ក្រុមហ៊ុនផលិតស្មាតហ្វូនទំហំ 1TB មុនគេបង្អស់ កំពុងប្រឈមក្ស័យធន!

2019-02-07 03:45:48
ព័ត៌មាន

2019-02-07 03:45:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ទោះ Galaxy S10+ ប្រកាសផ្សាយដោយបំពាក់អង្គផ្ទុកដល់ទំហំ 1TB ក៏ដោយក្តី ប៉ុន្តែស្មាតហ្វូនរបស់ក្រុមហ៊ុន Samsung មិនមែនជាម៉ូឌែលដំបូងក្នុងលោកមានប្រើអង្គផ្ទុកទំហំយក្សមួយនេះឡើយ។ ផ្ទុយទៅវិញម៉ូដែលប្រកាសមុនគេបង្អស់គឺ Nut R1 របស់ក្រុមហ៊ុនប្រទេសចិន Smartisan ចេញផ្សាយកាលពីខែឧសភាឆ្នាំទៅ។

ជាស្មាតហ្វូនដំណើរការប្រព័ន្ធ Android មានកាមេរ៉ាក្រោយពីរគ្រាប់ ប្រើឈីប Snapdragon 845 អម RAM ដល់ 8GB មានអង្គផ្ទុក 1TB ប្រភេទ UFS 2.1 ដោយមានលក់លើទីផ្សារនាពាក់កណ្តាលឆ្នាំ ២០១៨ ជាមួយតម្លៃ ៨ ៨៤៨ យន់ឬប្រហែល ១ ៤០០ ដុល្លារ ដែលជាតម្លៃរាងកល់បន្តិចក្នុងទីផ្សារចិន។

មកទល់ពេលបច្ចុប្បន្នគ្រប់យ៉ាងមិនបានដំណើរការរលូនដូចការរំពឹងទុករបស់ក្រុមហ៊ុន Smartisan ឡើយ ពោលគឺដើរយុទ្ធសាស្ត្រខុសក្នុងការបញ្ចុះបញ្ចូលឲ្យអតិថិជនមកជាវស្មាតហ្វូនខ្លួន ស្របពេល ៤ ឆ្នាំចុងក្រោយលក់ដាច់ទូរសព្ទបានត្រឹម ៣ លានគ្រឿង។ សារព័ត៌មានក្នុងស្រុកកន្លងទៅបានចុះផ្សាយថាក្រុមហ៊ុនចិនខាងលើបានពន្យារពេលទូទាត់ប្រាក់ពលកម្មសម្រាប់បុគ្គលិកនាខែធ្នូ ហើយដើមទុនមានការរាំងស្ទះព្រោះតម្រូវការទាមទារពីបណ្តាក្រុមហ៊ុនផ្គត់ផ្គង់មិនទាន់ទូទាត់គ្នាដាច់ស្រេចផងនោះ។

របាយការណ៍បានឲ្យដឹងថាក្រុមហ៊ុន ByteDance ដែលជាក្រុមហ៊ុនមេអ្នកបង្កើត TikTok បានទិញកម្មសិទ្ធិបញ្ញានិងនិយោជិកមួយចំនួន ពោលជាសញ្ញាអវិជ្ជមានដែលថាអនាគតរបស់ក្រុមហ៊ុន Smartisan អាចនឹងមិនប្រាកដប្រជាក្នុងពេលខាងមុខ។