បុគ្គលិក Huawei ជាង ២០០ នាក់កំពុងបម្រើការងារនៅកម្ពុជា

2014-11-15 17:30:43
ព័ត៌មាន

2014-11-15 17:30:43
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Cary Yang នាយកប្រតិបត្តិក្រុមហ៊ុន Huawei Technologies ប្រចាំប្រទេសកម្ពុជាបានឲ្យដឹងនៅក្នុងឱកាសបើកពិព័រណ៍បច្ចេកវិទ្យា ITET កាលពីម្សិលមិញនេះថា បុគ្គលិក Huawei ចំនួន ២០០ នាក់ កំពុងបម្រើការងារនៅប្រទេសកម្ពុជា ដែលក្នុងនោះ ៨០ ភាគរយជាបុគ្គលិកក្នុងស្រុក។

លោកថា ក្រុមហ៊ុន Huawei ចាប់ផ្ដើមបើកប្រតិបត្តិការអាជីវកម្មនៅប្រទេសកម្ពុជាតាំងពីឆ្នាំ ១៩៩៩។ គិតដល់បំណាច់ឆ្នាំ ២០១៣ ក្រុមហ៊ុនមានបុគ្គលិកបម្រើការងារចំនួនជាង ១៥០.០០០ នាក់ នៅទូទាំងពិភពលោក ដោយក្នុងនោះមួយភាគក៏មាននៅកម្ពុជានោះដែរ។

លោកអះអាងថា ក្រុមហ៊ុនកំពុងបណ្ដុះបណ្ដាលបុគ្គលិកជំនាញៗក្នុងស្រុកបន្ថែមទៀត ដើម្បីកាត់បន្ថយការប្រើប្រាស់ធនធានមនុស្សពីខាងក្រៅ ដែលនេះនឹងជួយរួមចំណែកបង្កើតឱកាសការងារសម្រាប់ពលរដ្ឋកម្ពុជា។

ក្រុមហ៊ុន Huawei ជាក្រុមហ៊ុនផ្តល់ដំណោះស្រាយផ្នែកព័ត៌មានវិទ្យា និងបច្ចេកវិទ្យាទូរគមនាគមន៍ (ICT) ដ៏ធំមានមូលដ្ឋាននៅប្រទេសចិន។ Huawei បានក្លាយជាក្រុមហ៊ុនដ៏ឈានមុខ ដែលផ្តល់ដំណោះស្រាយនិងសេវាកម្មផ្នែកព័ត៌មានវិទ្យា និងបច្ចេកវិទ្យាទូរគមនាគមន៍ (ICT) សម្រាប់ប្រតិបត្តិករទូរគមនាគមន៍ រាជរដ្ឋាភិបាល និងសហគ្រាសនៅក្នុងប្រទេសកម្ពុជា។