/inter18/607d5b71555c1_1618828140_medium.jpg)
- 2021-04-19 10:32:56
- ប្រវត្តិបច្ចេកវិទ្យា
ត្រួសៗពីប្រវត្តិ Elon Musk ដើមកំណើតអាហ្វ្រិក ដែលមនុស្សភាគតិចបំផុតបានស្គាល់
- 2021-04-19 10:32:56
- ចំនួនមតិ 0 | ចំនួនចែករំលែក 0
ត្រួសៗពីប្រវត្តិ Elon Musk ដើមកំណើតអាហ្វ្រិក ដែលមនុស្សភាគតិចបំផុតបានស្គាល់
ចន្លោះមិនឃើញ
លោក Elon Musk ជាបុគ្គលជោគជ័យមួយរូបដែលកំពុងមានកេរ្តិ៍ល្បីរន្ទឺខ្លាំងនៅសហរដ្ឋអាមេរិក រួមទាំងបណ្ដាប្រទេសជាច្រើនទៀតលើសកលលោក លើកលែងតែនៅប្រទេសកម្ពុជាដែលមានមនុស្សភាគតិចស្គាល់ថាគាត់ជានរណា។ ឥឡូវនេះដើម្បីស្គាល់ច្បាស់ មកតាមដានពីប្រវត្តិរូបរបស់គាត់ដូចខាងក្រោម៖
សង្ខេប
មានឈ្មោះពេញថា Elon Reeve Musk ដែលមានសញ្ជាតិ កាណាដា-អាមេរិក មានដើមកំណើតកើតជានៅប្រទេសអាហ្វ្រិកខាងត្បូង ដោយបច្ចុប្បន្ននេះមានវ័យ ៤៤ឆ្នាំ (កើតថ្ងៃទី ២៨ មិថុនា ១៩៧១)។ លោក Musk បានក្លាយជាមហាសេដ្ឋីនៅអំឡុងវ័យ២០ឆ្នាំ នៅពេលនោះគាត់បានលក់ក្រុមហ៊ុនដំបូងរបស់ខ្លួន ឈ្មោះថា Zip2 ទៅឲ្យក្រុមហ៊ុន Compaq Computers។ លោកទទួលបានជោគជ័យជាបន្តបន្ទាប់នៅពេលសាងក្រុមហ៊ុន X.com នៅឆ្នាំ១៩៩៩, ក្រុមហ៊ុន SpaceX នៅឆ្នាំ២០០២ និង Tesla Motors ក្នុងឆ្នាំ ២០០៣។
ជីវិតកាលវ័យជំទង់
លោក Elon Musk ខាងឆ្វេងនិងប្អូនប្រុស Kimbal Musk
នៅវ័យ១០ឆ្នាំ លោក Musk បានទិញកុំព្យូទ័រដំបូងរបស់ខ្លួន ដោយពេលនោះបានចាប់ផ្ដើមរៀនសរសេរកម្មវិធីដោយខ្លួនឯង បន្ទាប់មកទៀតនៅអាយុ១២ឆ្នាំ គាត់បានដាក់លក់កម្មវិធីដំបូងរបស់ខ្លួន ដែលវាជាហ្គេមមួយប្រភេទមានឈ្មោះថា Blastar។ នៅក្នុងឆ្នាំ១៩៨៩ ពេលមានវ័យ១៧ឆ្នាំ គាត់បានផ្លាស់ទៅប្រទេសកាណាដាដើម្បីចូលរៀននៅមហាវិទ្យាល័យ Pennsylvania។ ក្រោយពីបញ្ចប់ការសិក្សាកម្រិតបរិញ្ញាបត្រផ្នែកសេដ្ឋកិច្ច គាត់ក៏បានបន្តការសិក្សាលើកម្រិតបរិញ្ញាបត្រទីពីរ ផ្នែករូបសាស្ត្រ។
បន្ទាប់ពីចាក់ចេញពីមហាវិទ្យាល័យ Pennsylvania លោក Musk បានបន្តការសិក្សានៅមហាវិទ្យាល័យ Stanford រដ្ឋកាលីហ្វរនីញ៉ា ដើម្បីបន្តការសិក្សាផ្នែកបណ្ឌិត ខាងថាមពលរូបសាស្ត្រ។ ពេលលោកប្ដូរចូលសកលវិទ្យាល័យថ្មី គឺជាពេលមួយប្រព័ន្ធអ៊ីនធឺណិតចាប់ផ្ដើមផ្ទុះខ្លាំង ដែលជាហេតុធ្វើឲ្យលោកសម្រេចចិត្តបញ្ឈប់ការសិក្សាក្រោយពីប្ដូរចូលទើបបានពីរថ្ងៃ។ មូលហេតុដែលសម្រេចចិត្តបែបនេះគឺដើម្បីចាប់យកឱកាសនៅនឹងមុខ ដោយបានបែកគំនិតមកបង្កើតក្រុមហ៊ុនដំបូងរបស់ខ្លួនមានឈ្មោះថា Zip2។
Zip2 ជាក្រុមហ៊ុនមួយដែលមានផ្ដល់ជូនសេវាកម្មផែនទីដល់វិបសាយព័ត៌មាន ដែលក្នុងនោះមានដូចជាវិបសាយ New York Times និង Chicago Tribune។ នៅឆ្នាំ១៩៩៩ ក្រុមហ៊ុន Compaq Computers ទិញយកក្រុមហ៊ុន Zip2 បានសម្រេចក្នុងទំហំទឹកប្រាក់៣០៧លានដុល្លារ រួមទាំង ៣៤លានដុល្លារលើតម្លៃហ៊ុន។
ជីវិតជាសហគ្រិន
ក្រោយពីលក់ក្រុមហ៊ុនដំបូងរបស់ខ្លួន លោក Musk បានរួមសហការជាមួយដៃគូដើម្បីចាប់ផ្ដើមក្រុមហ៊ុនថ្មីឈ្មោះ X.com ដែលជាក្រុមហ៊ុនផ្ដល់សេវាកម្មហិរញ្ញវត្ថុ និងការទូទាត់ប្រាក់តាមរយៈអនឡាញ ដោយចាប់ដំណើរការនាឆ្នាំ១៩៩៩។ នៅឆ្នាំ២០០១ ក្រុមហ៊ុននេះក៏បានប្ដូរឈ្មោះទៅជា PayPal ហើយនៅខែតុលា ឆ្នាំ២០០២ ក្រុមហ៊ុន eBay បានទិញយក PayPal ដោយគិតលើតម្លៃហ៊ុនសរុបស្មើនឹងទឹកប្រាក់ចំនួន ១,៥ពាន់លានដុល្លារ។ មុនពេលលក់ចេញ លោក Musk មានកាន់កាប់ហ៊ុនរបស់ PayPal ចំនួន១១ភាគរយនៃហ៊ុនសរុប។
មិនបញ្ឈប់ត្រឹមនេះលោក Musk បានបន្តសាងក្រុមហ៊ុនទីបីនាឆ្នាំ ២០០២ ដែលមានឈ្មោះថា "SpaceX” ដោយមានគោលបំណងថានឹងសាងសង់យានអវកាសសម្រាប់ធ្វើដំណើរទៅក្នុងលំហអាកាស។ នៅត្រឹមឆ្នាំ ២០០៨ ក្រុមហ៊ុន SpaceX ទទួលបានរង្វាន់ពីភ្នាក់ងារអវកាសណាសា ជាកុងត្រាក្នុងការផលិតនៅយានសម្រាប់បញ្ជូនទំនិញទៅកាន់ស្ថានីយអវកាស។
ការសម្រេចចិត្តដ៏ប្រថុយប្រថានមួយទៀតរបស់លោក Musk គឺការសម្រេចចិត្តបង្កើតក្រុមហ៊ុន Tesla Motors នៅឆ្នាំ ២០០៣ ដែលជាក្រុមហ៊ុនផលិតរថយន្តអគ្គិសនីមានតម្លៃថោកសមរម្យ។ នៅឆ្នាំ២០០៨ ក្រុមហ៊ុននេះបានបង្ហាញរថយន្តអគ្គិសនីស្ព័រម៉ូដែល Roadster ដែលវាមានអាគុយថាមពលខ្លាំងអាចបើកបរបានចម្ងាយ ៤០០គ.ម សម្រាប់ការសាកមួយដង។ ជោគជ័យមួយទៀតរបស់ក្រុមហ៊ុននេះគឺការផលិតរថយន្តអគ្គិសនីប្រភេទ Sedan Model Sដែលអាចបរបានចម្ងាយ ៤២៦គ.ម សម្រាប់ការសាកមួយដង។ Model S នេះទៀតសោតបានជាប់ឈ្មោះជារថយន្តប្រចាំឆ្នាំ ២០១៣ លើទស្សនាវដ្ដី Motor Trend ថែមទៀតផង។
Hyperloop
លោក Musk នៅតែបំពេញការងារយ៉ាងសកម្មក្នុងគោលបំណងឲ្យគំនិតដែលពោរពេញដោយភាពច្នៃប្រឌិតរបស់ខ្លួនលេចចេញជារូបរាងឡើង។ នៅខែសីហា ឆ្នាំ២០១៣ គាត់បានបង្ហាញពីមធ្យោបាយធ្វើដំណើរថ្មីឈ្មោះថា “Hyperloop” ដែលវាអាចបញ្ចូនមនុស្សពីទីតាំងមួយទៅទីតាំងមួយតាមរយៈបំពង់ក្នុងល្បឿនរហូតដល់ ១១២៦គ.ម/ម៉។ លោក Musk បានបញ្ជាក់ថាគម្រោងការ Hyperloop នេះនឹងត្រូវចំណាយពេលចន្លោះពី ៧-១០ឆ្នាំ ដើម្បីសាងសង់៕ ប្រភព៖ Biography ប្រែសម្រួល៖ ហៃ សុខហេង
