អ្នកត្រួសត្រាយផ្លូវឲ្យ Apple បញ្ចូលក្តារចុចភាសាខ្មែរមានលើ iPhone

2019-06-08 10:22:36
ព័ត៌មាន

2019-06-08 10:22:36
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីប៉ុន្មានថ្ងៃមុននេះក្រុមហ៊ុន Apple បានប្រកាសចេញ iOS 13 ជំនាន់ថ្មីជាផ្លូវការ ហើយវិបសាយផ្លូវការរបស់ Apple ក៏បានរៀបរាប់លម្អិតអំពីចំណុចថ្មីៗលើ iOS 13។ គេឃើញមានការបញ្ជាក់អំពីការបន្ថែមក្ដារចុចនៃភាសាថ្មីៗចំនួន ៣៨ ដែលក្នុងនោះឃើញមានសរសេរច្បាស់ៗថា "Khmer” ជាក្ដារចុចភាសាខ្មែរ។

ក្ដារចុចអក្សរខ្មែរលើ iOS 10

ដូចនេះ Sabay សូមឲ្យប្រិយមិត្តងាកត្រឡប់មកក្រោយបន្តិច មកស្គាល់ក្រុមអ្នកជំនាញមួយក្រុមដែលបានព្យាយាមយ៉ាងសស្រាក់សស្រាំតទល់នឹង Apple ទាំងតាមរយៈ Skype និងសារអេឡិចត្រូនិកផង ដើម្បីធ្វើយ៉ាងណាឲ្យពុម្ពអក្សរខ្មែរលើ iPhone ត្រឹមត្រូវពេញលេញលែងមានកំហុសបាត់ដៃបាត់ជើង មានឈ្មោះថា 4KhmeriPhone ជាក្រុមស្នើដាក់បញ្ចូលពុម្ពអក្សរខ្មែរលើប្រព័ន្ធ iOS ដំបូងគេបង្អស់តាំងពីជំនាន់ iOS 7 មកម្ល៉េះ។

កន្លងមកប្រធានក្រុម 4KhmeriPhone មួយរូបធ្លាប់បានផ្ដល់បទសម្ភាសន៍ជាមួយ Sabay ថា កាលពីជំនាន់ iOS 10 Beta 5 ក្រុមហ៊ុន Apple បានកែសម្រួលកំហុសជើងតម្រួតនៃភាសាខ្មែរដែលតែងតែដាច់ដៃដាច់ជើងនិងត្រួតជាន់គ្នា បានជោគជ័យទាំងស្រុង។

ប្រធានក្រុមនេះថា នឹងបន្តសហការជាមួយក្រុមហ៊ុនជំនាញ Font នៅម៉ាឡេស៊ីបន្តទៀត ដើម្បីស្នើ Apple បញ្ចូលក្តារចុចភាសាខ្មែរស្តង់ដារលើ iOS។ ដោយសារកន្លងមកក្រុម 4KhmeriPhone និងក្រុមហ៊ុនរចនា Font នៅម៉ាឡេស៊ីនេះ មានទំនាក់ទំនងល្អតាមរយៈការកែសម្រួលបញ្ហាកំហុសពុម្ពអក្សរខ្មែរ វានឹងកាន់តែងាយក្នុងការស្នើឲ្យ Apple ដាក់បញ្ចូលក្តារចុចខ្មែរលើ iOS ជំនាន់ក្រោយ។

ប្រធានក្រុមខាងលើបន្ថែមថា នៅពេលពុម្ពអក្សរខ្មែរលើ iOS ត្រឹមត្រូវពេញលេញ នោះនឹងកាន់តែងាយស្រួលសម្រាប់ក្រុមលោក រៀបចំស្តង់ដារពុម្ពអក្សរខ្មែរត្រឹមត្រូវរួមតែមួយ ដើម្បីឲ្យ Apple ពិចារណាបញ្ចូលក្ដារចុចភាសាខ្មែរលើ iPhone។

ជោគជ័យយ៉ាងណា លោកមិនទាន់អាចបញ្ជាក់ច្បាស់ ដោយអះអាងថាវាត្រូវការស៊ីពេលយូរគួរសម ដើម្បីឲ្យខាង Apple សម្រេចចិត្ត ពេលខ្លះផ្ញើរសារទៅបង្ខំApple ឲ្យដាក់បញ្ចូលពុម្ពអក្សរខ្មែរទៅក្នុងប្រតិបត្តិការ iOS ផ្ទាល់តែម្ដង។ លោកថា ដោយបច្ចុប្បន្នពុម្ពអក្សរខ្មែរមានលក្ខណៈត្រឹមត្រូវទាំងស្រុងលើ iOS 10 Beta 5 ហើយនោះភាគរយក្នុងការស្នើបញ្ចូលក្ដារចុចភាសាខ្មែរ នឹងមានសង្ឃឹមច្រើន។

មុខមាត់ពិតរបស់ក្រុម 4KhmeriPhone

ប៉ុន្តែអំឡុងចុងឆ្នាំ ២០១៧ ក្រុម 4KhmeriPhone ក៏ប្រកាសសុំពេលសម្រាកជាផ្លូវការ មិនបានធ្វើការអភិវឌ្ឍន៍បន្តទៀតទេ ធ្វើឲ្យអ្នកគាំទ្រសោកស្ដាយជាខ្លាំង។

យ៉ាងណាមិញ ក្រោយការប្រកាសរបស់ Apple ស្រាប់តែមានការបង្ហោះសារខ្លីមួយប៉ុន្មានម៉ោងមុននេះ ពីសំណាក់ទំព័រផ្លូវការក្រុម 4KhmeriPhone ដោយសរសេរថា "នៅសុខៗស្រាប់តែនឹកឃើញអនុស្សាវរីយចាស់ ដែលនឹងកើតមានចុងឆ្នាំនេះ”។

ដូច្នេះ បើយោងតាមការខិតខំរបស់ក្រុមពួកគាត់កន្លងមក គេអាចទាញសន្និដ្ឋានបានថា ក្រុម 4KhmeriPhone គឺជាអ្នកនៅពីក្រោយការស្នើសុំឲ្យបញ្ចូលក្តារចុចភាសាខ្មែរមានលើ iOS 13 ពិតមែន៕

អត្ថបទទាក់ទង៖

អត្ថបទ៖ រក្សា