- 2020-05-18 01:56:48
- ព័ត៌មាន
អ្នកបង្កើតវិបសាយកូវីដ១៩ ប្រកែកមិនយក Ads តម្លៃ៨លានដុល្លារ ព្រោះហេតុផលគួរសរសើរ
- 2020-05-18 01:56:48
- ចំនួនមតិ 0 | ចំនួនចែករំលែក 0
អ្នកបង្កើតវិបសាយកូវីដ១៩ ប្រកែកមិនយក Ads តម្លៃ៨លានដុល្លារ ព្រោះហេតុផលគួរសរសើរ
ចន្លោះមិនឃើញ
យុវជនវ័យ ១៧ ឆ្នាំ ឈ្មោះ Avi Schiffmann ដែលរស់នៅកោះ Mercer Island ក្បែរទីក្រុង Seattle សហរដ្ឋអាមេរិក គឺជាម្ចាស់វិបសាយតាមដានអំពីសភាពការណ៍ជំងឺកូវីដ១៩មួយ ដែលបច្ចុប្បន្នមានអ្នកចុចមើលជាង ៣០ លានដងក្នុងមួយថ្ងៃ និងមានចំនួនចុចមើលសរុបខ្ទង់ ៧០០លានដង។
យ៉ាងណាក្ដី Schiffmann បានធ្វើការសម្រេចចិត្តគួរឲ្យភ្ញាក់ផ្អើលមួយដោយបានច្រានចោលសំណើដាក់ផ្ទាំងផ្សាយពាណិជ្ជកម្ម (Ads) លើវិបសាយរបស់ខ្លួន ដែលមានទំហំទឹកប្រាក់ដល់ ៨លានដុល្លារឯណោះ។ យុវជនរូបនេះគិតថារូបគេអាចរកបានជាង ៣០លានដុល្លារ ប្រសិនបើដាក់ Ads លើវិបសាយខ្លួន ប៉ុន្តែវាមិនមែនជាគោលដៅចម្បងនៃការបង្កើតវិបសាយនេះទេ។
Schiffmann បាននិយាយថាមិនចង់ឲ្យ Ads មករំខាន User Interface នៃវិបសាយរបស់ខ្លួន ហើយប្រសិនបើដាក់ Ads គឺអាចបាត់បង់សិទ្ធកាន់កាប់ពេញលេងលើវិបសាយ។ ជាងនេះទៅទៀតរូបគេដឹងថាមនុស្សជាច្រើនលើពិភពលោកមិនមានអ៊ីនធឺណិតដែលមានស្ថិរភាពនោះទេ ដូចនេះប្រសិនបើដាក់ Ads វានឹងធ្វើឲ្យការបើកវិបសាយដំណើរការកាន់តែយឺត និងមិនអាចឲ្យអ្នកដទៃចូលវិបសាយបាន។
Schiffmann បានចាប់ផ្ដើមបង្កើតវិបសាយក្នុងបន្ទប់របស់ខ្លួន ចាប់តាំងពីថ្ងៃទី ២៩ ខែធ្នូ ពេលដែលជនជាតិអាមេរិកមួយចំនួនធំមិនសូវខ្វាយខ្វល់អំពីជំងឺកូវីដ១៩នៅឡើយ។ វិបសាយមានឈ្មោះថា nvoc2019.live ដែលមើលទៅមានភាពសាមញ្ញ និងបង្ហាញព័ត៌មានច្រើនមានដូចជាចំនួនអ្នកឆ្លង, ចំនួនអ្នកស្លាប់, ចំនួនអ្នកជាក្នុងប្រទេសនីមួយៗជាដើម។
វិបសាយដែលធ្វើការអាប់ដេតភ្លាមៗលើករណីជំងឺកូវីដ១៩នេះ គឺត្រូវបាន Schiffmann បង្កើតឡើងដោយពឹងផ្អែកលើចំណេះដឹងផ្នែកសរសេរកម្មវិធីដែលរូបគេរៀនតាមរយៈ YouTube និងអ៊ីនធឺណិតក្នុងរយៈពេល ១០ឆ្នាំកន្លងមកនេះ។ Schiffmann និយាយថា ៖ "ខ្ញុំមិនបានចូលរៀនវគ្គជំនាញសរសេរកម្មវិធីថ្លៃៗ ហើយក៏មិនបានរៀនសរសេរកម្មវិធីនៅសាលាណាដែរ៕”
