អាន ៦ ហេតុផលនេះសិន! មុនចង់ទិញ iPhone XR ហើយរំលង iPhone 7 Plus

2018-10-22 13:28:55
ព័ត៌មាន

2018-10-22 13:28:55
ចំនួនមតិ 0 | ចំនួនចែករំលែក 0

ចន្លោះមិនឃើញ

iPhone XR ល្ហិចល្ហៀងថានឹងមកដល់ទីផ្សារកម្ពុជានាដើមខែវិច្ឆិកា ក្រោយ Apple បានប្រកាសបង្ហាញក្នុងថ្ងៃតែមួយរួមគ្នានឹងធុនខ្ពស់ iPhone XS/XS Max។ ស្ថិតក្នុងតម្លៃ ៧៤៩ ដុល្លារ (ទីផ្សារអាមេរិក) ក៏មានអតិថិជនមួយចំនួនកំពុងស្ទាក់ស្ទើរចិត្ត តើគួរចំណាយលុយទិញម៉ូឌែលថ្មីនេះ ឬព្រមដាក់ចិត្តកាន់ iPhone 7 Plus សេរ៊ីឆ្នាំ ២០១៦?

៦ ហេតុផលនឹងពន្យល់អ្នកឲ្យបានច្បាស់ថាការចំណាយលុយទិញ iPhone 7 Plus ហើយបដិសេធលើ ត្រកូល XR ជាជម្រើសត្រឹមត្រូវ។

៦.ចំណេញថវិកាជាង ១០០ ដុល្លារ:

និយាយដល់ទីផ្សារសហរដ្ឋអាមេរិក XR ជាស្មាតហ្វូន Apple ជំនាន់ឆ្នាំ ២០១៨ មានតម្លៃទាបបំផុតត្រឹម ៧៤៩ ដុល្លារ ឬឈានដល់ ៧៩៩ ដុល្លារសម្រាប់ទំហំ 128GB។ យ៉ាងណាមិញតាមតម្លៃទីផ្សារ iPhone 7 Plus ទំហំ 128GB ដដែល សព្វថ្ងៃថ្លៃ ៦៦៩ ដុល្លារ ពោលគឺអ្នកអាចចំណេញដល់ទៅជាង ១០០ ដុល្លារ បើអ្នកជ្រើសយក iPhone សេរ៊ីឆ្នាំ ២០១៦។

៥.កម្រិតដង់ស៊ីតេអេក្រង់ខ្ពស់ជាង:

ម៉ូឌែលទាំងពីរសុទ្ធសឹងបំពាក់អេក្រង់ LCD ដូចគ្នា ប៉ុន្តែអាថ៌កំបាំងដែលអ្នកពុំបានដឹងនោះគឺកម្រិតដង់ស៊ីតេអេក្រង់របស់ iPhone 7 Plus មានដល់ទៅ 401ppi ធៀបនឹង iPhone XR មានត្រឹម 326ppi។ ពិតណាស់មនុស្សជាច្រើនអាចគិតថាមាត្រដ្ឋាន ppi (Pixel-per-Inch) អាចនឹងមិនជាបញ្ហាចោទ ប៉ុន្តែក៏ជារឿងសោកស្តាយដែលត្រូវចាយលុយធំ បែរជាទទួលបានកម្រិតបង្ហាញទាបជាងមុន បែបនេះការទស្សនាវីដេអូកម្រិតច្បាស់ត្រជាក់ភ្នែកដូចជា 1080p ក៏ចុះអន់ថយទៅតាមនោះដែរ។

៤.XR ប្រើត្រឹមកាមេរ៉ាមួយគ្រាប់:

ចំណុចអន់បំផុតរបស់ iPhone XR នោះគឺប្រើប្រាស់បច្ចេកវិទ្យាកាមេរ៉ាមួយគ្រាប់នៅខ្នងក្រោយ ថ្វីបើការអភិវឌ្ឍ Sensor ជំនាន់ក្រោយ អាចផ្តិតយករូបភាពច្បាស់ល្អពិតមែន ប៉ុន្តែបើនិយាយដល់មុខងារនៃការពង្រីកអំឡុងពេលថត 7 Plus ហក់ដល់ Optical Zoom កម្រិត 2x ស្របពេល XR ប្រើប្រាស់ត្រឹម Digital Zoom ធម្មតា។

៣.អតិថិជនខ្លះនៅបេតី Touch ID:

បើអ្នកមិនពេញចិត្តរចនាបថស្មាតហ្វូនអេក្រង់ឆក ហើយនៅបន្តបេតីលើទ្រនាប់ស្កេនខ្ចៅដៃល្បឿនលឿន នោះ iPhone 7 Plus ជាជម្រើសល្អបំផុត។ ថ្វីបើ iPhone ជំនាន់ថ្មីមានមុខងារស្កេនផ្ទៃមុខ Face ID នេះក៏ផ្អែកទៅតាមចំណង់ចំណូលចិត្តនិងការវិភាគរបស់មនុស្សម្នាក់ៗ។

២.iPhone XR បាត់បង់ 3D Touch:

XR ជាទូរសព្ទជំនាន់ក្រោយរបស់ Apple ដំបូងបង្អស់ដែលលុបបំបាត់មុខងារ 3D Touch ចាប់តាំងពីមុខងារសំខាន់នេះបានបើកឲ្យដំណើរការលើ iPhone 6s នាឆ្នាំ ២០១៥។

១.ចំណុចដូចគ្នាមានច្រើន:

រចនាបថរូបរាងថ្មី មុខងារ Face ID ការវិវត្តឈីប A12 Bionic ទាំងនេះជាលក្ខណៈពិសេសខ្លាំងបំផុតដែល XR អាចយកឈ្នះលើ iPhone 7 Plus។ ទៅមើលមុខងារដូចៗគ្នាមានដូចជា RAM 3GB អាវក្រោះការពារទឹកនិងធូលីស្តង់ដារ IP67 ក៏ដូចជាការថត Portrait សុទ្ធសឹងអាចធ្វើបានដូចគ្នា ដោយសម្រាប់ការប្រើប្រាស់ស៊ីមពីរនិងការសាកឥតខ្សែពុំមែនជាចំណុចរសើបរបស់អ្នកប្រើប្រាស់ឡើយ។