​ស្មាតហ្វូន​មាន​អេក្រង់​ក្បាល​​ឆក​ទ្រវែង​ និង​ឆក​​រាង​តំណក់​ទឹក​កំពុង​តែ​ក្លាយ​ជា​ទំនោរ​ពេញ​និយម​ខ្លាំង​ប្រចាំ​ឆ្នាំ ២០១៨ នេះ ហើយ​ឆាប់ៗ​ខាង​មុខ​នេះ​​ទំនោរ​ថ្មី​មួយ​ទៀត​នឹង​លេច​មុខ​ឡើង ដែល​អាច​បំបាត់​រចនាបថ​អេក្រង់​ឆក​បាន។

​​ក្នុង​អំឡុង​​កម្មវិធី Samsung OLED ឆ្នាំ ២០១៨ Samsung បាន​បង្ហាញ​ថា​ខ្លួន​កំពុង​សិក្សា​លើ​បច្ចេកវិទ្យា​ថ្មីៗ​មួយ​ចំនួន​សម្រាប់​បំពាក់​លើ​ស្មាតហ្វូន​នា​ថ្ងៃ​អនាគត។ បច្ចេកវិទ្យា​ទាំង​នោះ​មាន​ដូច​ជា​ FoD, UPS, HoD និង SoD។

FoD តំណាង​ឲ្យ​ពាក្យ​ថា Fingerprint on Display ដែល​ជា​បច្ចេកវិទ្យា​ទ្រនាប់​ស្កេន​ម្រាម​ដៃ​ក្រោម​ផ្ទៃ​អេក្រង់។ HoD មក​ពី​ពាក្យ​ថា Haptic on Display ជា​បច្ចេកវិទ្យា​ Touch ថ្មី​មួយ​លើ​ផ្ទៃ​អេក្រង់។ ចំណែក​ SoD គឺ​ Sound on Display ជា​បច្ចេកវិទ្យា​បញ្ចេញ​សំឡេង​តាម​អេក្រង់ ដើម្បី​ជំនួស​ដល់​រន្ធ​ស្ដាប់។

ចំណែក UPS តំណាង​ឲ្យ​ពាក្យ​ថា Under Panel Sensor ដែល​សំដៅ​ដល់​ការ​បង្កប់​ Sensor ក្រោម​ផ្ទៃ​អេក្រង់ រួម​មាន Sensor កាមេរ៉ា​និង Sensor ដទៃ​ទៀត។ UPS នឹង​ជា​បច្ចេកវិទ្យា​គួរ​ឲ្យ​ចាប់​អារម្មណ៍ ដែល​អាច​ជួយ​ឲ្យ Samsung ផលិត​ស្មាតហ្វូន​មាន​អេក្រង់​លាត​ពេញ​ផ្ទៃ ដោយ​មិន​បាច់​​មាន​ក្បាល​ឆក។

​​​បច្ចុប្បន្ន​នេះ Samsung កំពុង​ធ្វើ​តេស្ត​បច្ចេកវិទ្យា​ទាំង​នេះ​លើ​ឧបករណ៍​មួយ​ចំនួន។ គេ​ជឿជាក់​ថា​បច្ចេកវិទ្យា​ថ្មី​នឹង​មិន​អាច​បង្ហាញ​ខ្លួន​ទាន់​ពេល ​លើ​ Galaxy S10 ​នោះ​ទេ ដោយ​សារ S10 ​នឹង​ប្រកាស​ចេញ​ក្នុង​ពេល​តែ​​ប៉ុន្មាន​ខែ​ទៀត​ប៉ុណ្ណោះ៕​​​