាល័យមកម៉្លេះ។

យុវតីកើតនៅទីក្រុងភ្នំពេញឲ្យដឹងថា ក្រោយពេលចប់វិទ្យាល័យនៅឆ្នាំ ២០០៩ ដំបូងកញ្ញាក៏ចង់ចាប់មុខជំនាញពេទ្យតាមឪពុកដែរ ប៉ុន្តែដោយសារយល់ឃើញជំនាញពេទ្យត្រូវការរៀនវែងឆ្ងាយ និងណាមួយមិនសូវចូលចិត្តផងនោះ ក៏ងាកមកចាប់ជំនាញបច្ចេកវិទ្យាទៅ។

ណារី បានរៀនបន្តថ្នាក់បរិញ្ញាបត្រនៅសាលាលីមកុកវីង ដោយជ្រើសរើសជំនាញឌីហ្សាញ។ ណារីប្រាប់ថា ពេលធ្វើការនៅមុខកុំព្យូទ័រម្តងៗ កញ្ញាមិនសូវចេះធុញទ្រាន់ទេទោះចំណាយពេលយូររាប់ម៉ោងក៏ដោយ។

រៀនបានតែមួយឆ្នាំ ណារីក៏សម្រេចចិត្តទៅបន្តការសិក្សានៅអង់គ្លេស ដោយប្តូររៀនជំនាញវិទ្យាសាស្ត្រកុំព្យូទ័រវិញ។

ណារីប្រាប់ថា សិស្សនៅអង់គ្លេសរៀនប្រកួតប្រជែងគ្នាណាស់ ជាពិសេសក្នុងចំណោមសិស្សបរទេស។ ក្នុងថ្នាក់គ្រូមិនសូវមានពេលពន្យល់មេរៀនច្រើនទេ សិស្សម្នាក់ៗត្រូវរៀនស្វ័យសិក្សាដោយខ្លួនឯង និងមានការអនុវត្តជាប្រចាំ។

ណារីបន្តទៀតថា សិស្សនៅអង់គ្លេសចូលចិត្តរៀនផងស្រាវជ្រាវផង ហើយឯកសារវិញមានមិនចេះខ្វះ។

ការរចាកឆ្ងាយពីគ្រួសារដែលធ្លាប់រ៉ាប់រ៉ងការងារគ្រប់យ៉ាងរួមទាំងការហូបចុកផងនោះ ណារីត្រូវរៀនផ្លាស់ប្ដូរទម្លាប់រស់នៅទាំងស្រុង ត្រូវចេះបត់បែន រៀនរស់នៅឯករាជ្យម្ចាស់ការលើខ្លួនឯង។

នៅអង់គ្លេស ណារីក៏មានឱកាសទទួលបានការងារក្រៅម៉ោង ដើម្បីទទួលបានប្រាក់កម្រៃខ្លះៗយកមកផ្គត់ផ្គង់ការរស់នៅ។

ណារីសម្គាល់ដែរថា នៅក្នុងថ្នាក់ដែលនាងរៀន ដែលមានសិស្សចម្រុះជាតិសាសន៍ មិនសូវមានសិស្សស្រីរៀនផ្នែក IT ច្រើនទេ មិនខុសពីនៅស្រុកខ្មែរ។ ការរៀនវិញ សិស្សម្នាក់ៗត្រូវបានលើកទឹកចិត្តបង្កើតគំនិតច្នៃប្រឌិតថ្មីៗ។ បើសិស្សណារៀនពូកែលេចធ្លោជាងគេ នឹងមានក្រុមហ៊ុនធំៗចាំទទួលយកទៅធ្វើការតែម្តង។

ទាក់ទងយុទ្ធសាស្រ្តរៀនវិញ ណារីបង្ហើបថា សម្រាប់កញ្ញាផ្ទាល់តែងតែរក្សាទំនាក់ទំនងស្និទ្ធស្នាលជាមួយសាស្ត្រាចារ្យ ដើម្បីទទួលបានការណែនាំបន្ថែម ឬការដាស់តឿនទាក់ទងការសិក្សា។

ណារីបានធ្វើគម្រោងមួយជាមួយមិត្តភ័ក្ដិពីរបីនាក់ ពីប្រព័ន្ធគ្រប់គ្រងទិន្នន័យសម្រាប់ប្រើប្រាស់ក្នុងអាជីវកម្មមុនពេលចេញទៅរៀននៅអង់គ្លេស។

ណារីប្រាប់ថា គម្រោងនេះកញ្ញាបានចាប់ផ្ដើមធ្វើតាំងពីមុនទៅអង់គ្លេស។ ទើបតែឆ្នាំ ២០១៦ ពេលកញ្ញាបញ្ចប់ការសិក្សាទើបចាប់ផ្តើមធ្វើពេញដៃពេញជើង។

ណារី ឲ្យដឹងថា ប្រព័ន្ធគ្រប់គ្រងទិន្នន័យ SECOS អាចជួយកាត់បន្ថយការចំណាយ និងបង្កើនប្រសិទ្ធភាពក្នុងគ្រប់គ្រងអាជីវកម្ម។

តាមរយៈប្រព័ន្ធ SECOS នឹងជួយដល់ម្ចាស់អាជីវកម្មអាចតាមដានរបាយការណ៍លក់ដូរប្រចាំថ្ងៃ បង្កើនប្រសិទ្ធភាពការគ្រប់គ្រងបុគ្គលិក ជាពិសេសវាជួយដល់ម្ចាស់អាជីវកម្មដែលមានមុខរបរច្រើនកន្លែង អាចតាមដានវាយតម្លៃការលក់ដូរបានគ្រប់ទីកន្លែង។

បើតាមស្ថាបនិកវ័យក្មេងរូបនេះ ប្រព័ន្ធ SECOS ក្រៅពីអាចឲ្យម្ចាស់អាជីវកម្មងាយស្រួលគ្រប់គ្រង ដឹងពីលំហូរការលក់ដូរប្រចាំថ្ងៃ វាក៏ជួយដល់ម្ចាស់អាជីវកម្មស្វែងយល់ពីតម្រូវការរបស់អតិថិជន ដើម្បីឆ្លើយតបបានទាន់ពេលវេលា។

ជាគោលដៅនៅថ្ងៃអនាគត ណារីចង់សរសេរសៀវភៅ ដើម្បីអាចយកចំណេះនិងបទពិសោធន៍ ចែករំលែកដល់អ្នកជំនាន់ក្រោយ និងមួយទៀតក៏ចង់អភិវឌ្ឍប្រព័ន្ធកម្មវិធីដែលកញ្ញាធ្វើឲ្យកាន់តែទំនើបនិងឆ្លាតវៃ សម្រាប់អ្នកប្រើប្រាស់៕