ចង់ចាប់ជំនាញបច្ចេកទេសជួសជុលរថយន្ត សាលា ៤ អាចពិចារណាបាន

2016-01-22 18:31:05
ព័ត៌មាន

2016-01-22 18:31:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ជំនាញបច្ចេកទេសជួសជុលរថយន្តមិនសំដៅដល់ការជួសជុលរថយន្តទាំងស្រុងនោះទេ អ្នកសិក្សាអាចក្លាយជាអ្នកជំនាញផ្នែកគ្រឿងយន្តកសិកម្ម ត្រាក់ទ័រ គ្រឿងចក្រ ម៉ាស៊ីនភ្លើង កប៉ាល់និយាយរួមគឺ ទាក់ទងនិងគ្រឿងម៉ាស៊ីន។ ជំនាញនេះមានសក្ដានុពលសម្រាប់ទីផ្សារការងារបច្ចុប្បន្ន ទោះជាការបើកបង្រៀនតាមគ្រឹះស្ថានសិក្សាមួយចំនួននៅមានកម្រិតក្ដី។

ខាងក្រោមនេះជាគ្រឹះស្ថានចំនួន ៤ ដែលប្រិយមិត្តអាចស្វែងរកការសិក្សាជំនាញ បច្ចេកទេសជួសជុលរថយន្តបាន៖

១) វិទ្យាស្ថានជាតិពហុបច្ចេកទេសកម្ពុជា (NPIC - National Polytechnic Institute of Cambodia) មានបណ្ដុះបណ្ដាលថ្នាក់បរិញ្ញាបត្រ ជំនាញវិស្វកម្មយានយន្ត រយៈពេល៤ឆ្នាំ ដោយមានភ្ជាប់ជាមួយមេរៀនទ្រឹស្ដី និងការអនុវត្តជាក់ស្ដែង។

ឱកាសការងារក្រោយពីបញ្ចប់ការសិក្សាដោយជោគជ័យ៖

អ្នករចនាតួ និងម៉ាស៊ីនរថយន្ត
អ្នកគ្រប់គ្រងនៅតាមយានដ្ឋាន
អ្នកជំនាញផ្នែកមេកានិច
អ្នកជំនាញផ្នែកជួសជុលប្រព័ន្ធប្រេងសាំង និងម៉ាស៊ូត
អ្នកជំនាញផ្នែកអគ្គិសនី និងអេឡិចត្រូនិក ជួសជុលគ្រឿងបន្លាស់រថយន្ត
អ្នកជំនាញផ្នែកសេវាកម្មថែទាំរថយន្ត ជាដើម។ សម្រាប់ព័ត៌មានបន្ថែមសូមទំនាក់ទំនងតាមរយះអាសយដ្ឋានដែលមានទីតាំងនៅភូមិព្រៃពពេល សង្កាត់សំរោងក្រោម ខណ្ឌពោធ៏សែនជ័យ ផ្លូវទៅទំនប់កប់ស្រូវ ឬ តាមរយៈវិបសាយ NPIC

២) សាលាមធ្យមសិក្សាហ្ស៊ី វ៉េ ស៉េ (JVC)

មានបណ្ដុះបណ្ដាលថ្នាក់មធ្យមសិក្សាពេញម៉ោងដែលការសិក្សាមានរយៈពេល ២ ឆ្នាំ ហើយសម្រាប់កម្មវិធីសិក្សានៅឆ្នាំមូលដ្ឋាន ឬឆ្នាំទីមួយគឺសិក្សាពីចំណេះដឹងទូទៅទាក់ទងនិងរថយន្ត មូលដ្ឋានគ្រឹះនៃរថយន្ត។ ចំណែកឆ្នាំទីពីរសិក្សាពីបច្ចេកទេសក្នុងរថយន្ត ប្រព័ន្ធភ្លើង គ្រឿងក្រោម ប្រព័ន្ធសុវត្ថិភាពក្នុងរថយន្តជាដើម។

ឱកាសការងារក្រោយពីបញ្ចប់ការសិក្សាដោយជោគជ័យ៖

អ្នកជំនាញផ្នែកប្រព័ន្ធភ្លើងរថយន្ត
អ្នកជំនាញគ្រឿងក្រោម
អ្នកជំនាញប្រព័ន្ធសុវត្ថិភាព
អ្នកជំនាញផ្នែកគ្រឿងយន្តកសិកម្ម ត្រាក់ទ័រ
អ្នកជំនាញគ្រឿងចក្រ ម៉ាស៊ីនភ្លើង កប៉ាល់ ជាដើម។ សម្រាប់ព័ត៌មានបន្ថែមសូមទំនាក់ទំនងតាមអាសយដ្ឋានរបស់សាលាមធ្យមសិក្សាហ្ស៊ី វ៉េ ស៉េ (JVC) ដែលមានទីតាំងនៅជិតនៅគល់ស្ពានជ្រោយចង្វារត្រើយខាងកើត។

៣) សាលាបច្ចេកទេសដុនបូស្កូ

សាលាបច្ចេកទេសដុនបូស្កូ ក៏មានបណ្ដុះបណ្ដាលជំនាញជួសជុលរថយន្តក្រៅពីជំនាញបច្ចេកទេសដទៃទៀត។ វគ្គបណ្ដុះបណ្ដាលជំនាញបច្ចេកទេសជួសជុលរថយន្តនៅសាលាបច្ចេកទេសដុនបូស្កូ មានរយៈពេល២ឆ្នាំ។ ក្នុងអំឡុងពេលសិក្សា សិស្សនិស្សិតនឹងសិក្សាទាំងទ្រឹស្តីនិងមានភ្ជាប់ជាមួយមេរៀនអនុវត្តជាក់ស្ដែង។

សម្រាប់ព័ត៌មានបន្ថែមសូមទំនាក់ទំនងតាមអាសយដ្ឋាននៅផ្ទះលេខ ២០៣ ភូមិច្រេះ សង្កាត់ភ្នំពេញថ្មី ខណ្ឌសែនសុខ ឬតាមរយៈវិបសាយ Don Bosco Technical School Phnom Penh

៤) វិទ្យាស្ថានបច្ចេកវិទ្យាភ្នំពេញ (Phnom Penh Institute of Technology)

មានបណ្ដុះបណ្ដាលថ្នាក់បរិញ្ញាបត្រជំនាញវិស្វកម្មមេកានិចនិងយានយន្តរយៈពេល ៤ ឆ្នាំ ដែលមានកម្មវិធីសិក្សាដូចខាងក្រោម៖ 1)Engine and drive train technology 2)Material science 2)Machine elements in motor vehicles 3)Thermo-fluid dynamics 4)Fundamentals of engines 5)Electric and electronic automotive systems 6)Comfort and safety systems 7)Climate control systems

សិស្សនិស្សិតក៏អាចសិក្សាលម្អិតពីមូលដ្ឋាននៃប្រព័ន្ធគ្រឿងយន្តនិងមេកានិច ហើយអាចអភិវឌ្ឃន៍បំណិនរបស់ខ្លួនបានតាមរយៈការចុះអនុវត្តផ្ទាល់ជាមួយក្រុមវិស្វករយានយន្តដែលមានបទពិសោធន៍ក្នុងការងារបច្ចេកទេសជាច្រើនឆ្នាំ។ សម្រាប់ព័ត៌មានបន្ថែមសូមទំនាក់ទំនងតាមអាសយដ្ឋានផ្លូវលេខ ១០០៣ កាច់ជ្រុងផ្លូវ ១៩៩៨ សង្កាត់ភ្នំពេញថ្មី ខណ្ឌសែនសុខ ឬតាមរយៈវិបសាយ Phnom Penh Institute of Technology

បន្តអាន៖ គ្រឹះស្ថានសិក្សាចំនួន ៥ ដែលកំពុងបណ្ដុះបណ្ដាលជំនាញ 3D Animation

ចុះប្រិយមិត្តឬមិត្តអ្នកសិក្សាស្គាល់គ្រឹះស្ថានឬសាលាណាផ្សេងទៀតដែលបណ្តុះបណ្តាលជំនាញបច្ចេកទេសរថយន្ត?

អត្ថបទ៖ រក្សា