រំលឹក! បុរសម្នាក់ ដែលផលិតហ្គេមឲ្យអ្នកលេងជាច្រើនកាលពី ១៥ឆ្នាំមុន

2020-08-11 04:58:52
ប្រវត្តិបច្ចេកវិទ្យា

2020-08-11 04:58:52
ចំនួនមតិ 0 | ចំនួនចែករំលែក 0

ចន្លោះមិនឃើញ

រំលឹកទៅក្រោយវិញប្រហែលជាង ១៥ឆ្នាំ ហ្គេមកម្សាន្តអារម្មណ៍មិនទាន់រីកចម្រើនដូចសព្វថ្ងៃទេ ប៉ុន្តែវាបានបន្សល់ទុកអនុស្សាវរីយ៍ពីកុមារភាពជាច្រើនរាប់មិនអស់។ អ្វីដែលគួរឲ្យសោកស្ដាយ គឺប្រធានក្រុមហ៊ុនផលិតហ្គេមទាំងនោះ បានបាត់បង់ជីវិតហើយ។

លោក Satoru Iwata ជាប្រធានក្រុមហ៊ុនផលិតហ្គេមកម្សាន្តដ៏ល្បីឈ្មោះរបស់ប្រទេសជប៉ុន Nintendo បានបាត់បង់ជីវិតក្នុងវ័យ ៥៥ឆ្នាំ។ នេះបើតាមការចេញសេចក្ដីថ្លែងការណ៍ របស់ក្រុមហ៊ុន Nintendo។ ចំណែកមូលហេតុនៃការស្លាប់របស់ប្រធានក្រុមហ៊ុនរូបនេះ គឺបណ្ដាលមកពីដុះដុំសាច់ក្នុងបំពង់ទឹកប្រមាត់។

លោក Iwata ត្រូវតែងតាំងជាប្រធានក្រុមហ៊ុន Nintendo ក្នុងឆ្នាំ២០០២ ជំនួសលោក Hiroshi Yamauchi។ លោកជាអ្នកដឹកនាំមួយរូប ក្នុងចំណោមប្រធាន ៤រូបគត់ របស់ក្រុមហ៊ុន Nintendo និងជាបុគ្គលទីមួយក្រៅត្រកូលគ្រួសារ Yamauchi។

អ្វីដែលធ្វើឲ្យមនុស្សជាច្រើនចងចាំមិនភ្លេច គឺបុរសលាក់មុខរូបនេះ ជាអ្នកនៅពីក្រោយការផលិតហ្គេមកម្សាន្តអារម្មណ៍ជាច្រើន តាំងពីបច្ចេកវិទ្យាមិនទាន់រីកចម្រើន ជាពិសេសលោកជាមនុស្សម្នាក់ក្នុងចំណោមអ្នកអភិវឌ្ឍហ្គេមតុក្កតាស៊ីផ្សិត។

ពាក្យសម្ដីមួយឃ្លាដែលគេនៅចងចាំ "នៅក្នុងនាមប័ណ្ណជំនួញ ខ្ញុំជាប្រធានប្រតិបត្តិ... នៅក្នុងចិត្ត ខ្ញុំជាអ្នកអភិវឌ្ឍហ្គេម... ប៉ុន្តែនៅក្នុងបេះដូង ខ្ញុំជាអ្នកលេងហ្គេម"។ លោក Iwata និយាយក្នុងសន្និសីទសម្រាប់អ្នកអភិវឌ្ឍហ្គេម នៅឆ្នាំ២០០៥។

"អរគុណសម្រាប់គ្រប់យ៉ាង... លោក Iwata” គណនី Twitter ផ្លូវការក្រុមហ៊ុន Sony Playstation បង្ហោះ។ ចំណែកអ្នកគាំទ្រម្នាក់ទៀត បានសរសេរថា "លាហើយ, Satoru Iwata... អរគុណដែលនិយាយចំបេះដូងរបស់ពួកយើង"។

ក្រោយដំណឹងដ៏សោកសៅលេចឮឡើង មនុស្សជាច្រើនដែលធ្លាប់សប្បាយរីករាយជាមួយស្នាដៃលោក បានសម្ដែងការសោកស្ដាយយ៉ាងខ្លាំង។ កុមារស្ទើរទាំងអស់ ធ្លាប់លេងហ្គេមរបស់ Satoru Iwata ទាំងមិនធ្លាប់ដឹងថាលោកជានរណា ប៉ុន្តែពេលស្គាល់ក៏ជាពេលត្រូវនិយាយពាក្យថាលាដែរ៕