ម៉ូតូរាង Cute របស់ Honda ម៉ូដែល Giorno ឆ្នាំ​២០២២ ត្រូវបាន​ប្រកាស​ចេញ​ជាផ្លូវការហើយ ដោយវាស័ក្តិសម​បំផុត​សម្រាប់​យុវវ័យ​សម័យថ្មី ហើយ​ជាប្រភេទម៉ូតូសន្សំសំចៃបំផុតទៀតផង។

ម៉ូតូ​អូតូនេះ ប្រើម៉ាស៊ីនចំណុះ ៥០សេសេ ផលិតបានកម្លាំង ៤,៥សេះ និង​កម្លាំងរមួល ៤,១ញ៉ូតុនម៉ែត្រ។ ម៉ាស៊ីនតូចបែបនេះ វាមិន​ធ្វើឱ្យស៊ីសាំងច្រើនឡើយ ពោលគឺ​ចាក់១លីត្រ អាចជិះបានដល់ចម្ងាយ ៨០គីឡូម៉ែត្រឯណោះ នេះ​បើយើង​គិត​ពីល្បឿនជាមធ្យម ៣០គីឡូម៉ែត្រ​/ម៉ោង។ ធុងសាំង​របស់​ម៉ូតូ​នេះ អាចផ្ទុកសាំងបានចំណុះ ៤,៥លីត្រ។

Honda Giorno ជាប្រភេទ​ម៉ូតូធុនតូច​ ដោយមាន​ប្រវែង​ត្រឹមតែ ១៦៥០មម ទទឹង ៦៧០មម កម្ពស់សរុប ១០៣៥មម (ក្នុងនោះ​កម្ពស់​កែបត្រឹមតែ ៧២០មម ល្មម​សម្រាប់​មនុស្សដែលមានកម្ពស់​ទាប) ជាមួយនឹង​ទម្ងន់​ត្រឹមតែ ៨១គីឡូក្រាម។ ចំណែក​រូបរាង​របស់​វាគឺបែបក្លាស៊ីកដូច Vespa ដែរ ដោយ​ចង្កៀង​មុខ និង​ភ្លើងស៊ីញ៉ូ មានរាងមូល ប៉ុន្តែមានរន្ធសាកថ្ម ហើយ​ឃ្លុបក្រោមកែប​ក៏មានទំហំធំដែល​អាច​ដាក់​ឥវ៉ាន់បានច្រើន។

ក្រុមហ៊ុន Honda បាន​ដាក់​លក់​ម៉ូតូនេះ ក្នុងប្រទេសជប៉ុន​ដែល​មាន​តម្លៃ ២០៩ ០០០យ៉េន ឬប្រមាណ ១៨០០ដុល្លារ ដែលមាន​ជម្រើសពណ៌ចំនួន៥ ដូចជា ពណ៌ត្នោត បៃតង ផ្កាឈូក ខៀវ និងប្រផេះ៕