ទូរសព្ទតូចបំផុតលើលោក ទំហំប៉ុនមេដៃ ប្រើបានមិនចាញ់ទូរសព្ទធំ(មានវីដេអូ)

2019-06-03 09:55:12
ព័ត៌មាន

2019-06-03 09:55:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Zanco ទើបបានប្រកាសចេញទូរសព្ទម៉ូឌែលថ្មី ដែលមានទំហំតូចមែនទែនគឺម៉ូឌែល Zanco Tiny 1។

ទូរសព្ទដ៏សែនតូចមួយនេះឈ្មោះថា Tiny 1 មានទម្ងន់ត្រឹមតែ ១៣ ក្រាម មានកម្រាស់ ១២ មីលីម៉ែត្រ(ស្ដើងប្រហែលកាក់) ផ្ទៃអេក្រង់ទំហំ ១២.៥ មីលីម៉ែត្រប្រភេទ OLED កំពស់ ៤៦.៧ មីលីម៉ែត្រនិងទទឹង ២១ មីលីម៉ែត្រ។

Tiny 1 ត្បិតតែមានមាឌតូចពិតមែន តែអាចដាក់ស៊ីមបានមួយប្រភេទ Nano-SIM មានរន្ធបំពងសំឡេងនៅខាងលើ មានប៊ូតុងចុច មានរន្ធដោតកាស មានរន្ធ Micro-USB សម្រាប់សាកភ្លើង និងមានកន្លែងដោតខ្សែបណ្ដោងស្រដៀងនឹង N-ចុចពិល(Nokia 3310) ។ អាចផ្ទុក SMS បាន ៥០ សារ ផ្ទុកលេខដែលតេចេញ-ចូលបាន ៥០ លេខ អាចគាំទ្រភាសាបានច្រើនរួមទាំងភាសាអង់គ្លេសផង និងអាចផ្ទុកសំឡេង Voice បាន ១៣ សំឡេង ។

Zanco-Tiny-T1-1 មានថាមពលថ្ម ២០០ មីលីអំពែ ផ្ទៃអេក្រង់ប្រភេទ OLED ទំហំ ០.៤៩ អ៊ីញ(១២.៥ មីលីម៉ែត្រ) ដើរដោយបន្ទះឈីប MTK6261D មានមេម៉ូរីម៉ាស៊ីន 32GB អាចភ្ជាប់អ៊ីនធើណិត 2Gបាន និងមានតែពណ៌ខ្មៅមួយគត់។ តម្លៃដាក់លក់ Tiny 1 ខ្ទង់ ៤០ ឬ ៥០ ដុល្លារ(នៅសហរដ្ឋអាមេរិក)។

កន្លងមក Zanco ក៏បានបញ្ចេញទូរសព្ទខ្នាតតូចបែបនេះហើយដែរដូចជា Tiny Fly ជាប់ឈ្មោះជាកំពូលទូរសព្ទតូចជាងគេបំផុតប្រចាំឆ្នាំ ២០១៦ និងម៉ូឌែលជាច្រើនទៀតដូចបង្ហាញក្នុងរូបខាងក្រោម។

យីហោ Zanco មានស្ថាបនិកឈ្មោះលោក Shazad Talib និងមានក្រុមហ៊ុនមេឈ្មោះ Zani Mobile Ltd ដែលជាក្រុមហ៊ុនផលិតទូរសព្ទដែលមានមូលដ្ឋាននៅទីក្រុងស៊ឺនចិន (Shenzhen) ប្រទេសចិន។ ម៉ាក Zanco នេះក៏កំពុងចរាចរលក់នៅតំបន់កណ្ដាល អាស៊ីខាងត្បូង អាហ្វ្រិក អង់គ្លេស អ៊ឺរ៉ុប និងអាមេរិកខាងត្បូងផងដែរ៕

ទស្សនាវីដេអូខាងក្រោម៖