ជារថយន្ត​ដែល​គេ​ទន្ទឹង​រង់ចាំជាយូរមកហើយនោះ ពេលនេះមេក្រុមហ៊ុន Tesla លោក Elon Mush បាន​ប្រកាស​ដំណឹង​មិនល្អទៀត​ហើយអំពីរថយន្ត​ Cybertruck ដោយ​ពន្យារពេល​ផលិតវា។

លោក​បានបញ្ជាក់​កាលពីថ្ងៃទី២៦មករាថា ការបញ្ចេញ​លក់​រថយន្ត​ Cybertruck នឹង​ត្រូវលើក​ពេល​ទៅដល់ឆ្នាំ​២០២៣។ មូលហេតុនោះគឺថា ប្រសិន​បើបង្ខំបញ្ចេញ​រថយន្ត​ថ្មីក្នុងឆ្នាំ​នេះ មិនបាន​ជួយអ្វីដល់ក្រុមហ៊ុនទេ ផ្ទុយមកវិញ​វានាំឱ្យ​បរិមាណ​ផលិត​រថយន្ត​រួម​ធ្លាក់ចុះថែមទៀតផង ដោយសារតែកង្វះខាតនៃការផ្គត់ផ្គង់​គ្រឿងបន្លាស់​ ពិសេសគឺឈីប។

កន្លងមកនេះ មានការ​លេចធ្លាយថា តម្លៃនៃរថយន្តអគ្គិសនី Cybertruck គឺមាន​តម្លៃថោកជាងគេ​បើប្រៀបធៀប​នឹង​រថយន្ត Tesla ដទៃទៀត។ រថយន្ត​នេះ មានតម្លៃ ៣៩ ៩០០ដុល្លារ (សម្រាប់ម៉ូទ័រ១) បើប្រៀបធៀបនឹង​ Model 3 មានតម្លៃ ៤១ ៩៩០ដុល្លារ និង Model Y តម្លៃ ៥៤ ៩៩០ដុល្លារ។ យ៉ាងណាមិញ តម្លៃ Cybertruck ​នឹងខ្ពស់ជាងនេះពោលគឺប្រមាណ ៤៩ ៩០០ដុល្លារ (សម្រាប់​​ម៉ូទ័រ២) ឬឡើងដល់ ៦៩ ៩០០ដុល្លារ (សម្រាប់ម៉ូទ័រ៣)។

​សម្រាប់​ម៉ូទ័រ១ រថយន្ត Cybertruck នេះ អាចជាន់ពីល្បឿន ០ ទៅ ១០០គីឡូម៉ែត្រ/ម៉ោង ប្រើពេល ៦,៥វិនាទី ហើយពេល​សាកភ្លើងពេញ​ម្តងអាចបើកដល់ចម្ងាយ ៤០០គីឡូម៉ែត្រ។ ចំណែក​ម៉ូទ័រ២ អាចបើកលើសនេះ ៨០គីឡូម៉ែត្រទៀត (ល្បឿនពី០ ទៅ ១០០គ.ម/ម៉ ប្រើពេលក្រោម ៤,៥វិនាទី) និង​ម៉ូទ័រ៣ បន្ថែម​ដល់ ៩៦គីឡូម៉ែត្រ (ល្បឿនពី០ ទៅ ១០០គ.ម/ម៉ ប្រើពេលក្រោម ៣,៥វិនាទី)៕