ក្រុមហ៊ុនមួយទៀត ត្រៀមឡានភីកអាប់អគ្គិសនី ប្រជែងនឹង Tesla និង Ford

2020-01-29 09:38:26
ព័ត៌មាន

2020-01-29 09:38:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនផលិតរថយន្តអគ្គិសនីប្រណីត Karma ដែលមានមូលដ្ឋាននៅរដ្ឋ California មានគោលបំណងបង្ហាញចេញ Concept នៃរថយន្តភីកអាប់អគ្គិសនីមុនដំណាច់ឆ្នាំនេះ ដោយមានបំណងចង់បង្កើតគូប្រជែងសម្រាប់រថយន្តដែល Tesla, Rivian, General Motors និង Ford កំពុងបង្កើត។

នាយកប្រតិបត្តិនៃ Karma គឺលោក Kevin Pavlov និយាយថាភីកអាប់នេះនឹងប្រើប្រាស់គ្រោងឆ្អឹងដែលមានប្រព័ន្ធបើកបរវិលកង់ទាំងអស់ ដែល Karma នឹងចាប់ផ្ដើមផលិតគ្រោងឆ្អឹងនេះនៅរោងចក្ររបស់ខ្លួនក្នុងភាគខាងត្បូងរដ្ឋ California។ គ្រោងឆ្អឹងនេះក៏នឹងត្រូវប្រើលើរថយន្ត SUV អគ្គិសនីនាពេលអនាគតផងដែរ។

Revero

រថយន្តដែល Karma កំពុងផលិតនាពេលនេះគឺមានម៉ូដែល Revero ដែលមានតម្លៃ ១៣៥ ០០០ ដុល្លារ។ លោក Pavlov និយាយថាភីកអាប់របស់ខ្លួននឹងមានតម្លៃថោកជាង Revero ប៉ុន្តែមិនបញ្ជាក់អំពីតម្លៃច្បាស់លាស់នោះទេ។

Tesla ឯណោះវិញ អះអាងថារថយន្ត Cybertruck របស់ខ្លួននឹងចេញលក់លើទីផ្សារជាមួយតម្លៃចាប់ពី ៣៩ ៩០០ ដុល្លារ ជាមួយប្រភេទបើកបរវិលកង់ក្រោយ ខណៈដែលរថយន្តភីកអាប់ R1T របស់ Rivian ប្រើប្រាស់ម៉ូទ័រអគ្គិសនីភ្លោះនឹងមានតម្លៃចាប់ពីក្រោម ៦៩ ០០០ ដុល្លារ។ តម្លៃរថយន្តភីកអាប់របស់ General Motors និង Ford នៅមិនទាន់ច្បាស់នៅឡើយ។

កាលពីឆ្នាំទៅ Karma Revero អាចលក់ចេញបានប្រមាណ ១ ពាន់គ្រឿង ហេតុនេះក្រុមហ៊ុន Karma នៅមិនទាន់ខ្លាំងក្លានៅឡើយទេ។ ប្រសិនបើក្រុមហ៊ុនពិតជាប្រឡូកក្នុងទីផ្សាររថយន្តភីកអាប់មែន នោះត្រូវបញ្ចេញលក់ផលិតផលដែលថោក និងមានភាពទាក់ទាញច្រើនជាង Revero៕

ប្រភព៖ carscoops ប្រែសម្រួល៖ សុខហេង