រថយន្តអគ្គិសនី​ដ៏ល្បីល្បាញ​បំផុតរបស់ Tesla គឺ Cybertruck ស្រាប់តែ​ថ្មីៗនេះ គេប្រទះ​ឃើញ​ថា កំពុងសាកភ្លើង​នៅ​ស្ថានីយ​មួយកន្លែងជាលើកដំបូង បើទោះ​បីជា​លោក Elon Musk ប្រកាស​ពន្យារពេល​បញ្ចេញ​រថយន្ត​នេះ ដល់​ឆ្នាំក្រោយក៏ដោយ។

តាមរយៈការបង្ហោះ​នៅលើ​បណ្តាញ​សង្គម​ទ្វីតធើ ឈ្មោះ Drive Tesla បាន​បង្ហាញ​រូប​ភាព​រថយន្ត Cybertruck កំពុង​សាកភ្លើងល្បឿនលឿននៅ​រោងចក្រ Giga Texas របស់ Tesla។ យ៉ាងណាមិញ គេ​មិនដឹងថា រថយន្ត​ខាងលើ​ប្រើពេលប៉ុន្មានម៉ោង​ក្នុងការសាកភ្លើង​ឱ្យពេញ​នោះទេ ខណៈអាគុយវា​ត្រូវបានជឿជាក់ថា អាចមានទំហំធំជាង ២០០គីឡូវ៉ាត់ម៉ោង​ឯណោះ។

រូបភាព​នេះ ទំនង​ជាថតបាន​កាលពីថ្ងៃទី២៣មករា នៅពេល​ដែល​រថយន្ត Cybertruck ត្រូវបាន​បញ្ជូន​ទៅកាន់រោងចក្រ​ខាងលើ ដែល​ជាផ្នែក​មួយ​នៃការ​ត្រៀម​ធ្វើបទបង្ហាញ​របស់​មេក្រុមហ៊ុន Tesla ដោយ​បាន​និយាយអំពី​ជោគវាសនា​រថយន្តអគ្គិសនីនេះ។

គួរដឹងថា ការបញ្ចេញ​លក់​រថយន្ត​ Cybertruck នឹង​ត្រូវលើក​ពេល​ទៅដល់ឆ្នាំ​២០២៣។ មូលហេតុនោះគឺថា ប្រសិន​បើបង្ខំបញ្ចេញ​រថយន្ត​ថ្មីក្នុងឆ្នាំ​នេះ មិនបាន​ជួយអ្វីដល់ក្រុមហ៊ុនទេ ផ្ទុយមកវិញ​វានាំឱ្យ​បរិមាណ​ផលិត​រថយន្ត​រួម​ធ្លាក់ចុះថែមទៀតផង ដោយសារតែកង្វះខាតនៃការផ្គត់ផ្គង់​គ្រឿងបន្លាស់​ ពិសេសគឺឈីប។

កន្លងមកនេះ មានការ​លេចធ្លាយថា តម្លៃនៃរថយន្តអគ្គិសនី Cybertruck គឺមាន​តម្លៃថោកជាងគេ​បើប្រៀបធៀប​នឹង​រថយន្ត Tesla ដទៃទៀត។ រថយន្ត​នេះ មានតម្លៃ ៣៩ ៩០០ដុល្លារ (សម្រាប់ម៉ូទ័រ១) បើប្រៀបធៀបនឹង​ Model 3 មានតម្លៃ ៤១ ៩៩០ដុល្លារ និង Model Y តម្លៃ ៥៤ ៩៩០ដុល្លារ។ យ៉ាងណាមិញ តម្លៃ Cybertruck ​នឹងខ្ពស់ជាងនេះពោលគឺប្រមាណ ៤៩ ៩០០ដុល្លារ (សម្រាប់​​ម៉ូទ័រ២) ឬឡើងដល់ ៦៩ ៩០០ដុល្លារ (សម្រាប់ម៉ូទ័រ៣)។

​សម្រាប់​ម៉ូទ័រ១ រថយន្ត Cybertruck នេះ អាចជាន់ពីល្បឿន ០ ទៅ ១០០គីឡូម៉ែត្រ/ម៉ោង ប្រើពេល ៦,៥វិនាទី ហើយពេល​សាកភ្លើងពេញ​ម្តងអាចបើកដល់ចម្ងាយ ៤០០គីឡូម៉ែត្រ។ ចំណែក​ម៉ូទ័រ២ អាចបើកលើសនេះ ៨០គីឡូម៉ែត្រទៀត (ល្បឿនពី០ ទៅ ១០០គ.ម/ម៉ ប្រើពេលក្រោម ៤,៥វិនាទី) និង​ម៉ូទ័រ៣ បន្ថែម​ដល់ ៩៦គីឡូម៉ែត្រ (ល្បឿនពី០ ទៅ ១០០គ.ម/ម៉ ប្រើពេលក្រោម ៣,៥វិនាទី)៕