- 2018-11-12 07:12:51
- ព័ត៌មាន
ជីវភាពខ្វះខាត YouTuber Bro KH បង្ខំចិត្តចាកចោលម្ដាយ ដើម្បីមកភ្នំពេញ
- 2018-11-12 07:12:51
- ចំនួនមតិ 0 | ចំនួនចែករំលែក 0
ជីវភាពខ្វះខាត YouTuber Bro KH បង្ខំចិត្តចាកចោលម្ដាយ ដើម្បីមកភ្នំពេញ
ចន្លោះមិនឃើញ
ប្រិយមិត្តប្រហែលជាស្គាល់ បុរសម្នាក់មានរហស្សនាម Bro KH។ លោកមានភាពល្បីល្បាញខ្លាំងគួរសម្យ ក្នុងបណ្ដាញសង្គម YouTube។ Bro KH កើតក្នុងគ្រួសារជីវភាពមិនសូវធូរធារមួយក្នុងខណ្ឌច្បារអំពៅរាជធានីភ្នំពេញ។
នៅភ្នំពេញសិក្សាបានត្រឹមថ្នាក់ទី៤ ម្ដាយរបស់យុវជន បានផ្លាស់ទៅធ្វើការនៅខេត្តសៀមរាប។ ទីនោះហើយដែលយុវជន បានសម្រេចចិត្តរត់ចោលផ្ទះនិងម្ដាយ ដើម្បីមករកការងារធ្វើនៅទីក្រុងវិញ ដោយរំពឹងថានឹងគ្រាន់បានប្រាក់ខ្លះផ្គត់ផ្គង់ជីវភាព បើទោះបីជាត្រូវម្ដាយស្ដីបន្ទោស និងបង្ខំឱ្យរៀនយ៉ាងណាក្ដី។
Bro KH បញ្ជាក់ថា៖ "ខ្ញុំមានប្រវត្តិជូរចត់ម្ដង ខ្ញុំខឹងម៉ាក់បង្ខំឱ្យខ្ញុំរៀន កាលហ្នុងខ្ញុំចង់តែធ្វើការ ព្រោះអីជីវភាពលំបាកណាស់ពេកនោះ។ កាលហ្នុង ខ្ញុំរៀនថ្នាក់ទី៩"។
ទោះបីជាយ៉ាងណា ព្រោះតែអាណិតម្ដាយ លោកក៏បានត្រឡប់ទៅផ្ទះ បន្តការសិក្សារៀនតាមបំណងរបស់អ្នកមានគុណវិញ។ ក្រោយត្រឡប់មកវិញ Bro KH ក៏ទទួលបានកុំព្យូទ័រតម្លៃ ២០០ ដុល្លារពីម្ដាយ ដែលជំរុញឱ្យយុវជនដាក់ចិត្តរៀន និងចេះកុំព្យ័ទ័រច្រើន។
Bro KH ដែលមានឈ្មោះក្នុងសៀវភៅបញ្ជីជាតិ ហួត ហេង បានឱ្យដឹងថា ដោយសារតែម្ដាយនិងកុំព្យូទ័រ ២០០ ដុល្លារនេះហើយ ទើបលោកអាចវិវឌ្ឍខ្លួនក្លាយជាមនុស្សម្នាក់ មានងារងារសមរម្យធ្វើ និងជា YouTuber ក្នុងចិត្តរបស់មនុស្សជាច្រើនរហូតមកដល់សព្វថ្ងៃ។
ថ្នាក់ទី១២ នៅវិទ្យាល័យ ១០ មករា ក្នុងទឹកដីអង្គរខេត្តសៀមរាប ហួត ហេង បានប្រឡងប្រឡងធ្លាក់ រួចក៏សម្រេចចិត្ត មករៀនថ្នាក់ទី ១២ ជាថ្មីនៅសាលាគុយបា ខណ្ឌច្បារអំពៅរាជធានីភ្នំពេញ។ ក្រោយបញ្ចប់ថ្នាក់ទី១២ យុវជន ហួត ហេង បានបន្តថ្នាក់បរិញ្ញាបត្រជំនាញព័ត៌មានវិទ្យា ( IT) នៅវិទ្យាស្ថាន IIC។
ពេលកំពុងសិក្សា Bro KH ក៏បានចូលក្នុងការងារផ្នែកកាត់ត (Video Editor) នៅផលិតកម្ម Rock គ្រាន់បានប្រាក់ខ្លះផ្គត់ផ្គង់ការចាយវាយប្រចាំថ្ងៃ ហើយទល់នឹងពេលនេះ លោកជាអ្នកជំនាញ Design ផ្នែក Sound ពេញម៉ោងនៅផលិតកម្មមួយនេះ។
ក្រោយក្លាយជាអ្នក Design ផ្នែក Sound ពេញម៉ោងហើយនោះ Bro KH បានហក់ចូលក្នុងវិស័យ YouTube ឆ្នាំ ២០១៧ និងផ្ដើមល្បីខ្លាំងដំបូងពេលលោកធ្វើជាពិធីករ E-Sport (កីឡាបាល់ទាត់) ដែលបច្ចុប្បន្នវីដេអូនោះមានអ្នកទស្សនាជិត ១ លានដងហើយ។
“ល្បីជាងគេពេលខ្ញុំធ្វើពិធី ករលេងហ្គេមបាល់ទាត់ ខ្ញុំស្រែកអាឡេអាឡូ មួយវិញទៀងខ្ញុំដាក់ Thumnailចាន់វឌ្ឍនាការ ប្រកួតជាមួយ Ronaldo។ វីដេអូហ្នឹងឥឡូវជាង ៩០០ខេ”។ Bro KH បញ្ជាក់។
បន្ទាប់ក្រសោបបានប្រជាប្រិយភាពខ្លាំង Channel ឈ្មោះ Bro KH របស់លោក ចាប់ផ្ដើមមានអ្នក Subscribe ច្រើនឡើង រហូតបានជាង ៣០ ម៉ឺននាក់នាពេលបច្ចុប្បន្ន ហើយក៏ទទួលបានប័ណ្ណសរសើរ Silver Play Button ពី YouTube មួយផងដែរ។
លោកថា YouTube មានប័ណ្ណសរសើរ ៤ មាន Silver Play Button, Gold Play Button, Diamond Play Buttonនិង Custom Play Button។
ធ្វើជា YouTuber លោក KH ហាក់ពិបាករឿងពេលវេលាបន្តិច ដោយសារលោករវល់នឹងការងារស្នូលជាអ្នក Design Sound នៅផលិតកម្ម Rock។ ថ្វីបើយ៉ាងនេះក្ដី លោកនៅតែឆ្លៀតពេលទំនេរពីការងារ ធ្វើវីដេអូ Vlog កំប្លែងខ្លីៗដើម្បីឱ្យអ្នកគាំទ្រទស្សនា។
បើតាមបុរសធ្មេញចំប៉ើស មាឌឌាំងស្រស់សង្ហា មិនចាញ់តួកុនរូបនេះ ក្នុងវីដេអូ Clip មួយលោកចំណាយពេលពីបីទៅបួនម៉ោង ទម្រាំកាត់តហើយ។
ឆ្លើយនឹងសំណួរថាតើ ដើម្បីក្លាយខ្លួនជា YouTuber និង Vlogger មានប្រជាប្រិយភាពម្នាក់នោះ តើគួរធ្វើដូចម្ដេច? Bro KH ប្រាប់ថា បើនរណាម្នាក់ចង់ធ្វើជា YouTuber ឬ Vlogger ដែលទទួលបានការចាប់អារម្មណ៍ច្រើនពីអ្នកទស្សនា អ្នកនោះគួរតែចេះកាត់ត មានគំនិតច្នៃប្រឌិត បង្កើតអ្វីដែលថ្មីប្លែក មានចិត្តស្រឡាញ់ និងអត់ធ្មត់ ចេះភាសាអង់គ្លេសកាន់តែល្អ ហើយជាពិសេសកុំខ្វល់នឹងការមតិរិះគន់។ ត្រង់នេះមិនមែនដាច់អហង្ការនោះទេ លោកចង់បានន័យថា បើមតិរិះគន់ដើម្បីស្ថាបនា លោកនឹងទទួលយក កែបើរិះគន់ជាន់ពន្លិក លោកមិនយកចិត្តទុកដាក់ឡើយ ព្រោះមនុស្សម្នាក់ មិនអាចផ្គាប់ចិត្តមនុស្សរាប់សិបនាក់បានទេ។
ក្រោយទទួលបានភាពល្បីល្បាញតាមរយៈវីដេអូប្លែកៗ តើលោកនឹងឈប់ធ្វើការ មកធ្វើជា YouTuber ពេញម៉ោងដែរឬទេ? Bro KH តបថា លោកមិនមានគម្រោងឈប់ពីការងារឡើយ ដ្បិតលោកស្រឡាញ់ការងារបច្ចុប្បន្ន ហើយណាមួយលោកក៏មិនរំពឹងចំណូលពី YouTube ច្រើនឡើយ។
"ខ្ញុំអត់ទាន់គិតថា ព្រោះអីនៅស្រុកខ្មែរយើង ពាណិជ្ជកម្មបានថោក តែបើថ្ងៃណាមួយបានថ្លៃ ខ្ញុំអាចនឹងពិចារណា"។
បើតាម Bro KH ពាណិជ្ជកម្មដែលថ្លៃ ជាពាណិជ្ជកម្មនៅប៉ែកអឺរ៉ុប ពោលគឺវីដេអូណា ដែលមានបរទេសមើលច្រើន៕
