តម្លៃត្រឹម ៥៤៩ ដុល្លារ ប៉ុន្តែ OnePlus 6T មានមុខងារពិសេសៗស្មានមិនដល់

2018-10-30 02:09:05
ផលិតផលថ្មី

2018-10-30 02:09:05
ចំនួនមតិ 0 | ចំនួនចែករំលែក 0

ចន្លោះមិនឃើញ

OnePlus 6T បានបង្ហាញវត្តមានជាផ្លូវការកាលពីយប់មិញនេះ ដោយមានភ្ជាប់មកជាមួយនូវមុខងារថ្មីៗជាច្រើន ប៉ុន្តែនៅតែមានតម្លៃធូរថ្លៃដដែល។

ចំណុចថ្មីគួរឲ្យចាប់អារម្មណ៍បំផុតលើ OnePlus 6T គឺការបំពាក់នូវទ្រនាប់ស្កេនម្រាមដៃក្រោមផ្ទៃអេក្រង់។ ត្បិតថាមិនមែនជាមុខងារថ្មី ប៉ុន្តែកន្លងមកមុខងារនេះមានបំពាក់តែនៅលើស្មាតហ្វូនតម្លៃថ្លៃៗប៉ុណ្ណោះដូចជា Huawei Mate 20 Pro ជាដើម។

អេក្រង់របស់ OnePlus 6T មានទំហំ ៦,៤១ អ៊ីញ ជាប្រភេទ AMLOED ដែលនៅតែមានក្បាលឆកដូចមុន ប៉ុន្តែមានទំហំតូចជាងមុន។ នៅត្រង់ក្បាលឆកនេះមានបំពាក់នូវកាមេរ៉ា Selfie ដែលមានកម្រិត ១៦ MP។

ស្មាតហ្វូនថ្មីនេះមានបំពាក់បន្ទះឈីប Snapdragon 845 និងមានជម្រើស RAM ចំនួនបីប្រភេទ។ ទីមួយ RAM ទំហំ ៦ GB បូកនឹងអង្គផ្ទុក ១២៨ GB មានតម្លៃ ៥៤៩ ដុល្លារ, ទីពីរ RAM ទំហំ ៨ GB បូកអង្គផ្ទុក ១២៨ GB តម្លៃ ៥៧៩ ដុល្លារ និងទីបី RAM ទំហំ ៨ GB បូកអង្គផ្ទុក ២៥៦ GB តម្លៃ ៦២៩ ដុល្លារ។ បញ្ជាក់ថានេះជាតម្លៃសម្រាប់ដាក់លក់នៅសហរដ្ឋអាមេរិក។

រូបភាពពេលយប់ថតដោយ OnePlus 6T

ចំពោះផ្នែកកាមេរ៉ាវិញ អ្វីដែលថ្មីនៅលើ 6T គឺមុខងារឈ្មោះ Nightscpae។ មុខងារ Nightscape ប្រើប្រាស់រយៈពេល ២ វិនាទីដើម្បីចាប់យកប្លង់ជាច្រើន បញ្ចូលគ្នាទៅជារូបភាពពេលយប់ដ៏ល្អមួយសន្លឹក។ មុខងារនេះក៏នឹងមានសម្រាប់ OnePlus 6 ផងដែរ។

កាមេរ៉ាខាងក្រោយរបស់ OnePlus 6T មានកាមេរ៉ាមេកម្រិត ១៦ MP ជាមួយ Aperture f/1.7 និងកាមេរ៉ាទីពីរកម្រិត ២០ MP។ លើកាមេរ៉ាទាំងពីរគ្រាប់មានបច្ចេកវិទ្យារក្សាលំនឹង OIS និង EIS ហើយអាចថតវីដេអូ 4K ក្នុងល្បឿន ៦០ ប្លង់/វិនាទី។

OnePlus 6T នៅតែអាចសាកថ្មឆាប់ពេញដូចស្មាតហ្វូនមុន ប៉ុន្តែបច្ចេកវិទ្យាសាកថ្មឆាប់ពេញលើ 6T ត្រូវបានប្ដូរឈ្មោះទៅជា Fast Charge ជំនួសឲ្យ Dash Charge ដែល OnePlus ប្រើកន្លងមក។ ស្មាតហ្វូននេះមានបំពាក់ថ្មទំហំ ៣៧០០ mAh ជាថ្មទំហំធំបំផុតលើត្រកូល OnePlus ប៉ុន្តែមិនមានសមត្ថភាពសាកថ្មឥតប្រើខ្សែនោះឡើយ៕