iPhone 11 Pro Max ខ្វះខាតចំណុចធំៗ ៣

2019-09-12 01:05:00
ព័ត៌មាន

2019-09-12 01:05:00
ចំនួនមតិ 0 | ចំនួនចែករំលែក 0

ចន្លោះមិនឃើញ

Apple បានរង្គោះរង្គើចិត្តអតិថិជនអ្នកគាំទ្រតាមរយៈការចេញផ្សាយ iPhone ថ្មី ៣ ម៉ូឌែលនៅយប់ថ្ងៃទី ១០ កញ្ញាកន្លងទៅ។ ក្នុងនោះសេរ៊ីខ្ពស់ដាច់គេបង្អស់គឺ iPhone 11 Pro Max ដែលមានតម្លៃចាប់ពី ១ ០៩៩ ដុល្លារដល់ ១ ៤៤៩ ដុល្លារផ្អែកតាមជម្រើសអង្គផ្ទុក។

ប៉ុន្តែតាមការមើលឃើញដោយផ្ទាល់ នៅឆ្នាំ ២០១៩ នេះ Apple ហាក់ថ្លោះធ្លោយលើការពាំនាំនូវចំណុចខ្លាំង ៣ ដែលចាញ់ប្រៀប បើធៀបនឹងគូប្រជែងដទៃដែលមានតម្លៃប្រហាក់ប្រហែលគ្នានោះ។

១.មិនប្រើប្រាស់អេក្រង់ពេញ

នៅឆ្នាំ ២០១៩ នេះ បណ្តាស្មាតហ្វូនកំពូលជាច្រើនបានអភិវឌ្ឍខ្លួនមកបំពាក់នូវអេក្រង់ពេញ ហើយលែងមានស្នាមឆក ឬបន្សល់ស្នាមឆកតូចបំផុត។ ប៉ុន្តែ Apple ហាក់ពុំបានអើពើនិងនៅតែដើរតាមគន្លងចាស់ឆ្នាំ ២០១៨ ពោលគឺបង្កើតភាពទើសទាល់ដល់អ្នកប្រើប្រាស់របស់ខ្លួនម្តងទៀត ជាមួយស្នាមឆកដ៏ធំនៅផ្នែកខាងលើ ទាំងដែលតម្លៃក៏ខ្ពស់លើសពី ១ ពាន់ដុល្លារទៅហើយ។

២.មុខងារសាកថ្ម Reverse Wireless Charging

សាកថ្មឥតខ្សែ Wireless Charge បន្តមានប្រើប្រាស់ដូចជំនាន់ឆ្នាំទៅ ប៉ុន្តែការផ្ទេរថាមពលថ្មតាមរយៈមុខងារសាកឥតខ្សែ ដែលយើងហៅថា Two-way ឬ Reverse Wireless Charging គឺមិនមានការគាំទ្រនោះឡើយលើ iPhone 11 Pro Max។ ក្រឡេកទៅស្មាតហ្វូនដទៃដូចជាក្រុមហ៊ុន Samsung និង Huawei សុទ្ធសឹងមានបញ្ចូលមុខងារនោះរួចរាល់អស់ហើយ។

៣.ប្រព័ន្ធ 5G

មិនច្បាស់ថានេះជាយុទ្ធសាស្រ្តឬគោលការណ៍បែបណាមួយរបស់ Apple ប៉ុន្តែអាចរាប់ចូលជាចំណុចថ្លោះធ្លោយធំបំផុតលើ iPhone ឆ្នាំ ២០១៩។ បច្ចុប្បន្ននៅប្រទេសធំៗទាំងក្នុងតំបន់អាស៊ីនិងអឺរ៉ុប បានដាក់សាកល្បងប្រព័ន្ធ 5G ត្រៀមអាចប្រើប្រាស់ជាផ្លូវការនៅឆ្នាំក្រោយ មិនខុសពីស្មាតហ្វូនរបស់ក្រុមហ៊ុនចិននិងកូរ៉េខាងត្បូង សុទ្ធសឹងផ្តល់ជូនជម្រើស 5G រៀងៗខ្លួន តែ Apple ស្ងាត់សូន្យឆឹងលើការចេញផ្សាយ iPhone មានប្រើប្រាស់ប្រព័ន្ធ 5G៕

អានអត្ថបទ:

អត្ថបទ៖ កៅ រក្សា