- 2019-03-25 06:40:43
- ព័ត៌មាន
មើលពីភពផ្សេង ព្រះអាទិត្យមានរូបរាងបែបនេះ
- 2019-03-25 06:40:43
- ចំនួនមតិ 0 | ចំនួនចែករំលែក 0
មើលពីភពផ្សេង ព្រះអាទិត្យមានរូបរាងបែបនេះ
ចន្លោះមិនឃើញ
មានមតិមួយចំនួនបានងឿងឆ្ងល់ថាព្រះអាទិត្យមានរូបរាងបែបណា ប្រសិនបើមើលពីភពដទៃ? ដើម្បីបំបាត់ចម្ងល់នេះអ្នកជំនាញខាង Render ឈ្មោះ Ron Miller ដែលបានចំណាយពេលរាប់ឆ្នាំសិក្សាពីលំហអាកាសខាងក្រៅ បានបញ្ចេញរូបភាពនៃព្រះអាទិត្យពេលមើលពីភពទាំង ៨ ក្នុងប្រព័ន្ធព្រះអាទិត្យ។
@ ភពពុធ
ភពពុធស្ថិតនៅកៀកនឹងព្រះអាទិត្យជាងគេដោយមានចម្ងាយប្រមាណ ៥៨ លានគីឡូម៉ែត្រប៉ុណ្ណោះ ហេតុនេះព្រះអាទិត្យមើលចេញពីភពពុធឃើញថាមានទំហំធំជាង ព្រះអាទិត្យលើផែនដីបីដង។
@ ភពសុក្រ
បើមើលចេញពីសុក្រដែលស្ថិតនៅចម្ងាយ ប្រមាណ ១០៨ លានគីឡូម៉ែត្រពីព្រះអាទិត្យ គេសង្កេតឃើញព្រះអាទិត្យមិនអាចឃើញច្បាស់ឡើយ ដោយសារបាំងដោយពពកអាស៊ីតស៊ុលផួរិចក្រាស់ៗ។ បើទោះជាមើលឃើញក៏មានទំហំធំជាង ព្រះអាទិត្យមើលចេញពីផែនដី ចំនួនពីរដងដែរ។
@ ភពផែនដី
ចម្ងាយរវាងព្រះអាទិត្យនិងផែនដីគឺប្រមាណ ១៥០ លាន គ.ម ដោយព្រះអាទិត្យគ្របដណ្ដប់ពាក់កណ្ដាលមេឃនៃផែនដី ហើយព្រះចន្ទគ្របដណ្ដប់ពាក់កណ្ដាលទៀត។ នេះជាហេតុដែលធ្វើឲ្យពេលព្រះចន្ទធ្វើដំណើរចន្លោះព្រះអាទិត្យ និង ផែនដី បង្កើតបានជាសូរ្យគ្រាសដូចក្នុងរូបភាពបានបង្ហាញ។
@ ភពអង្គារ
ព្រះអាទិត្យមើលចេញពីភពអង្គារមានទំហំតូចជាងលើផែនដី ដោយសារភពនេះមានចម្ងាយឆ្ងាយពីព្រះអាទិត្យដល់ទៅ ២២៨ លាន គ.ម។
@ ភពព្រហស្បតិ៍
ខាងលើជាទិដ្ឋភាពព្រះអាទិត្យមើលចេញពីព្រះចន្ទមួយនៃភពព្រហស្បតិ៍ឈ្មោះថា Europa ដោយមើលទៅឃើញថាភពព្រហស្បតិ៍បម្រុងនឹងធ្វើដំណើរបាំងព្រះអាទិត្យ បង្កើតបានជារង្វង់ក្រហមជុំវិញភព។ បញ្ជាក់ថាភពព្រហស្បតិ៍មានចម្ងាយ ៧៧៩ លាន គ.ម ពីព្រះអាទិត្យ។
@ ភពសៅរ៍
ពពកដែលសម្បូរដោយគ្រីស្តាល់ដូចទឹកកក និងសារធាតុហ្គាស នៃភពសៅរ៍ បានបង្កើតចេញជាបាតុភូតដ៏អស្ចារ្យមួយពេលប៉ះនឹងពន្លឺព្រះអាទិត្យ ប្រៀបដូចជាថ្ងៃបាំងឆត្រលើភពផែនដីយ៉ាងអ៊ីចឹង។ ត្បិតថាព្រះអាទិត្យហាក់ចុះថយពន្លឺនៅត្រឹមភពសៅរ៍ ប៉ុន្តែគេនៅតែមិនអាចមើលព្រះអាទិត្យនឹងភ្នែកទទេបាន។ គម្លាតរវាងភពសៅរ៍និងព្រះអាទិត្យគឺប្រមាណ ១៤២៩ លាន គ.ម។
@ ភពអ៊ុយរ៉ានុស
ខាងលើជាពន្លឺព្រះអាទិត្យមើលចេញព្រះចន្ទមួយរបស់ភពអ៊ុយរ៉ានុសឈ្មោះថា Ariel។ គម្លាតដ៏ឆ្ងាយដល់ទៅ ២,៨៩ ពាន់លាន គ.ម រវាងព្រះអាទិត្យ និង អ៊ុយរ៉ានុស ធ្វើឲ្យពន្លឺព្រះអាទិត្យកាន់តែចុះខ្សោយទៅ។
@ ភពណិបទូន
ព្រះអាទិត្យពេលមើលចេញពីព្រះចន្ទមួយរបស់ភពណិបទូនឈ្មោះថា Triton។ ណិបទូនមានចម្ងាយប្រមាណ ៤,៥ ពាន់លាន គ.ម ពីព្រះអាទិត្យ។ ពពកពោរពេញដោយធូលី និង ហ្គាសនៃ Triton បានបាំងរូបរាងព្រះអាទិត្យ មើលឃើញតែពន្លឺបន្តិចបន្តួច។
@ ភពភ្លូតុង
ព្រះអាទិត្យមើលចេញពីភពភ្លូតុងកាន់តែតូចទៅ ដោយមានគម្លាតឆ្ងាយពីគ្នាដល់ ៦,១១ ពាន់លាន គ.ម៕
