នេះកុំឲ្យស្ទាក់ស្ទើរ! ប្រៀបធៀប ៨ ចំណុចខុសគ្នាដាច់រវាង iPhone XR និង Galaxy S10e

2019-02-25 02:45:00
ព័ត៌មាន

2019-02-25 02:45:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Samsung បានចេញផ្សាយស្មាតហ្វូនជំនាន់ថ្មីរបស់ខ្លួនកាលពីប៉ុន្មានថ្ងៃមុន ក្នុងនោះក៏មានម៉ូឌែលធុនតូចមួយឲ្យឈ្មោះ Galaxy S10e ត្រូវបានគេជឿថាជាគូប្រជែងយ៉ាងពិតប្រាកដធៀបនឹង iPhone XR របស់ Apple។

ត្បិតអីតាមដឹងតម្លៃអាចប្រហាក់ប្រហែលគ្នា អតិថិជនអាចនឹងពិបាកក្នុងការសម្រេចចិត្ត បែបនេះ Sabay សូមលើកយកការប្រៀបធៀប ៨ ចំណុចដូចខាងក្រោម៖

៨) ទំហំ

iPhone XR មានទំហំអេក្រង់ ៦,១ អ៊ីញ ស្របពេល S10e ជាប្រភេទខ្លួនតូចបំផុតធៀបនឹងត្រកូល Galaxy ធុនធ្ងន់ពីរម៉ូឌែលទៀត។ បែបនេះមានន័យថាបើអ្នកស្រលាញ់ស្មាតហ្វូនអេក្រង់ធំ នោះ XR ជាជម្រើសល្អប្រសើរជាង។

អ្នកឈ្នះ: iPhone XR

៧) ការកាត់អេក្រង់

ដោយលុបបំបាត់ម៉ូតឆក ក្រុមហ៊ុនយក្សកូរ៉េខាងត្បូងបានផ្លាស់ប្តូរបែបថ្មីតាមរយៈការចោះអេក្រង់រាងរង្វង់តូចមួយសម្រាប់ផ្ទុកកាមេរ៉ាមុខ។ ចំណែកឯ iPhone XR មានស្នាមឆកនៅផ្នែកកណ្តាល ដោយនេះក៏សម្រេចលើចំណង់ចំណូលចិត្តរបស់អ្នកប្រើ។

អ្នកឈ្នះ: ស្មើគ្នា

៦) កម្រិតបង្ហាញលើអេក្រង់

ការប្រៀបធៀបកម្រិតបង្ហាញលើអេក្រង់ ពិបាកណាស់ដែល iPhone អាចយកឈ្នះផលិតផលរបស់ Samsung បាន មិនខុសពីម៉ូឌែល S10e នេះផ្ទាល់ ក៏ប្រើប្រាស់ប្រភេទអេក្រង់ AMOLED និងកម្រិត FullHD+ ជាមួយការគាំទ្របច្ចេកវិទ្យា HDR10+ អាចបង្ហាញរូបភាពច្បាស់ត្រជាក់ភ្នែក ខុសពីអេក្រង់ LCD ធម្មតាលើ iPhone XR។

អ្នកឈ្នះ: Galaxy S10e

៥) ល្បឿនដំណើរការ

Apple តែងតែជំរុញស្មាតហ្វូនសេរ៊ីចុងក្រោយរបស់ខ្លួនឲ្យដំណើរការបានល្អជាងគូប្រជែងណាទាំងអស់។ S10e បំពាក់បន្ទះឈីប Snapdragon 855 មាន RAM ទំហំ 8GB។ ប៉ុន្តែយោងតាមការវាយតម្លៃពិន្ទុចេញពី Tom's Guide បង្ហាញថាឈីប SD855 អាចរត់បានល្បឿន Multi-core ទទួលបានពិន្ទុ ១១ ១៩៦ ខណៈ Single-core បាន ៣ ៥៥២ បើធៀបនឹង A12 Bionic លើ iPhone XR រាងលឿនជាងនេះបន្តិច ដល់ទៅ ១១ ២២១ សម្រាប់ Multi-core និង ៤ ៧៩៤ សម្រាប់ Single-core។

អ្នកឈ្នះ: iPhone XR

៤) កាមេរ៉ា

S10e មានកាមេរ៉ាភ្លោះពីរគ្រាប់ ខណៈរៀមច្បងតម្លៃថ្លៃ S10/S10+ មានដល់ ៣ គ្រាប់។ ធៀបនឹង iPhone XR ដែលមានត្រឹមកាមេរ៉ាមួយគ្រាប់ កន្លងមកក៏អាចបំពេញតម្រូវការសម្រាប់អតិថិជនបានច្រើនគួរសម តែចំណុចនេះរូបភាពលម្អិតដែលផ្តិតចេញផ្ទាល់ មិនទាន់មានការសាកល្បងតេស្តនៅឡើយ។

អ្នកឈ្នះ: មិនទាន់កំណត់

៣) រន្ធនិងមុខងារ

ក្រុមហ៊ុន Apple បានព្យាយាមកាត់បន្ថយរន្ធដោតកាសនិងដកចោលប៊ូតុង Home នាប៉ុន្មានឆ្នាំចុងក្រោយនេះ ដោយ Samsung ក៏ចាប់ផ្តើមដើរមកដល់ចំណុចនេះដូចគ្នា។ iPhone XR ប្រើប្រាស់រន្ធដោត Lightning មានមុខងារ Face ID និងគ្មានរន្ធដោតកាស ខណៈ S10e ដករន្ធដោតកាស អមទ្រនាប់ស្កេនខ្ចៅដៃបង្កប់លើប៊ូតុង Power។ ម៉ូឌែលទាំងពីរមានមុខងារសាកថ្មឥតខ្សែ ប៉ុន្តែ S10e ខ្លាំងត្រង់អាចចែកថាមពលថ្មទៅកាន់ឧបករណ៍ដទៃទៀតផង។

អ្នកឈ្នះ: ស្មើគ្នា

២) ទំហំផ្ទុក

ស្ថិតក្នុងតម្លៃ ៧៤៩ ដុល្លារសម្រាប់ទីផ្សារក្រៅស្រុក ប៉ុន្តែនិយាយពីអង្គផ្ទុកការជាវយក Samsung អាចទទួលបានដល់ ១២៨GB ខណៈ XR បានត្រឹម ៦៤GB ប៉ុណ្ណោះ។

អ្នកឈ្នះ: Galaxy S10e

១) ជម្រើសពណ៌

ទាំង iPhone XR និង S10e មានជម្រើសពណ៌ច្រើនដូចគ្នា ប៉ុន្តែនៅទីផ្សារអាមេរិកម៉ូឌែល Samsung មានត្រឹមជម្រើសពណ៌ស ខ្មៅ ខៀវ និងផ្កាឈូក ខណៈឯ iPhone XR មានច្រើនតាំងពីលឿង ស ខៀវ ខ្មៅ និងក្រហមជាដើមអាចចរាចរគ្រប់ទីផ្សារទូទាំងសកលលោក។

អ្នកឈ្នះ: iPhone XR